Kaleig

Рувики-späi
Kodvdud kirjutez
Рыбрека
veps.: Kaleig, karj.: Kalajogi
Село Рыбрека Прионежский район Республика Карелия.jpg

61°16′54″ с. ш. 35°31′04″ в. д.GЯO

Valdkund

 Venäma

Venäman subjekt

Karjalan Valdkund

Municipaline rajon

Änižröun

Külä (posad)

Vepsläine Kaleig-külä

Istorii da geografii
Ezmäine johtutez

1496

Aigvö

UTC+3[d]

Eläjad
Eläjad

↘427[1] ristitud (2013)

Lugu-identifikatorad
Počtan indeks

185516

Код ОКАТО

86236000033

Код ОКТМО

86636443101

Номер в ГКГН

0167711

Kaleig (Россия)
Точка
Рыбрека
Точка
diskussii • redaktiruida

Kaleig (Kaleg, Kalajogi, Kalag' ; ven.: Рыбрека, karjalan kelel: Kalajogi, suomen kelel: Kalajoki)[2] om vepsläine posad (ven. село) Karjalan Valdkundas Änižröunas. Kalag’ om vanh vepsläine posad[3], kus enamb eläjid oma vepsläižed. Posad sijadase Änižen järven randal läz 100 kilometrad Petroskoi-lidnaspäi. Ezmäižed johtutesed posadas om tehtud vodel 1496[4].

Posadan nimi

Kalagen eläjad starinoičeba muga: ”Külän lopus jokseb jogi, konz-se amu neciš joges oli lujas äi kalad, sikš küläle anttihe mugoine nimi – Kalag’”. Amuižiš aigoišpäi Änižen järves i jogiš pütas kalad. Ümbri posadas seižub sur’ i čoma vihand mec. Kezal mecas voib kerata erazvuiččid marjoid, senid da babukoid. Sigä eläba erazvuiččed mecživatad: oravad, jänišad, reboid, kondjad, händikahad, mecsigad, hirbed, nädad i äjad toižed. Kezal posadas om lujas äi rahvast: ristitud tuleba kezapertihe lebaidamha, lapsil oma kezapästused. No tal’vel elo posadas kuti sambub. Kaik kezaeläjad ajaba tagaze lidnoihe.

Kiven saskelmine

Kalagen ma om tetab ičeze kivel – gabbro-diabazal. Kal’l’, mitte äi voz’sadoid oli tetab Ropejan eläjile, XIX voz’sadan augotišes äkkid kuti eläbzui. Kaks’ ristitud Jegorov i Šmidt Petroskoišpäi tuliba Kalagehe i pätiba kävutada hahkad kal’l’on kived sildoiden da pertiden sauvotuses, muštpachiden tegemižes. Hö taričiba külän eläjile radod – sada kived, mitte om heiden rindal. Ved’ sil aigal äjad vepsläižed mehed jätiba ičeze külid, miše ajada surihe lidnoihe ecmaha radod. A radod-se ei pidänd ecta-ki – se oli nenan tüves!

Vepsläižil mastaril ei olend eriližid radkaluid, miše sada kived. Hö radoiba jügedoiš radoloiš, oliba varun valdas. Hö vestiba kived hubin seižujiden puiden räusthiden al... Kezapäivin, konz seižui tün’ sä, vaumiž kivi vedetihe heboil pričalale, a jäl’ges laivoil – toižihe sijoihe. Mäniba voded... Kivivaumištand kazvoi...

Nügüd’ mö eläm jo toižes mirus. Kaik om vajehtanus: mi-se parembaha polhe, mi-se – hubembaha. Pidab sanuda, miše karjeroiden radolod parembzuiba. Vanhoiden radkaluiden sijaha tuli nügüd’aigaline tehnik: erazvuiččid mašinoid, stankoid... Pämehed holduba siš, miše heiden radnikad radaižiba hüviš oloiš.

Tämbei meiden küläs radab seičeme karjerad. Amuižiš aigoišpäi Kalages eläba kogonaižed dinastijad, kudambad sidoiba ičeze elod kivehe. Meiden külä eläb kiven abul, no ezmäi kaiked mugomiden ristituiden abul, kudambad äi vozid radaba sades kived.

Kaikuččen voden elokun lopus karjeroiden radnikoiden i kaiken külän eläjiden täht tehtas ”Kaivajan päiv”-praznik. Necil päiväl radnikoid kittäs heiden jügedas rados, sures panendas kivitegeližuden kehitoitandaha.

Kalarand-etnopark Kaleiges

Vepsän kelen opendamine školas

Posadas om Kalagen keskškol. Kalagen škol om üks’ Karjalan kaikid vanhembiš školišpäi. Aug sille oli pandud vodel 1805. Vozil 1980 zavodihe vepsän kelen da kul’turan udessündutamine. Ezmäi vepsän kelen urok oli fakul’tativan, vodelpäi 1989 zavottihe vedäda vepsän kelen urokoid.

Ezmäižen vepsän kelen opendajan oli Valentina Pavlovna Loginova, hän openzi lapsid vepsän kel’he kirillical. Jäl’ges, vodel 1990 radoi Nina Konstantinovna Rembot, hän radoi latinical. Mugažo Kalagen školas radoi Valentina Grigorjevna Agafonova. Vodelpäi 1992 Kalagen školha tuli radmaha vepsän kelen opendai Ol’ga Jevgenjevna Mironova. Vodel 1997 abuhu tuli uz’ vepsän kelen opendai Svetlana Nikolajevna Gotič, kudamb lopi Petroskoin üläopišton. Vodel 2010 Kalagen keskškolha tuliba radmaha kaks’ Petroskoin üläopišton Baltianmeren suomalaižiden keliden da kul’turan tedokundan pästnikad Maria Aleksandrovna Mironova i Julia Vasiljevna Aprodu. Nügüd’ Svetlana Nikolajevna Gotič om Kalagen keskškolan pämez’. Vepsän kelen opendai Kalagen keskškolas om Maria Aleksandrovna Mironova, päivkodiš – Julia Vasiljevna Aprodu.

Tetabad ristitud

Sovetskijan Sojuzan Gerojan Anna Lisicinan pert' Kalages

Kalages om Anna Lisicinan muštpacaz. Hän om Sovetskijan Sojuzan geroi, kudamb sündui neche posadaha. Anna Mihailovna Lisicina sündui 14. uhokud vodel 1922 Ozrei-külähä, Kalagehe. Hänen kanz oli sur’. Anna oli kaikid penemban lapsen. Hanen vanhembad oma Mihail Petrovič i Maria Ivanovna Lisicinad.

Školan jäl’ghe vodel 1938 Anna päzui opendamhas Piterihe Kul’turopištoho kirjišton hoitajaks.

Vodel 1941 kezakun 22. päiväl zavodihe voin. Ekzamenoiden jäl’ghe Anna oli oigetud radmaha Segežan kirjištoho. Vodel 1942 oli opendamine školas razvedčikoiden täht. Anna sai ezmäižen tegendan – sada tedoid vihanikoiš Šoutjärven agjas. Ühtes Maria Melentjevanke hö kaks’ nedalid saihe Ozrejahasai. Nece oli lujas varukaz azj. Lisicinad peitiba ičeze pertiš tedištelijoid. Anna Mihailovna Lisicina upsi Süvär’-joges. Maria üks’näze saihe ičhižidennoks tarbhaižiden tedoidenke. Neniš tegoiš A.M. Lisicinale i M.V. Melentjevale oli anttud Sovetskijan Sojuzan Urohiden arvnimed.

Sovetskijan Sojuzan Gerojan Anna Lisicinan pertiš Kalages rippub muštlaud

Külän tradicijad

Kalag’ om külä, kus kaitas vepsläižid tradicijoid da veroid, školas lapsid opetas vepsän kel’he, irdal voib kulištada eläbad vepsän paginad. Nügüd’ küläs äjan tehtas sen täht, miše kaita vepsän kul’turad, pohjoižpaginad, lapsid opetas navedimha ičeze kul’turad i kodimad.

Kerdan kahtes vodes küläs pidetas ”Vepsläine sarn”-festival’. Nece jo tuli hüväks tradicijaks Kalagen školas. Festivalile keradasoiš lapsed ičeze ohjandajidenke erazvuiččiš regionoišpäi, kus opetas vepsän kel’t. Scenal lapsed ozutaba sarnoid vepsän kelel. Ühtnikad tarkašti vaumičeba čomid sädoid, ozutaba hüvid vepsän kelen tedoid. Vodespäi vodhe Festival’ kazvab, keradab kaik enamba rahvast i sab äi hüvid arvostelusid.

Kaikuččes küläs pidetas ičeze praznikoid. Tämbei mö voim ülendadas sil, miše Kalages-ki om ičeze vepsläine külän praznik – ”Kalarand”. Se tehtas čomas sijas Änižen randal heinkus. Praznikale keradase äi külän eläjid, adivoid susedküläspäi, Petroskoišpäi. Kaikuččen voden praznikal om erazvuitte tem. Scenal ezineba lapsed školaspäi i lapsiden päivkodišpäi. Hö čomin kargaidaba i pajataba vepsän kelel. Mugažo praznikale tuleba erazvuiččed pajokollektivad Pertoskošpäi, Šoutjärvespäi.

Praznikan aigan kulub čoma vepsän kel’ i nece ihastoitab kaikid. Hüvä koncert, ilokahad vändod, mastar’-klassad, möndrivid, magukaz lem’ veresel il’mal tegeba ”Kalarand”-praznikad völ melentartuižembaks.

Pajokollektiv

Vepsläine Pihläine-ansambl' Kaleiges

Ei muga amu, keväz’kus vodel 2018 Kalages sädihe ičeze ”Pihläine”-folklorkollektiv. Se ihastoitab kodikülän eläjid ičeze pajoil i om päühtnik kaikil praznikoil, azjtegoil, vastusil, koncertoil, miččid tehtas Kalages. ”Pihläine”-folklorkollektivad kuctas toižihe-ki külihe ezitamha praznikoil.

Heiden repertuaraha mülüba pajod kut venän, muga vepsän-ki kelel. Kollektivas om kahesa mest. Kaikid heid ühtenzoitab armastuz pajoho, taht kaita ičeze rahvahan kul’turad, tradicijoid i antta niid toižile sugupol’vile.

Eläjad

Vodel 2000 Kaleigan eläjiden lugu oli 639 ristitud, enamb 58% eläjid — vepsläižed. Kaikiš suremb posadan ristituiden lugumär oli 932 eläjad vodel 1989. Ortodoksižen hristanuskondan pühän Varlaam Hutinalaižen jumalanpert' oli sauvdud vodel 1693, kadoi[5].

Melentartuisijad

Om kaitud «Mstiteli» — Kuz'ma Petrovič Kočerinan (1905—1942) da Pavel Spiridonovič Man'kinan (1902—1942) otr'adan partizanoiden kaum, hö oli amptud suomalaižil voinmehil okkupacijan aigan vodel 1942[6].

Posadas vodel 1959 om pandud muštpacaz Sovetskijan Sojuzan gerojale Anna Lisicinale, hän oli rodn'us Ozrei-derüunas da eli tägä.

Fotokuvad

  • Pert' Rudnaja-irdal

    Pert' Rudnaja-irdal

  • «Pihläine»-sömlauk

    «Pihläine»-sömlauk

  • Sovetskijan Sojuzan Änižen rudoupravlenijan muštpacaz

    Sovetskijan Sojuzan Änižen rudoupravlenijan muštpacaz

  • Teznam

    Teznam

Homaičendad

  1. ↑ Численность населения в разрезе сельских населённых пунктов Республики Карелия по состоянию на 1 января 2013 года. Дата обращения: 3 vilukud 2015. Архивировано 7 uhokud 2016 года.
  2. Муллонен И. И. Вепсские этнонимы:история и современность // История и традиционная культура народов Карелии / научный редактор докт. ист. наук И. Ю. Винокурова. — Петрозаводск: КарНЦ РАН, 2018. — С. 44—57. — 278 с. — ISBN 978-5-9274-0799-6.
  3. ↑ Объекты культурного наследия на территории Рыборецкого вепсского сельского поселения. Дата обращения: 8 tal'vkud 2013. Архивировано 12 tal'vkud 2013 года.
  4. ↑ Календарь знаменательных дат Карелии — декабрь 2021 года
  5. ↑ Церковь Варлаама Хутынского. Дата обращения: 13 sügüz'kud 2015. Архивировано 27 vilukud 2017 года.
  6. ↑ Великая Отечественная война в Карелии: памятники и памятные места. — Петрозаводск, 2015. — 334 с.: ил.

Literatur

  • Костин И. А. Каменных дел мастера. — Петрозаводск, 1977
  • Из истории рыборецкой школы // «Карелия». 1999. 1 января
  • Литвин, А. С. Рыбрека / А. С. Литвин // Карелия : энциклопедия. В 3 т. Т. 3. Р—Я. — Петрозаводск, 2011. — С. 51.

Tarkendused

NoFonti.svg {{{text}}}
Om sadud "https://vep.ruwiki.ru/w/index.php?title=Kaleig&oldid=204528"