Elonpu

Prezidentan kirjišton B.N. Jel'cinan nimel materialad

Neciš kirjuteses om kävutoitud materialad Prezidentan B.N. Jel'cinan nimen kirjišton fondaspäi

К материалам

Elonpu
"Elonpu"-praznik Vologdan agjas, voz' 2025
Om tehtud	vodelpäi 1987 Vidlas vodelpäi 1989 Šoutjärves da Pankratovas
Praznuitas	kezal
aigal	1987
Tradicijad	lentoiden sidomine puhu koncertprogramm master-klassad
Om sidotud	vepsäb rahvahanke, vepsän kelenke

Elonpu (ven.: Дре́во жи́зни) — jogavozne tradicionaline vepsläižen kul'turan praznik, mitte mäneb kezal kaikiš regionoiš, kus eläba vepsläižed - vähäluguine igähine rahvaz: Vidlas, podporožjen rajonas Piterin agjas, Šoutjärves, änižröunas Karjalas da Pankratovo-küläs Babajevon rajonas Vologdan agjas.

Üleižed tedod

Tradicionaline vepsläižen kul'turan "Elonpu"-praznik ezmäižen kerdan oli tehtud 14. kezakud vodel 1987 Vidl-küläs Podporožjen rajonas Piterin agjas da siš aigaspäi mäneb kaikuččen voden kezakus, vodelpäi 1989 - Šoutjärv-küläs Änižröunas Karjalas da Pankratovo-küläs Babajevon rajonas Vologdan agjas heinkus. Paiči vepsläižiden pajokollektivoiden ezitusid praznikal pajataba venälaižed da karjalaižed fol'klorgruppad, tehtas erazvuiččed mastar'-klassad vepsläižiden pirgoiden da käziradoiden mödhe. Praznik abutab kaita vepsän kel't, Venäman vähäluguižen igähižen vepsän rahvahan kul'turad da tradicijoid.

Etimologii

"Elonpu"-praznikan päsimvol om pu, mitte ühtenzoitab enttušt, nügüdläšt da tulebad elod. Jured - enččen elon simvol, rung - vepsläižen kul'turan da vepsän rahavahan tradicijoiden sirdämine polvespäi polvehe, oksad - tuleban elon simvol. Pu mifologo-ortodoksižes vepsläižiden kaceges - lopmatoman elon simvol.

Praznuičemine

Tradicionaline vepsläine "Elonpu"-praznik - kaiken vepsän rahvahan päpraznik, mitte žhtenzoitab kaikid. Ezmäižen kerdan se oli Vidl-küläs podporožjen rajonas piterin agjas Ojat'-jogen randal. Praznik kerazi adivoid ei vaiše läheližiš külišpäi, no mugažo Venäman toižiš regionoišpäi da susedmaišpäi. Vidlan eläjile muga tuli mel'he, miše heiden kul'turaha kingitihe mugošt homaitust, miše zavodihe pidäda praznikad ičeze vägel. Jo vodes päliči sünduiba ezmäižed fol'klorgruppad, kaikuččen voden praznikale tuleskeli tuha ristitud. Voziden 1990 lopus Vidlas oli tehtud keskuzs vepsän rahvahan käziradoiden udessündutamižen mödhe.

Tämbei praznikal voib ei vaiše kulištada pajoid vepsän kelel, no nägištada tradicionaližid vepsläižid karguid, süveneda vepsän rahvahan eloho, mujuda tradicionališt olut, lent, vepsläižid pirgoid - kalitoid, skancoid, pirgoid vävule, ühtneda mastar'-klassoihe da opetas kudomaha, omblemaha, kuvamaha tohespäi.

Vanhas vepsläižes Šoutjärv-küläs Änižröunas "Elonpu" tehtas vodelpäi 1989 külän keskuses, läz Šeltozerka-joged. Äi vozik praznik mäni Änižjärven randal. No pohjoižvepsläižed johtutaba, miše ezmäine fol'klorpraznik oli vodel 1987 da oli omištadud Vepsän rahvahan horan tegijale, ühtele ezmäižiš Kantele-ansambl'an pämehišpäi Vasilii Kononovale. Idejad tehta praznikad andoi Viola Mal'mi.

Vologdan agjas "Elonpu" tehtas vodelpäi 1989. Vodel 2025 praznik mäni Vauktan järven randal Pankratovo-küläs babajevon rajonas. Praznikan pätemaks tegihe "Vepsläine külä". Adivoid tundištoitihe vepsän rahvahan veroidenke, tradicijoidenke, pidetihe mastar'-klasssoid vepsläižiden pirgoiden, kaičijoiden, tradicionaližiden vöiden tegemižen, vepsän paginkelen opendamižen mödhe. Tardicijan mödhe oli ezitadud vepsläižiden mastriden käziradod. Kaikid adivoid sättihe magukahal lemel. Scenalpäi kuluiba vepsläižed pajod.

Galerei

• 

  Vepsän rahvahan hor, Pankratovo, voz' 2025

• 

  Elonpu-praznikan ühtnikad, Pankratovo, voz' 2025

• 

  Elonpu-praznik Šoutjärves, voz' 2014

• 

  Elonpu-praznik Vidlas, voz' 2016

• 

  Ansambl' Ladvaspäi Elonpu-praznikal Vidlas

• 

  Mastar'-klass kudomižen mödhe, Vidl, voz' 2016

• 

  Elonpu-praznik Vidlas, voz' 2016

• 

  Elonpu-praznik Vidlas, voz' 2016

• 

  Ozuteluz Elonpu-praznikal, voz' 2012

Homaičendad

Literatur

• Вепсский праздник в лицах / сост. Н. М. Ковальская, А. В. Трифанова, Т. И. Ерёмина. — СПб., 2016.
• Древо жизни: праздник вепсской культуры. Методические материалы / авт.-сост. Д. А. Горб, А. Г. Рыжов, Н. А. Андреева, И. П. Рыжов. — СПб., 2003.
• Строгальщикова З. И. Вепсский праздник «Древо жизни» // Праздничные традиции и новации народов Карелии и сопредельных территорий: исследования, источники, историография / науч. ред. и сост. И. Ю. Винокурова. — Петрозаводск, 2010. — С. 74—86.
• Строгальщикова З. И. Вепсы: очерки истории и культуры. — СПб., 2014.
• Строгальщикова З. И. Вепсы в этнокультурном пространстве Европейского Севера. — Петрозаводск, 2016.
• Лапин В. А. «Древо жизни» — праздник вепсов // Этнография Петербурга — Ленинграда: Материалы ежегодных научных чтений / Сост. и отв. ред. Н. В. Юхнёва. Л. Вып. 2.. — СПб., 1988. — С. 44—46.
• Baburova G. Änikoiče igän, Elonpu! // Verez tullei. — Петрозаводск, 2013. — С. 65—76.

Lähtked

• Фестиваль «Древо жизни»: погружение в самобытную культуру вепсов
• Вепсский праздник «Древо жизни» в селе Винницы
• Винницы. Древо Жизни
• Древо жизни в Шёлтозеро
• В старинном селе Шёлтозеро прошёл юбилейный праздник