Koumekümne koume (kirj)

Рувики-späi
Koumekümne koume
Тридцать три
Сборник стихов Николая Абрамова "Тридцать три" ("Koumekümne koume") 1994.jpg
Avtor Nikolai Abramov
Žanr runod
Originalan kel' Vepsän kel'
Original om paindud 1994
Paindai Karjala
Lehtpol't 54
Носитель Kirj
ISBN 5-7545-0662-7

Koumekümne koume (ven.: Тридцать три) — runokirj vepsän kelel, avtor - Nikolai Abramov, toimitajad - Nina Zaiceva, M. Hütti, tehnine redaktor - E. Ivanova, pirdai - Irina Kart. Kirj läksi eloho Petroskoiš vodel 1994. Runokirj om paindud suomalaižen M.A. Kastrenin sebran abul. Kirjas om 54 lehtpol't. Kirjan tiraž om 1000 ekzempl'arad.

Koumekümne koume om ezmäine Nikolai Abramovan runokirj, mitte läksi eloho ičemoi kelel[1]. Nikolai zavodi kirjutada runoid vepsän kelel, konz hänele täudui 30 vot. Ezmäks nece rad avtoran sanoiden mödhe mäni jügedas, sid' kebnemb tegihe. Konz Nikolajale täudui 33 vot, läksi eloho nece runokirj. Sikš nimi-ki kirjale - "Koumekümne koume"[2].

Südäimišt

Kirj jagase kahthe palaha, miččen nimi om "Kodiman poig" da "Kaivoine" (runod lapsile). Avtor kirjutab nügüdläižen ristitun dramatižen elon, londusen čomuden, armastusen polhe. Hän ecib vastusid küzundoihe, mikš ristitud lähteda da pördasoiš, min täht eläba, mitte sido om männuden da nügüdläižen aigan, mujun da melen, londusen da civilizacijan keskes[2].

Kirjutadud Abramovan runod ozutaba, mitte bohat da čoma om vepsän kel', kut äjan sil voib sanuda. Lugii nägeb toštmatomad süvüt. Äjad hänen runod paindihe openduzkirjoiš, Kodima-lehteses, Verez tullei-al'manahas, Kipinä-kulehteses.

Avtor

Nikolai Abramov (24. vilukud 1961 — 23. vilukud 2016) — vepsläine da venälaine kirjutai, runoilii, lehtmez', literaturan kändai, Karjalan arvostadud kul'turrandik, Karjalan rahvahaline kirjutai (2017)[3].

Sündui da kazvoi vepsläižes Ladv-küläs, Podporožjen rajonas, Piterin agjas. Vepsläine.

Vodel 1978 lopi Vidl-külän keskškolan. Openzihe Leningradan topografižes tehnikumas, sid' Petroskoin valdkundaližes universitetas, Karjalan valdkundaližes pedagogižes institutas. Radoi gruzčikan, oli sovhozan radnikan, ramščikan piloramal, külälaižen kul'turpertin pämehen, geodezijan oppindmatkan radnikan, fototegijan, "Svirskie ogni" - rajonlehtesen toimitajan, "Suomalaiž-ugrilaižen lehtesen" - toimitajan, "Kto o čom" - ripmatoman lehtesen toimitajan, vepsläižen Kodima (veps.: Родная земля)-lehtesen toimitajan da pätoimitajan. Jäl'gmäižed voded Nikolai radoi Karjalan rahvahaližes kirjištos[4].

Vodel 1998 Abramov tegihe Venäman kirjutajiden sebran, vides vodes päliči Venäman lehtmehiden sebran, a sid' Karjalan lehtmehiden sebran ühtnikaks[5].

Hän kirjuti runoid ičemoi kelel, pästi eloho erazvuiččid runokogomusid vepsän kelel da venän kelel. Kändi Puškinan, Jeseninan, Pasternakan, Rubcovan, Visockijan, Jevtušenkon runoid vepsän kel'he. Nikolai Abramovan runoid paindihe erazvuiččiš runokogomusiš, antologijoiš, kätihe vepsän kelespäi venän, suomen, estonian, švecian, francian, norvegian, vengrian da Venäman suomalaiž-ugrilaižiden rahvahiden kelihe. Paiči literaturad Nikolai Abramov professionaližesti tegi fotokuvid. Hän tartui hüviš meliš kinosjomkoihe.

Homaičendad

  1. ↑ Поэт, переводчик, фотограф , журналист, актер. Подпорожская центральная районная библиотека. Дата обращения: 1 kül'mkud 2025.
  2. ↑ 1 2 Koumekümne koume. — Петрозаводск: Карелия, 1994. — С. 3. — 54 с. — 1000 экз. — ISBN 5-7545-0662-7.
  3. ↑ Вепсский поэт Николай Абрамов награждён посмертно. Дата обращения: 1 kül'mkud 2025. Архивировано 24 elokud 2017 года.
  4. ↑ Памяти вепсского поэта Николая Абрамова. Республика Карелия - Медиаресурсы - Ресурсы - Финно-угорские библиотеки России. fulr.karelia.ru. Дата обращения: 1 kül'mkud 2025.
  5. ↑ Абрамов, Николай Викторович. Интерактивный атлас коренных малочисленных народов Севера, Сибири и Дальнего Востока: языки и культуры. Дата обращения: 1 kül'mkud 2025.

Lähtked

Om sadud "https://vep.ruwiki.ru/w/index.php?title=Koumekümne_koume_(kirj)&oldid=466444"