Nikolai Omelin

Nikolai Titovič Omelin
N. T. Omelin, vozil 1958-1965
Sündundpäiv	4 (17) redukud 1916(1916-10-17)
Sündund sija	Sel'gi-külä, Poveneckii ujezd, Oloncan gubernii
Kolendpäiv	29. elokud 2001(2001-08-29) (84 vot)
Kolend sija	Moskva-lidn
Rahvahuz’	SSSR
Voiskiden sugu	pehota (jaugastuivoisk)
Služban voded	1937—1971
Služban nimi	Polkovnik
Torad/voinad	Venä-suomalaine voin (1939—1940) Sur' Kodimaine voin
Pauklahjad da premijad
Lebul	Moskvan aviacionijan institutan voinkundan opendai

Nikolai Titovič Omelin (ven.: Никола́й Ти́тович Оме́лин) (4 (17) redukud vodel 1916; Sel'gi-külä, Poveneckii ujezd, Oloncan gubernii — 29. elokud vodel 2001, Moskva-lidn) — Sovetskijan Sojuzan Geroi (1943), polkovnik (1952).

Elostarin

Sündui 4 (17) redukud  vodel 1916 Oloncan gubernijan Povencan ujezdan Sel’gi-küläs. Karjalaine. Vodel 1929 lopi 6 klassad kodikülän školas. Radoi mecas da splaval Medvešjegorskan agjan Padanoiden lespromhozas.

Armijas om vodelpäi 1937. Služi pehotas Sibirin voinümbrištkundas. Vodel 1939 lopi norembiden lentenantoiden kursad Krasnojarsk-lidnas. Oli Sibirin voinkundan pehotvzvodan pämehen.

Venä-suomalaižen voinan ühtnik: vilukus-keväz’kus vodel 1940 — oli ezmäižen Suomen Rahvahan Armijan ambundan divizijan komendantskijan rotan ohjandajan.

Jatksi službad Piterin voinkundas pehotrotan ohjandajan.

Suren Kodiman voinan ühtnik: kezakus-sügüz’kus vodel 1941 — Pohjoižen da Karjalan frontan 52 ambundpolkan ohjandai. Ühtni vointoroihe Karjalan polestusen täht. 27. sügüz’kud vodel 1941 sai käziden da jaugoiden satatest da tal’vkuhusai vodel 1941 oli tervehtoitandal gospitališ Belomorsk-lidnas (Karjalas).

Tal’vkus vodel 1941 — kül’mkus vodel 1942 — om rotan ohjandai, ohjandajan varapämez’ da 758 bataljonan (keväz’kuspäi vodel 1942 om 68 gvardeiskii) ambundpolkan ohjandai (Karjalan da Pohj-Päivlaskmaine frontad). Ühtni Karjalan polestuses vointoroiš dem’anskijan polel. 20. semendkud vodel 1942 sai satatest pähä da oktaha kädehe, kun aigan oli gospitališ Kem’-lidnas (Karjalas). 29. kül’mkud vodel 1942 sai satatest oiktaha jaugaha i keväz’kuhusai vodel 1943 oli gospitališ Šarja-lidnas (Kostromskii agj). Heinkus vodel 1943 lopi «Ambund»-kursad.

Heinkus vodel 1943 — elokus vodel 1944 — oli Keksmaižen da 1-n Ukrainan frontoiden 10-den gvardeiskijan ambundpolkan bataljonan ohjandajan (pämehen). Oli Orlovskijan, Dnepran, Žitomirsko-Berdičevskan, Rovno-Luckan, Proskurovsko-Černovickan da L'vovsko-Sandomirskan vointoroiden ühtnikan.

Hüvin ičtaze ozuti Dnepr-joged ottes. 23. sügüz'kud vodel 1943 bataljonanke ujui joges päliči Braginskan röunan Gomel'skan agjan Ülembaižed Žarad-küläd vast Belorussijas. Sades hüväd pozicijad Dneprаn-jogen oiktal randal, bataljon hänen ohjandusel pidi necidä tahod, kuni ei ujund joges päliči kaik divizijan pävoinvägi. 26. sügüz'kud vodel 1943 vastusti vihanikoiden vointorad Kamenka-küläd läz (nügüd' ei ole, taho Ivankovskovan röunas Kijevan agjas, Ukrainal), hänen bataljon ambui 5 tankad, sai trofejikš 2 tankad da ambundorudijan. 29. sügüz'kud vodel 1943 sai kova hibjan satatusen i kül'mkun lophusai vodel 1943 oli läžundkodiš.

16. redukud vodel 1943 SSSRan Ülembaižen Nevondišton Prezidiuman käskon mödhe hüväs vointegoiš vihanikoidenke da rohktudes gvardian kapitanale Nikolai Omelinale om anttud Sovetskijan Sojuzan Geroi nimi, Leninan orden da Kuldaine Tähtaz-medal'.

Vodel 1948 lopi M.V. Frunze nimel voinakademijan. Vozil 1948—1956 oli Voin-juridižen akademijan vointaidehen istorijan kundan opendajan da vanhemban opendajan taktikkundal. Vozil 1956—1957 oli Moskvan suvorovskian voinradmahttehnikuman pämehen abunikan stroipalas. Vozil 1957—1961 oli Moskvan valdkundaližen P. I. Čaikovskii nimel konservatorijan voinkafedran opendai da vanhemb opendai, vodelpäi 1961 oli Moskvan aviacionnijan institutan voinkundal vanhemban opendajan. Kül'mkuspäi vodel 1971 N. Т. Omelin oli polkovnik varas.

Vodehesai 1985 radoi Moskvan aviacionnijan institutan voinkundal opendajan.

Eli Moskvas. Koli 29. elokud vodel 2001. Om pandud maha Moskvas Arm'anskijan kaumištol.

Pauklahjad

• Sovetskijan Sojuzan Geroi (16.10.1943);
• Leninan orden (16.10.1943);
• Rusttan Znamenin orden (5.08.1944);
• Aleksandr Nevskijan orden (13.09.1943);
• kaks’ Kodimaižen voinan I stepinin ordenad (21.02.1944; 11.03.1985);
• Kodimaižen voinan II stepinin ordenad (31.01.1943);
• Rusttan Tähthaižen orden (21.08.1953);
• medalid;
• amerikan «Arvostelusen legion» oficeran stepenin medal’ (1944).

Kanz

Ezmäine ak - Alla Sergejevna Omelina

Toine ak - Ariga Nikolajevna Omelina.

Mušt

• N. I. Omelinan modkuva om pandud Sovetskijan Sojuzan Gerojiden Galerejaha, mitte om avaitud vodel 1977 Karjalan pälidnas Petroskoiš.
• Venäman voin-istorine sebr om pannu muštlaudan Omelinan muštoks Padanoiden keskškolan pertile Medvežjegorskan agjas, kus hän openzihe.

Tenkirjutesed

• Мы врагу не давали пощады // Незабываемое. Воспоминания о Великой Отечественной войне. — Петрозаводск, 1974

Homaičendad

Literatur

• Власова М. Н. Знатный земляк Николай Омелин. — На рубеже, 1951, № 5, с. 43—50.
• Кондратьев Ф. От Сегозера до Вислы. (О Герое Советского Союза Н. Т. Омелине). — Петрозаводск, Госиздат КАССР, 1960. — 38 с.
• Кондратьев Ф. Елетозерский «котел»: [Очерк о Герое Совет. Союза Н. Т. Омелине] // Карелия. Годы. Люди: Сб. очерков. — Петрозаводск, 1967. — С. 168—175.
• Герои земли советской. — Петрозаводск: Карельское книжное издательство, 1968. — С. 187—200. — 367 с. — 20 000 экз.
• Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД «ПетроПресс», 2009. С. 320—464 с.: ил., карт. ISBN 978-5-8430-0125-4 (т. 2)

Tarkendused

• Nikolai Omelin  (рус.). Сайт «Герои страны».
• Из наградного листа Архивная копия от 4 keväz'kud 2016 на Wayback Machine.
• Фотоархив Архивная копия от 4 keväz'kud 2016 на Wayback Machine.
• Почётная грамота Герою-земляку Архивная копия от 4 keväz'kud 2016 на Wayback Machine.
• Почетный гражданин города Медвежьегорска.