Aleksei Afanasjev

Рувики-späi
Aleksei Nikolajevič Afanasjev
Aleksei Afanasjev.jpg
Sündundpäiv 2 (15) sügüz'kud 1916(1916-09-15)
Sündund sija Koikarad-külä, Mändusel'skan volost', Povencan ujezd, Oloncan gubernii Venäman imperii
Kolendpäiv 5. elokud 1968(1968-08-05) (51 vot)
Kolend sija Petroskoi, Karjalan ASSR, RSFSR, Sovetskii Sojuz
Rahvahuz’  SSSR
Voiskiden sugu TankistGSS
Služban voded 1939—1960
Služban nimi Sovetskii Sojuz, major
Čast' 58. gvardeiskan tankbrigad,
(8. gvardeiskan tankkorpus)
Ohjanzi tankan komandir
Torad/voinad Sovetsko-suomalaine voin (1939—1940)
Sur' Kodiman voin
Pauklahjad da premijad
Sovetskijan Sojuzan Geroi (22. 08. 1944)
Leninan orden Rusttan Tähthaižen orden Medal' «Vägestuses Germanijan päl Sures Kodiman voinas vozil 1941—1945» SU Medal Twenty Years of Victory in the Great Patriotic War 1941-1945 ribbon.svg
 Lebul vodelpäo 1960, kundaline rad, norišton voin-patriotine opendamine

Aleksei Nikolajevič Afanasjev (ven.: Алексе́й Никола́евич Афана́сьев, 2 [15.] sügüz'kud vodel 1916 — 5. elokud vodel 1968) — sovetskii oficer-tankist, Sovetsko-suomalaižen voinan (1939—1940) da Suren Kodiman voinan ühtnik, Suren Kodiman voinan aigan — 1. Belorussijan frontan 2. tankarmijan 8. gvardeiskan tankkorpusan 58. gvardeiskan tankbrigadan tankan komandir, gvardijan noremb leitenant, Sovetskijan Sojuzan Geroi (22. 08. 1944).[1]

Elostarin

Om sündunu 15. sügüz'kud vodel 1916 Koikarad-küläs nügüdläižes Kondopogan rajonas Karjalas, radnikan kanzas. Karjalaine.

Lopi augotižškolan kodiküläs, openzihe seičemevoččes školas Spasskaja Guba-küläs, sid' vozil 1934—1937 — tervhuden radtedokundal Petroskoiš. Vozil 1937-39 vedi radurokoid da likundurokoid Justozerskan seičemevoččes školas, sid' mehanikan Sunasplavstroi-organizacijas.

Sügüzel vodel 1939 Karjalan ASSRan Petrovskan raivojenkomat kucui händast Rusttaha armijaha.

Ühtni sovetsko-suomalaižehe voinaha vozil 1939—1940 kut mägisuksiden batal'jonan pulem'otčik.

Suren Kodiman voinan augotižespäi oli frontal. Politrukan varapämez' A. N. Afanasjev vojui Leningradan frontal, ühtni "Elon te" - sauvomižehe, oli bojiš, konz murtihe Leningradan blokadad. Vodel 1943 lopi norembiden lentenantoiden kursad, sid' vodel 1944 Kazanin tankučiliščan, i konz hän oli noremban leitenantan, händast pandihe tankan komandiraks 58. tankbrigadaha.

58. gvardijan tankbrigadan "М-4 А2"-tankan komandir (8. gvardijan tankkorpus, 2. gvardijan tankarmii, 1. Belorussijan front), kandidat VKP(b)-partijan ühtnikaks, gvardijan noremb leitenant Aleksei Afanasjev ozuti ičtaze bojiš Lüblin-lidnas (Pol'ša).

23. heinkud vodel 1944 hänen tank ezmäižen tuli lidnan keskusehe, lämoil da gusenicoil murenzi lujas äi vointehnikad da ambui äi vihanikoid, murenzi vihanikan kolonnad, a sid' anasti sildan da pidi sen kuni ei tulend pävägi. Bojan lopus gvardijan norembad leitenantad Aleksei Afanasjevad taci palatud tankaspäi vzrivaldal. Polttud da ranitud händast löuziba lidnan eläjad.

Pakites tankan komandirale Aleksei Afanasjevale Kodiman ülembaižen pauklahjan, komandovanii da soldatad luguba händast kolijaks.

Sovetskijan Sojuzan Ülembaižen Nevondišton prezidiuman käsköl 22. elokud vodel 1944 parahimas vointegoiden tegemižes frontal nemcoiden vihanikoiden vasthapäi, ozutades rohktud da geroizmad gvardijan norembad leitenantad Aleksei Afanasjevad surman jäl'ges pauklahjoitihe Sovetskijan Sojuzan Gerojan nimel.

No rohked oficer-tankist oli eläb. Jäl'ghe pit'käd tervehtoitandad gospitališ hän pörzihe armijaha. Kremliš hänele anttihe Leninan ordenan da "Kuldaine Tähthaine"-medalin (№ 7356).

VKP(b)-partijan ühtnik vodelpäi 1944.

Sügüzespäi vodelpäi 1944 oldes 2. Belorussijan frontan voiskiš gvardijan noremb leitenant Aleksei Afanasjev tegihe tankvzvodan komandiraks. Vojuides voinmašinal, mittušt lahjoičiba bambovan kolhozan radnikad, hän mäni Päivnouzman Prussijan da tuli gutleran Germanijan pälidnaha — Berlinaha.

24. heinkud vodel 1945 A. N. Afanasjev ühtni istoriližehe Vägestusen paradaha Rusttal avoinirdal Moskvas.

Jäl'ghe voinad A. N. Afanasjev služi oficeran Sovetskijan Armijan tankvoiskiš. Vodel 1951 lopi Korktan oficeran ičemänijan artillerijan školan.

Vodelpäi 1960 major A. N. Afanasjev — varas. Eli da radoi Karjalan pälidnas — Petroskoiš, aktivižesti ühtni partijan da kundaližehe eloho, norišton voin-patriotižehe kazvatamižehe.

Koli 5. elokud vodel 1968.

Pauklahjad

  • Sovetskijan Sojuzan Gerojan "Kuldaine Tähthaine"-medal'
  • Leninan orden
  • Rusttan Tähthaižen orden
  • Medalid, siš lugus:
    • Medal' "Vägestuses Germanijan päi Sures Kodiman voinas vozil 1941—1945"
    • "Vägestusen 20 vot Sures Kodiman voinas vozil 1941—1945"-jubileimedal'

Mušt

  • Om pandud maha Sulažmägen kaumištol Petroskoi-lidnas.
  • Girvas-küläs om ripputadud muštlaud.
  • A. N. Afanasjevan modkuva, kut i kaikiden 28. Sovetskijan Sojuzan Gerojoiden, — Karjalan poigiden da tütriden modkuvad, om pandud Sovetskijan Sojuzan Gerojoiden galerejaha, mitte oli avaitud vodel 1977 Karjalan pälidnas Petroskoiš Antikainenan da Rusttan irdoiden rajonas.
  • Gerojan muštoks Petroskoiš om nimitadud projezd "Kaskad"-eländkompleksas (Drevl'ankan mikrorajon).

Kacu mugažo

Homaičendad

  1. ↑ Radsija da voinnimi Sovetskijan Sojuzan Gerojan nimen andmižen aigan.

Literatur

  • Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
  • Созонов С. Г. В шеренге гвардейцев. [Герой Советского Союза А. Н. Афанасьев]. — Петрозаводск, Карел. кн. изд., 1962. — 71 с. с илл.; 1 л. портр
  • Герои земли советской. — Петрозаводск: Карельское книжное издательство, 1968. — С. 49—69. — 367 с. — 20 000 экз.
  • Гордиенко А. А. Всем смертям назло. — Петрозаводск: издательство «Карелия», 1969. — 79 с. — 30 000 экз.

Tarkendused

Om sadud "https://vep.ruwiki.ru/w/index.php?title=Aleksei_Afanasjev&oldid=509489"