Žukova Ol'ga Jurjevna

Рувики-späi
Ol'ga Žukova
ven.: Ольга Юрьевна Жукова
Ольга Юрьевна Жукова.jpg
Nimi: Jeršova
Sündundpäiv 19. tal'vkud 1978(1978-12-19)
Sündundsija:
Kolendpäiv: 31. vilukud 2023(2023-01-31) (44 года)
Kolendsija:
Rahvahuz' Sovetskii Sojuz→Venäma
Professijad: vepsän fol'kloran tundii, tedomez', runoilii
Mam Jeršova Svetlana Ivanovna
Erazvuitte Vepsän kul'tursebran ühtnik

Ol'ga Jurjevna Žukova (ven.: Ольга Юрьевна Жукова, 19. tal'vkud 1978, Kurb, Piterin agj — 31. vilukud 2023, Petroskoi) - vepsläine tedomez', runoilii, vepsläižen fol'kloran, sai- da mahapanendvoikuiden tundii, filologian tedokandidat (2009), Venäman tedoakademian Karjalan tedokeskusen Kelen, literaturan da istorian institutan noremb tedoradnik[1], Petroskoin universitetan filologian institutan docent, vepsän kelen opendai, Vepsän kul'tursebran ühtnik.

Elostarin

Ol'ga Žukova (neiččen Jeršova) sündui 19. tal'vkud vodel 1978 vepsläižes kanzas Kurb-küläs Podporožjen rajonas Piterin agjas. Hänen mamoi Svetlana Ivanovna Jeršova oli vepsän kelen da matematikan opendai Kurban školas, Vepsän kul'turan muzejan tegii. Ol'ga openzihe Kurban školas. Jäl'ghe školad openzihe Petroskoin universitetas, baltianmeren-suomalaižiden keliden da kul'turan tedokundal.

Vodel 2001 lopi Petroskoin universitetan. Vozil 2001—2023 radoi vepsän kelen opendajan Petroskoin universitetas (vodelpäi 2007 - kafedran vanhemb opendai, vodelpäi 2019 - filologian institutan, baltianmeren-suomalaižen filologian kafedran docent).

Vodel 2009 Ol'ga Žukova kirjuti lophusai kandidatan dissertacijan, miččen tem oli "Vepsläižiden voikuiden kelen erigoičused" (special'nost' 10.02.22 — Jevropan, Azian, Afrikan verhiden maiden rahvahiden, Amerikan da Avstralian aborigenoiden keled (vepsän kel')[2].

Vodelpäi 2001 — baltianmeren-suomalaižen filologian da kul'turan fakul'tetan, karjalan da vepsän kelen kafedran opendai, vodelpäi 2007 года - vanhemb opendai, vodelpäi 2019 - filologian institutan, baltianmeren-suomalaižen filologian kafedran docent.

Vozil 1999—2008 — oli vepsläižen Keväz'vezi-ansambl'an nevonik da ühtnik.

Vozil 2012—2023 — Venäman tedoakademian Karjalan tedokeskusen Kelen, literaturan da istorian institutan kel'tedosektoran noremb tedoradnik.

Jäl'ghe jügedad, pit'käd läžundad koli 31. vilukud vodel 2023 Petroskoiš[3].

Ol'ga Žukova oli Vepsän kul'tursebran aktivist. Hänen sarnad, sanutesed, pajod da runod vepsän kelel paindihe Kodima-lehteses da Kipinä-kulehteses, erazvuiččiš runokogomusiš, Verez tullei-al'manahas. Vodel 2011 tuli eloho Ol'ga Žukovan "Mäthudel"-runokirj. Siš om paindud vepsänkeližid runoid da pajoid lapsiden täht. Vodel 2017 hän pästi eloho "Itti-totti" - vepsläižen fol'kloran kogomusen lapsile, tekstoid kirjaha kerazi äi vozid vepsläižiš küliš. Vodel 2023 Ol'ga Žukovan muštoks Vepsän kul'tursebr pästi eloho "Ezmäine änik" - runo- da sarnoiden kogomuz lapsile[4].

Tedotöd

Ol'ga Žukova kirjuti enamba 40 tedotöd. Hän kirjuti runoid da sarnoid lapsile venän da vepsän kelel[5].

Pauklahjad

  • Karjalan man kul'turministerstvan kitändkirjeine (2009),
  • Karjalan man rahvahližen da regionaližen politikan kitändkirjeine (2020),
  • Venäman kundaližen palatan kitändkirjeine (2019),
  • Karjalan Valdkundan pämehen kitändkirjeine (2021),
  • Karjalan man parlamentan kitändkirjeine (2022).

Homaičendad

  1. ↑ Жукова Ольга Юрьевна. КарНЦ РАН. Дата обращения: 4 kül'mkud 2025.
  2. ↑ Языковые особенности вепсских обрядовых причитаний. Жукова Ольга Юрьевна. Дата обращения: 4 kül'mkud 2025.
  3. ↑ Vauged mušt. Ol'ga Žukovan polhe. Karjalan man igähižed rahvahad, Karjalan man Rahvahaline kirjišt. Дата обращения: 4 kül'mkud 2025.
  4. ↑ В Доме дружбы народов Республики Карелия презентовали книгу Ольги Жуковой «Ezmäine änik» («Первоцвет»). Дата обращения: 4 kül'mkud 2025.
  5. ↑ Ольга Жукова (Ершова). Портал национальных литератур. Дата обращения: 4 kül'mkud 2025.

Lähtked

Om sadud "https://vep.ruwiki.ru/w/index.php?title=Žukova_Ol%27ga_Jurjevna&oldid=528709"