Kurgiden aig (kirj)

Рувики-späi
Kurgiden aig
Время журавлей
Николай Абрамов. Время журавлей 1999.jpg
Avtor Nikolai Abramov
Žanr runod
Originalan kel' Vepsän kel'
Original om paindud 1999
Paindai Periodika
Lehtpol't 64
Носитель Kirj
ISBN 5-88170-023-6

Kurgiden aig (ven.: Время журавлей) — runokirj vepsän kelel, avtor - Nikolai Abramov, toimitai - Nina Zaiceva, pirdai - Margarita Jufa. Kirj läksi eloho Petroskoiš Periodika paindištos vodel 1999. Runokirj om paindud suomalaižen literaturan da M.A. Kastrenin sebroiden abul. Kirjas om 64 lehtpol't. Kirjan tiraž om 1000 ekzempl'arad.

Kurgiden aig om vepsläižen runoilijan Nikolai Abramovan toine runokogomuz', mitte läksi eloho vepsän kelel[1]. Nikolai zavodi kirjutada runoid vepsän kelel, konz hänele täudui 30 vot. Ezmäks nece rad avtoran sanoiden mödhe mäni jügedas, sid' kebnemb tegihe. Konz Nikolajale täudui 33 vot, läksi eloho hänen ezmäine Koumekümne koume-runokogomuz', sid' läksi eloho nece kirj[2].

Kurgiden aig-runokogomuz mugažo kaitas Valdkundaližen V. Visockijan kul'turkeskuses-muzejas, miččen nimi om "Visockijan pert' Tagankal"[3].

Runokogomusen kändmižen venän kel'he tegi Marat Tarasov[4].

Südäimišt

Kirj jagase kahthe palaha, toižen palan nimi om "Runod", toižen - "Kändmižed". Udes kirjas runoilii Nikolai Abramov kirjutab sen polhe, mi om lähemba hänen hengele da südäimele: kodimas, londuses, armastuses, ristitun ozas. Runoiden südäimištos om vepsän rahvahan tragedii, konz rahvahal oli ottud oiktuz' mamankel'he, mitte oli ajatud "perspektivitomiš külišpäi" da tehtud koditomikš ristituikš, ked eciba elod verhiš sijoiš[5].

Kirjaha ezmäižen kerdan om pandud uzid kändmižid vepsän kel'he venäkelespäi. Tägä oma Aleksandr Puškinan, Sergei Jeseninan (ven.) (vep., Boris Pasternakan, Nikolai Rubcovan, Vladimir Visockijan da Jevgenii Jevtušenkon kändmižed. Abramovan kändmižed ozutaba, miše vepsän-ki keles täudub čomid da süvid sanoid, kelenvändoid ezitamha venälašt literaturad vepsläižiden täht ičemoi kelel[2].

Kirjutadud Abramovan runod ozutaba, mitte bohat da čoma om vepsän kel', kut äjan sil voib sanuda. Lugii nägeb toštmatomad süvüt. Äjad hänen runod paindihe openduzkirjoiš, Kodima-lehteses, Verez tullei-al'manahas, Kipinä-kulehteses.

Kurgiden aig om omištadud runoilijan mamale Maria Aleksejevna Abramovale da tatale Viktor Terentjevičale. Kaikuččes kirjas Nikolai Abramov heiti paindud ven.: «Журавлиное время»-kändmišt venän kel'he da ülähäks iče kirjuti ven.: «Время журавлей». Voib sanuda, miše kaikuččes kirjas om Nikolajan allekirjutuz. No todeks sanuda Nikolai vajehti kirjan südäimišton pämel't, se tegihe filosofižeks, süväks da opalahižeks[2][6].

Kritik

Kurgiden aig-runokogomusen prezentacijal Petroskoiš üks' tetab runoilii da kändai Marat Tarasov (ven.) (vep. sanui, miše Abramov om lahjakaz runoilii, sikš hänespäi lähteb vepsläižen rahvahaližen literaturan klassik. Abramov mahtab kirjutada elon primetoiš, mugažo voib ozutada südäinmirud kaikiden jugedusidenke da vastkaroičidenke. Ičeze ezituses hän homaiči, miše erased Abramovan runod oma lujas tradicionaližed, niile ei täudu midä-se ut[5].

Avtoras

Nikolai Abramov (24. vilukud 1961 — 23. vilukud 2016) — vepsläine da venälaine kirjutai, runoilii, lehtmez', literaturan kändai, Karjalan arvostadud kul'turrandik, Karjalan rahvahaline kirjutai (2017)[7].

N. Abramov sündui da kazvoi vepsläižes Ladv-küläs, Podporožjen rajonas, Piterin agjas. Hänel oma vepsläižed jured maman da tatan polespäi. Vodel 1978 N. Abramov lopi Vidl-külän keskškolan. Openzihe Leningradan topografižes tehnikumas, sid' Petroskoin valdkundaližes universitetas, Karjalan valdkundaližes pedagogižes institutas.

Ičeze elos hän radoi äjiš sijoiš. Oli gruzčikan, sovhozan radnikan, ramščikan piloramal, külälaižen kul'turpertin pämehen, geodezijan oppindmatkan radnikan, fototegijan, "Svirskie ogni" - rajonlehtesen toimitajan, "Suomalaiž-ugrilaižen lehtesen" - toimitajan, "Kto o čom" - ripmatoman lehtesen toimitajan, vepsläižen Kodima (veps.: Родная земля)-lehtesen toimitajan da pätoimitajan. Jäl'gmäižed voded radoi Karjalan rahvahaližes kirjištos[8].

Vodel 1998 Abramov oli Venäman kirjutajiden sebran, Venäman lehtmehiden sebran da Karjalan lehtmehiden sebran ühtnikan[9].

Hän eli lühüdan elon, no ehti kirjutada runoid vepsän da venän kelel, pästi eloho äi runokogomusid. N. Abramov kändi Puškinan, Jeseninan, Pasternakan, Rubcovan, Visockijan, Jevtušenkon runoid vepsän kel'he. Hänen runod paindihe erazvuiččiš runokogomusiš, antologijoiš, kätihe vepsän kelespäi venän, suomen, estonian, švecian, francian, norvegian, vengrian da Venäman suomalaiž-ugrilaižiden rahvahiden kelihe. Paiči literaturad Nikolai Abramovale oli mel'he professionaline fotokuva. Hän ühtni fil'moiden sjomkoihe.

Homaičendad

  1. ↑ Читает Николай Абрамов... Электронная библиотека авторов Карелии. Дата обращения: 26 tal'vkud 2025.
  2. ↑ 1 2 3 Николай Абрамов. Kurgiden aig. — Петрозаводск: Периодика, 1999. — С. 2. — 64 с. — 1000 экз. — ISBN 5-88170-023-6.
  3. ↑ Николай Абрамов: «Может и был я не зря?» Дата обращения: 26 tal'vkud 2025.
  4. ↑ Время журавлей. Дата обращения: 26 tal'vkud 2025.
  5. ↑ 1 2 Юрий Башнин. Обречен быть классиком. gazeta-licey.ru. Дата обращения: 26 tal'vkud 2025.
  6. ↑ На Дне памяти Николая Абрамова 24.07.2016 г. продавался сборник стихов Н. Абрамова «Kurgiden aig”. Дата обращения: 26 tal'vkud 2025.
  7. ↑ Вепсский поэт Николай Абрамов награждён посмертно. Дата обращения: 26 tal'vkud 2025.
  8. ↑ Памяти вепсского поэта Николая Абрамова. Республика Карелия - Медиаресурсы - Ресурсы - Финно-угорские библиотеки России. fulr.karelia.ru. Дата обращения: 26 tal'vkud 2025.
  9. ↑ Абрамов, Николай Викторович. Интерактивный атлас коренных малочисленных народов Севера, Сибири и Дальнего Востока: языки и культуры. Дата обращения: 26 tal'vkud 2025.

Lähtked

Om sadud "https://vep.ruwiki.ru/w/index.php?title=Kurgiden_aig_(kirj)&oldid=466499"