Ajamiden radnikan päiv
| Ajamiden radnikan päiv | |
|---|---|
 | |
| Päiv | 20. kül'mkud |
Ajamiden radnikan päiv (ven.: День работника транспорта) — ajamiden erazvuiččiden erištusiden radnikoiden professionaline praznik, mitte praznuitas Venämal 20. kül'mkud[1][2]. Se oli vahvištoittud Venäman ajamiden ministerstvan käskön mödhe vodel 2020[3].
Käsk № 300 "Professionaližen Ajamiden radnikan päiv-praznikan tegemižes" oli allekirjutadud Venäman ajamiden ministerstvas 10. elokud vodel 2020 Venäman valdmehišton pämehen Mihail Mišustinan[1][4] käskön mödhe[5]. Ende ajamiden erazvuiččiden erištusiden radnikad praznuičiba vaiše mugoižid praznikoid kut: Raudtenradnikan päiväd, Aviacijan radnikan päiväd, Meri- da jogilaivišton radnikoiden päiväd, Avtomobilin vedäjan päiväd[6], no hö äi kerdoid kirjutiba Ajamiden ministerstvaha i pakičiba tehta erilišt praznikpäiväd ajamiden radnikoiden täht[6].
Päivän valičend
Praznikan päivmär oli valitud ei muite, necil päiväl vodel 1809 Aleksandr I sädi ezmäšt Venämal valdkundališt ohjanduzazjmehištod ajamiden erištuses — Vezi- da ma-ajamiden ohjanduz, a mugažo raudteninžineroiden korpus i sihe mülüi Piterin valdkundaline ühtenzoituzteiden universitet. Nece ohjanduzazjmehišt pidi vastust erazvuiččiš ajamiden roduiš. Sihesai Venämal oli vaiše Venälaižen imperijan veziajamiden departament. Möhemba Aleksandr I sätud Venälaižes imperijas organizacijoiden pohjal vodel 1865 oli avaitud Venäman ühtenzoituzteiden ministerstv[1][4].
Ajamiden raderištusen da sen professionaližen praznikan znamoičend
Andmusiden mödhe vodeks 2020 Venämal om enamb 400 ekonomikan tegendraderištust da tegetont raderištust, miččiden rad om sidotud ajamiden sistemanke. Ajamiden raderištuses sil-žo vodel radoi enamba 4 millionad mest[7], kudambiden täht tehtihe ičeze professionaline praznik[5][8]. Ristituiden keskes, ked praznuičeba necil päiväl praznikad, oma tenerištusen radnikad, meri- da jogilaivišton merimehed, raudteradnikad, metron da il'majamiden radnikad, vedäjad, a mugažo toižed neciš sistemas radajad ristitud[1].
Melentartuižed faktad
Praznikan tegemižen vodel Venäman bank pästi eloho "Ajamiden radnik"-muštmonetan[9][10].
Monet pästtihe "Radon mez'"-serijas, sen arv oli 10 rubl'ad, tiraž oli million monetad[9]. Monet oli kalliž keradajiden täht.
Aigemba Venäman bank mugažo pästi jubileimonetoid, miččed oli sidotud ajamiden muštpäividenke — "100 vot Transsibirin pätele", "40 vot Baikalan-Amuran päten tegendan augotišespäi" i toižed[9][11].
Homaičendad
- ↑ 1 2 3 4 20 ноября – главный профессиональный праздник транспортников. mintrans.gov.ru. Дата обращения: 16 redukud 2025.
- ↑ В России появится День работника транспорта. РБК. Дата обращения: 16 redukud 2025.
- ↑ Приказ Министерства транспорта Российской Федерации от 10.08.2020 № 300 "Об установлении профессионального праздника - Дня работника транспорта". Официальный портал правовой информации РФ. Дата обращения: 16 redukud 2025.
- ↑ 1 2 В России отмечается День работника транспорта. vzsar.ru. Дата обращения: 16 redukud 2025.
- ↑ 1 2 В России появился новый праздник – День работника транспорта. ФКУ «Росдормониторинг». Дата обращения: 20 redukud 2025.
- ↑ 1 2 РЖД Транспортная безопасность. Награждение сотрудников. rzd-tb.ru. Дата обращения: 16 redukud 2025.
- ↑ 20 ноября - День работника транспорта. rudnya-tribuna.ru. Дата обращения: 16 redukud 2025.
- ↑ В России отмечается день работника транспорта. Газета «Караван Ярмарка». Дата обращения: 16 redukud 2025.
- ↑ 1 2 3 Выпущена в обращение памятная монета «Работник транспортной сферы». mintrans.gov.ru. Дата обращения: 16 redukud 2025.
- ↑ Работник транспортной сферы | Банк России. cbr.ru. Дата обращения: 16 redukud 2025.
- ↑ Серебро Ивана Грозного и монеты Римской империи. Где найти коллекционные артефакты в Москве. Ведомости.Город. Дата обращения: 16 redukud 2025.
Lähtked
Venäman professionaližed praznikad | |
|---|---|
| |
