Eloku

Рувики-späi
← Eloku →
Ez To Ko Ne Vi So Pü
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            
2026. voz'
Август, Вепсский календарь по месяцам, Респ Карелия, Петрозаводск.jpg

Eloku (ven.: А́вгуст, latin.: augustus, "Oktavinan Avgustan ku", kohtha ven.: 'божественный', "sur'znamasine") — kahesanz' voden ku Julianan da Grigorianan kalendariš, amuižrimalaižen voden kudenz' ku, mitte zavodihe Cezarin reformaspäi keväz'kuspäi. Üks' seičemes kuspäi, mitte jatkub 31 päiväd. Pohjoižes manpoliškos om kezan jäl'gmäine, koumanz' ku, suvimanpoliškos — tal'ven jäl'gmäine, koumanz' ku.

Nügüd' 10. elokuhusai Grigorianan kalendarin mödhe päiväine om Rakan kuvatähthas, 10. elokuspäi — Lev-kuvatähthas[1] (toižiden tedoiden mödhe — 11. elokud[2]).

Statistik da tedod

Venäman keskpolen agjoiš elokus om läm keza da eskai räk ezmäižiden sügüzen primetoidenke: ozutesikš, päiv tegese lühüdembaks. Öd tegesoiš vilukahambaks, vezi vilugandeb jogiš da järviš. Sutkoiden keskmäraine temperatur vähenzub +18 °С kun augotišes (1. elokud Moskvas statistikan mödhe om üks' kaikid lämembiš päivišpäi vodes) da +14 °С kun lopus; elokun viž jäl'gmäšt päiväd il'mišton normiden mödhe om sügüzen augotiž. Kaikid madalamb elokun keskmäraine temperatur Podmoskovjes (+12,4 °С) oli homaitud vodel 1884. Kaikid aigaližemb pakaine il'mas oli homaitud 11. elokud (1939), kaikid aigaližemb hala mas — 25. elokud (1921). Sadegiden keskmäine lugumär — 68 mm, se vajehtase 1 millimetraspäi (1938) da 151 millimetrahasai (1918)[3].

Eloku Päivlaskmanpolen Sibiriš

Elokus keratas rugiž, ozr, semetas pöudod rugehel tal'veks. Keratas čigičaine, sestrikaine, križovnik, babarm, luk da česnok, möst semetas pigaližed vihandad heinäd. Küpstas kezajablokad, ježevik da mecorehad,keratas op'atad. Kartohkan nat' kuivab[3].

Venäman keskpolen agjoiš eloku — linduiden lendamižen augotiž: ivolga, striž, pajolind. Äjiden linduiden karv lähteb. Sadmado munitab[3].

Venälaižiš lehtesiš "Mustaks elokuks" nimitadihe elokud sil vozil, konz Venämale tuli bed. Konz oli lujas äi ozatomid päivid jäl'ghe Sovetskijad Sojuzad, zavottes Elokun putčaspäi 19.-21. elokud vodel 1991.

Istorii da etimologii

Oktavian Avgust

Ezmäks elokud nimitadihe "sekstilijaks" (latin.: Sextilis — kudenz') da siš oli 29 päiväd. Julii Cezar' tegi reformoid Riman kalendariš, ližazi völ kaks' päiväd vodel 45 edel meiden erad, da se tegihe nügüdläižeks kuks, kus om 31 päiväd[4].

Elokun todesine ičeze nimi om tehtud rimalaižen imperatoran Oktavian Avgustan muštoks, necidä nimed vodel 8 edel meiden erad rimalaine senat andoi elokule, sikš ku se oli ozakahamb imperatoran elos. Senatus consultum mödhe, mittušt johtutab Makrobii, Oktavian valiči ičeleze necidä kud, sikš ku siloi oliba hänen ozakahad sur'znamasižed vägestused, siš lugus Jegiptan otmine[5]. Mugoine-žo arvosteluz oli aigemba Julii Cezaril, hänen muštoks "kvintilii" (latin.: Quintilis — videnz') oli nimitadud "heinkuks" (latin.: Iulius).

Tetaban starinan mödhe (mitte oli pästtud eloho tedomehel Ioann Sakroboskol XIII voz'sadal) ezmässai "sekstilijas" oli 30 päiväd, no Oktavian Avgust surenzi sidä da tegi 31 päiväd, miše se ei oliži lühüdemb kud, mitte oli nimitadud Julii Cezarin muštoks, a uhokuspäi oti ühten päivän, sikš siš om vaiše 28 päiväd[6]. No, om lujas äi toziazjoid, miččed pagižeba vasthapäi necidä teorijad. Ozutesikš, siš ei ole todesišt voden aigan pidust, miš pagižeb Varron (ven.) (vep., kudamb kirjuti vodel 37 edel meiden erad Oktavianan reformahasai, 31-päiväine sekstilii om kirjutadud jegiptalaižes papirusas vodelpäi 24 edel meiden erad, a 28-päiväine uhoku om ozutadud Fasti Caeretani - kalendariš, mitte oli tehtud vodhesai 12 edel meiden erad[7]

Istoriližiš jevropalaižiš elokun nimiš om sen amuižgermanialaine Erntemonat-znamoičend ("satusen ku")[8]. Amuižvenälaižes kalendariš (hristialižen uskondan vahvištoitusehesai) eloku oli zoriden ku (vilud zor'ad homendesidme), mugažo sirp (lopihe sirpand)[3], rahvahaližiš kalendariš mugažo — ven.: густоед, разносол, хлебосол, жнивень, припасиха-собериха, венец лета, ленорост, межняк. "Elokun" nimi tuli Rusihe Vizantijaspäi.

Irlandcad völ XX voz'sadan augotišes 1. elokud ajoiba kezad tradicijan mödhe, mitte zavodihe kel'toiden Bron Trograin - praznikaspäi (Irlandijas — Lugnasad), a eloku oli ezmäine sügüzen ku[9][10].

Venäman pohjoižes amuižes aigas nimitihe Zarevaks[11].

Toižil kelil

"Rahnmine" (Z. Serebr'akovan kuva, voz' 1915)

Äjiš keliš mail'mas elokun nimi om tehtud latinalaižen tradicijan mödhe. No om eroid.

Türkoiden kelil eloku nimitadas "Тамыз/Tamyz" (pažagoiden sütutamižen aig) libo arabian kelel — Сүмбіле/Sumbile (Siriusan tähthaižen nimen mödhe). Persijan kelel eloku nimitadas Мо́рдад (igähine elo, surmatoi aig). suomen kelel eloku nimitadas elokuu ("leibän ku"), elo-sanaspäi, mi znamoičeb — "elo, leib, jüvä", neciš kus lopihe satusiden keradamine pöudoil. Rahnmižes pagižeba elokun nimed slavilaižiš keliš: ukrainan kelel — serpen', pol'šan kelel — sierpień, čehijan kelel — srpen, "sirp"-sanaspäi. Belorussijan kelel — жнівень, "rahnda"-sanaspäi. Horvatijan kelel eloku om kolovoz, (nahodib bolgarian kelen kolovoz-sanaha, ven.: «колея»), sikš ku neciš kus kaik keratas satused pöudoil. Litvan kelel nimitadas rugpjūtis ("rugehen rahnmine") rugis — "rugiž", pjūtis — "rahnmine" sanoišpäi[12]. Irlandijan kelel eloku nimitadas An Lúnasa da om tehtud Nit'un jumalan nimespäi.

Nügüdläižil kitajan, korejan, vjetnaman da japonijan kelil eloku znamoičeb "kahesanz' ku". A amuižes japonialaižes kudmaižen kalendariš eloku nimitihe Хадзуки (叶月) — "lehtesiden ku".

Taiskijal kelel eloku nimitadas Синг-ха-Ком (สิงหาคม), сингха — "lev"-sanaspäi.

Praznikad

"Eloku" (Gercogan Berriiskijan čoma časoslov, voded 1410—1490)

Uskondpraznikad

  • 2. elokud — Ill'an päiv ortodoksižil uskojil.
  • 14. elokud — Mezispas ortodoksižil uskojil.
  • 19. elokud — Jablokspas ortodoksižil uskojil.
  • 28. elokud — Pühän Bogorodican Uspenije ortodoksižil uskojil.
  • 29. elokud — Orehspas, Koumanz' spas, Leibspas ortodoksižil uskojil.

Sovetskijad

  • 2. elokud — Sovetskijan Sojuzan il'm-desantoiden voiskiden päiv.
  • 18. elokud — Vsesojuznii aviacijan päiv.

Sirdäjad päiväd

  • 1. pühäpäiv — Raudteradnikan päiv Venämal.
  • 2. sobat — Fizkul'turnikan päiv Venämal.
  • 3. sobat — Rahvahidenkeskeine koditomiden živatoiden päiv.
  • 2. pühäpäiv — Sauvojan päiv Venämal.
  • 3. pühäpäiv — Venäman il'mflotan päiv.
  • 4. pühäpäiv — Šaht'oran päiv Venämal.

Homaičendad

  1. ↑ За год Солнце проходит не через 12, а через 13 созвездий. Новый знак зодиака — «Змееносец». Дата обращения: 25 kül'mkud 2025. Архивировано 20 sügüz'kud 2011 года.
  2. ↑ Климишин И. А. Календарь и хронология. — Изд. 3. — М.: Наука. Гл. ред. физ.-мат. лит., 1990. — С. 41. — 478 с. — 105 000 экз. — ISBN 5-02-014354-5.
  3. ↑ 1 2 3 4 В. Д. Грошев. Календарь российского земледельца (народные обычаи и приметы). — М.: МСХА, 1991. — 41 с. — ISBN 5-7230-0074-8.
  4. ↑ Август, месяц // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
  5. ↑ Year of Julius Caesar, A Dictionary of Greek and Roman Antiquities (1890), William Smith, LLD, William Wayte, G. E. Marindin, Ed. Дата обращения: 25 kül'mkud 2025. Архивировано 4 keväz'kud 2016 года.
  6. ↑ Август — восьмой месяц Григорианского календаря. Дата обращения: 25 kül'mkud 2025. Архивировано из оригинала 15 sügüz'kud 2010 года.
  7. ↑ Popular Astronomy 27 (1919) 583—595. Sacrobosco’s theory is discussed on pages 585—587 (англ.). articles.adsabs.harvard.edu. Дата обращения: 25 kül'mkud 2025.
  8. ↑ Сергей Александрович Токарев. Календарные обычаи и обряды в странах зарубежной Европы. — Институт этнографии имени Н. Н. Миклухо-Маклая: Наука, 1978. — С. 148.
  9. ↑ Сергей Александрович Токарев. Календарные обычаи и обряды в странах зарубежной Европы. — Институт этнографии имени Н. Н. Миклухо-Маклая: Наука, 1978. — С. 81.
  10. ↑ Праздники кельтов. web.archive.org. Дата обращения: 25 kül'mkud 2025.
  11. ↑ Астрономия Древней Руси. www.darkgrot.ru. Дата обращения: 25 kül'mkud 2025.
  12. ↑ Балтийские и славянские названия месяцев. web.archive.org. Дата обращения: 25 kül'mkud 2025.

Lähtked

  • Календарь // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907. V. Vitkovskijan kirjutez
Kud

Viluku | Uhoku | Keväz'ku | Sulaku | Semendku | Kezaku | Heinku | Eloku | Sügüz'ku | Reduku | Kül'mku | Tal'vku

Om sadud "https://vep.ruwiki.ru/w/index.php?title=Eloku&oldid=452799"