Arheologan päiv
| Arheologan päiv | |
 Arheologad radon aigan | |
| Tip |
Professionaline praznik |
|---|---|
| Znamoičend |
homaita arheologoiden panend istorijan kal'huden oppindaha da kaičendaha |
| Praznuitas |
kaikuččen voden |
| Päiv |
15. elokud |
Arheologan päiv (ven.: Де́нь архео́лога) — Venäman, Belorussijan da Kazahstanan arheologoiden oficialitoi professionaline praznik[1]. Praznuitas 15. elokud. Tobjimalaz necil päiväl tehtas «omištamine arheologoikš».
Praznik ozutab, kut om tärged oppida da kaita endevanhoid muštpachid, mugažo tehta panendad arheologijan radho da rahvahan kul'turkal'hudehe[2].
Praznikan sündundan istorii
Kacmata toižihe professionaližihe praznikoihe Arheologan päiv ei ole oficialine. Se sündui ilman valdkundaližeta käsköta. Praznikan sündumižes om äi starinoid, ühten miččišpäi sanui Venäman tedoakademijan akademik Valentin Janin:
Konz-se, 70 vot tagaze, völ edel voinad, Novgorodas tehtihe kaivandradod. Arheologad tahtoiba praznikad, hö tuliba tedištuzmatkan pämehennoks Artemii Arcihovskijannoks da sanuiba: «Tämbei om sur' praznik, pidab praznuita». — «А mitte?» — «Ka Bucefalan, Aleksandr Makedonskijan hebon sündundpäiv!» Naku praznuitihe, kut tariž. А sid' unohtihe, ken oli praznikan värnik, da zavottihe praznuita Arheologan päiväd
Toižen versijan mödhe praznikan tradicii tuli 40-50-voziden tedištuzmatkaspäi, konz sen pämehel arheologal Tatjana Passekal oli sündundpäiv 15. elokud. Sikš ku nece tedištuzmatk toi äi uzid radnikoid, ka voib todeks sanuda, miše nece tradicii om aktualine kaiktäli[1][3].
Praznikan tradicijad
Arheologan päiv praznuitas kezal, äjad vastaba sidä tedištuzmatkoiš. Necil päiväl paksus tehtas omištamine arheologoikš, ked ezmäižen kerdan ajaba tedištuzmatkaha. Muzejoiš avaitas ozutelused, miččed om omištadud arheologijale, tehtas ekskursijad muštpachiden da kaivandsijoiden mödhe. Necil päiväl tehtas erazvuiččiden tedištuzmatkoiden prezentacijad, konferencijad da simpoziumad.
Vodel 2024 praznikaigan Moskvan arheologijan muzei tegi erazvuiččid interaktivižid programmoid, miččed oli omištadud necile azjale. Adivod voiba tehta kaivandoid, tehta kul'turalandusen modelin da kacta todesižed endevanhad tehmused[4]. Mugažo 15. elokud «Vanh Ladoga»-muzejas Volhovskan rajonas Piterin agjas tehtihe suren praznikan Arheologan päiväl: azjtegon tegijad sanuiba, miše kaikutte adiv voi iče olda arheologan necil päiväl[5].
Homaičendad
- ↑ 1,0 1,1 День археолога в России. РИА Новости (15 elokud 2022). Дата обращения: 3 heinkud 2024.
- ↑ В России отмечается День археолога. Южно-Уральский государственный университет (15 elokud 2023). Дата обращения: 3 heinkud 2024.
- ↑ Романтики большой науки: о Дне археолога. radiosputnik.ru. Дата обращения: 3 heinkud 2024.
- ↑ Программы ко Дню археолога. Музей Москвы. Дата обращения: 3 heinkud 2024.
- ↑ Раскопки прошлого: Отмечаем День археолога – 2024. life.ru. Дата обращения: 3 heinkud 2024.