Karjalan frontan muzei

Рувики-späi
Karjalan frontan muzei
Музей Карельского фронта.jpg
Augonpanendan päiv 2020
Olendsija

 Karjala

 Venäma
Adres 186000, Karjalan Valdkund, Belomorsk, Bankovskaja-ird, 26
Pämez' Sergei Jurjevič Koriganov
Sait kareliamuseum.ru/o-muzee…

Karjalan frontan muzei ven.: Музей Карельского фронта — muzei om omištadud frontan istorijale. Se sijadase Karjalan Belomorsk-lidnas, enččen školan sauvotuses, kus vozil 1941—1944 sigä oli Karjalan frontan štab. Nece om üks' Belomorskan ezmäižišpäi kirpičpertišpäi, mitte oli saudud voziden 1930 lopus i om kul'turjäl'gestusen objekt regionaližel znamoičendal[1][2][3]. Muzei om sätud vodel 2020.

Vodel 2025 Karjalan frontan muzei oli üksjaine Venämal, mitte om omištadud frontan istorijale. Om Karjalan rahvahaližen muzejan filial.

Istorii

Idei tehta Karjalan frontan muzejan tuli rahvazkundale da Belomorskan rajonan veteranoiden nevondištole. Vodel 2017 tomotusen tugezi Venäman prezident Vladimir Putin i Valdkundaline komissii Karjalan 100-voččen jubilejan praznuičendan mödhe[1]. Federaližen programman abul muzejan pert' oli udištadud.

Karjalan frontan muzei oli avaitud päiväl, konz Karjala oli päzutadud vihanikoišpäi — 30. sügüz'kud vodel 2020.

Ekspozicii

Päekspozicii om muzejan toižel žirul, kümnes zalas, miččed sijadase geografižen principan mödhe — Karjalan süvespäi pohjoižehe Zapol'arjehesai: Olonec-lidnaspäi Ribačii-nemehesai (ven.) (vep.[2].

Zal № 1 "Voinohjandajan radhonuz" om fotokuviden abul udištadud frontan štaban voinohjandajan radhonuz. Sigä voib tedištada ezi-istorijas da Suren Kodiman voinan augotišes, Karjalan frontan voinpämehes Valerian Frolovas vozil 1941—1944, Karjalaiž-Suomalaižen SSRan kommunistižen partijan päkomitetan ezmäižes sekretariš, Karjalan frontan Voinnevondišton ühtnikas Gennadii Kuprojanovas.

Zal № 2 "Oloncan oigenduz" starinoičeb aigtegoiš, miččed oliba voinoperacijoiden aigan Suvi-Karjalas i Pohjoižes Priladožjes (ven.) (vep..

Zal № 3 "Petroskoin oigenduz" om omištadud voden 1941 polestusele i Petroskoin pästandale vihanikoišpäi vodel 1944.

Zalas № 4 "Konclagerid" om ezitadud ekspozicii, mitte om omištadud konclagerile, miččed oliba voinan aigan Karjalan okkupiruitud sijal.

Zal № 5 "Medvežjegorskan oigenduz" starinoičeb vointoriš vozil 1941—1942, Medvežjegorskan polestuses.

Zal № 6 "Karjalan frontan til" starinoičeb elos Karjalan da Zapol'arjen sijoil, miččed ei olend okkupiruitud. Pähomaičuz om anttud tragižele aigtegole — sovetskijan gospitalin murendaha Petrovskii Jam-küläs.

Zal № 7 "Pohjoiž-Karjala i Zapol'arje" ozutab vointorid da aigtegoid Karjalan frontan edahaižel oiktal flangal. Zalas om ozutadud germanialaižen jeger'an makodaine i kut üks'hengižed abutiba Lend-liz-programman mödhe.

Zal № 8 "Petsamo-Kirkenessan operacii" om omištadud Rusttan armijan jäl'gmäižele tacindoperacijale Pohjoižes. Necen operacijan aigan oli päzutadud Sovetskoje Zapol'arje i Pohjoine Norvegii.

Zal № 9 "Vägestuz" starinoičeb Karjalan frontan istorijan lopetapas, Suren Kodiman voinan lopindas i Vägestusen Paradas Rusttal avoirdal.

Zalas № 10 "Karjalan frontan Gerojiden kujo" om ezitadud Sovetskijan Sojuzan Gerojiden da kaikiden stepeniden Tetabuden ordenan kavaleroiden modkuvad, a mugažo Karjalan frontal kolijoiden saldatoiden nimed[4].

Muzejan ekspozicijan ližadab čomenzoittud tulend da irdozuteluzsija. Sigä kacujad voiba nägištada azegid, miččid kävutadihe Suren Kodiman voinan aigan, raudbetonankaičuztahod, miččed letihe rindal frontan štabanke vodel 1943.

Keradamišt

Muzejan ekspozicijas om enamb 1200 kalud[2]. Niiden keskes oma voinvoziden artefaktad, familijan kal'huded, voinznamoiden tarkad kopijad, Rusttan armijan saldatoiden da suomalaižen voinvägiden formiden da ambuzkaluiden ozutesed, kalud, miččid kävutadihe jogapäiväižes elos, azjbumagad da fotomaterialad[5].

Erased kalud oma unikaližed. Ozutesikš, ezmäižes zalas rindal Karjalan frontan voinpämehenke Valerian Frolovan figuranke stolal om germanialaine viritim. General osti sen Ispanijas rahvahaližen voinan aigan.

Suomalaine velokezr — üks' pojav kaičese venälaižes muzejas, no mugošt ei ole Venäman toižiš muzejiš.

Üks' melentartuižišpäi kaluišpäi om "proletarskijan revol'ucijan igähine kalendar'", se kožub hot' miččen taht voden täht[6].

Pert'

Karjalan frontan muzei om Belomorskan pertiš, mitte vozil 1941—1944 oli Karjalan frontan štab. Nece om üks' Belomorskan ezmäižišpäi kirpičpertišpäi, mitte oli saudud voziden 1930 lopus raudteškolan täht.

Vodel 1987 pert' oli vahvištoittud Karjalan kul'turjäl'gestusen objektaks regionaližel znamoičendal[7].

Fasadal, mitte kacub Bankovskaja-irdale, om muštlaudaine gabbro-diabazaspäi mustal mujul. Sil om tehtud kirjutez: "Neciš pertiš Suren Kodiman voinan aigan oli Karjalan frontan štab"[5].

Kaik kahesa zalad om ühtenzoittud pit'käl pertedesel. Seinid čomenzoitaba sured sinivauvhad bannerad, miččil oma Karjalan frontan gerojiden kuvad, nimed da om kuvatud lendajad kurged.

Rad

Muzei kucub adivoid mugoižile ekskursijoile:

  • Tundištoituzekskursii muzejan kaikenaigaižedme ekspozicijadme;
  • Tematine ekskursii muzejan kaikenaigaižedme ekspozicijadme (pidab kirjutadas aigvodhe);
  • Tundištoituzekskursii muzejan kaikenaigaižedme ekspozicijadme anglian kelel (pidab kirjutadas aigvodhe)[8].

Muzei tegeb lähtendopenduzčasuid da lekcijoid, avtobusekskursijoid. Adivoiden täht vaumištadihe muzeiprogrammad, interaktivižed openduzčasud, kvestad da mastar'-klassad[8].

Muzei kaiken aigan vaumičeb aigozutelusid, miččiden keskes oma:

  • ven.: «В тылу врага: партизанское движение на Карельском фронте»;
  • ven.: «И к штыку приравнять перо»;
  • ven.: «Неизвестный Беломорск»;
  • ven.: «От бомб и газа: бункеры Беломорска»;
  • ven.: «Советский Новый год»;
  • ven.: «Эхо войны»[9].

Radon aigmäričez

Karjalan frontan muzei radab tožnargespäi pühäpäivähasai časuil 10:00—18:00, kezal (semendkun 13. päiväspäi sügüz'kun 15. päivähasai) — joga päivän[8].

Galerei

  • Zal №1 "Voinohjandajan radhonuz"

    Zal №1 "Voinohjandajan radhonuz"

  • Zal №4 "Konclagerid"

    Zal №4 "Konclagerid"

  • Zal №10 "Karjalan frontan Gerojiden kujo"

    Zal №10 "Karjalan frontan Gerojiden kujo"

Homaičendad

  1. ↑ 1 2 История создания. kareliamuseum.ru. Дата обращения: 26 vilukud 2026.
  2. ↑ 1 2 3 Музей Карельского фронта. kareliamuseum.ru. Дата обращения: 26 vilukud 2026.
  3. ↑ Музей Карельского фронта. rk.karelia.ru. Дата обращения: 26 vilukud 2026.
  4. ↑ Экспозиция. kareliamuseum.ru. Дата обращения: 26 vilukud 2026.
  5. ↑ 1 2 Здание, в котором в 1941—1944 гг. размещался штаб Карельского фронта. monuments.karelia.ru. Дата обращения: 26 vilukud 2026.
  6. ↑ Почему надо обязательно посетить Музей Карельского фронта. Дата обращения: 8 uhokud 2026.
  7. ↑ Екатерина Коломиец. Музей Карельского фронта появится в Карелии. karelinform.ru. Дата обращения: 26 vilukud 2026.
  8. ↑ 1 2 3 Посетителям. kareliamuseum.ru. Дата обращения: 26 vilukud 2029.
  9. ↑ Архив выставок. kareliamuseum.ru. Дата обращения: 26 vilukud 2026.

Lähtked

Om sadud "https://vep.ruwiki.ru/w/index.php?title=Karjalan_frontan_muzei&oldid=529234"