Venäman zakonkogomusen päiv

Рувики-späi
Zakonkogomusen päiv
Zakonkogomusen kirj Venäman prezidentan vahvan sanan andandan täht
Zakonkogomusen kirj Venäman prezidentan vahvan sanan andandan täht
Tip

Valdkundaline praznik

Oficialižesti

Venäman zakonkogomusen päiv

Om tehtud

Ühthižrahvahan änestamižen 12. tal’vkud vodel 1993 muštoks

Tegii

Boris Jel’cin

Praznuitas

joga voden

Päiv

12. tal'vkud

Om sidotud

Venäman zakonkogomusen ühthižrahvahan änestamiženke

lugeda • diskussii • redaktiruida

Zakonkogomusen päiv — (ven.: День Конституции) om valdkundaline praznik, mitte joga voden praznuitas 12. tal'vkud. Ani 12. tal'vkud vodel 1993 oli ühthižrahvahaline änestamine, mitte tugezi valdkundan päzakonan vahvištoitust[1].

Praznikan istorii

Sovetskijas Sojuzas «Zakonkogomusen päiv»-praznikpäiv vajehtihe äi kerdoid, sikš ku päzakon vajehtihe kuverz'-se kerdad. Ezmäine Zakonkogomusen päiv om vahvištoitud Sovetskijan Sojuzan Valdkundaližen tegiikomitetan prezidiuman käskol 3. elokud vodel 1923 (iče Zakonkogomuz oli vahvištoitud lopuks vaiše 31. vilukud vodel 1924 II SSSRan Sovetoiden keradusel). Käskon mödhe päzakonan praznik oli vajehtamine – sidä oigetihe heinkun ezmäižen pühäpäivän. No konz vodel 1930 sovetskijad radištod zavodiba rata lopmatoman radnedalin, Zakonkogomusen päiv vahvištoitihe 6. heinkud. Se oli radpäiv[2].  

5. tal'vkud vodel 1936 VIII Ühthižsojuzižel Sovetoiden keradusel oli vahvištoitud uz' zakonkogomuz, mitte sai «stalinine»-nimen, a sen vahvištoituden päiv oli tehtud ühthizrahvahaližeks praznikaks. Iosif Stalin|an aigan Zakonkogomusen päiv, miččen nimitihe SSSran stalinižen zakonkogomusen päiväks, tegihe radmatomaks. Sen praznuičend tal'vkus jatksihe vodehesai 1976[2].

Man päzakonan uz' versii tuli vodel 1977. Völ sidä nimitadas «kehitoitud socializman zakonkogomuz». 7. redukud se oli vahvištoitud SSSRan Ülembaižen Nevondišton sessijal, jäl'ges sidä tuli SSSRan zakon «Tedotuses Sovetskijan Sojuzan zakonkogomusen päivän ühthižrahvahaližeks praznikaks vahvištoituses». Redukun 7. päiv oli praznikpäiv SSSRan jagandusehesai vodehesai 1991[2].  

Voden 1993 zakonkogomusen vaumičend

1978-vozne RSFSRan Zakonkogomuz (kohendusidenke)[2].

Rahvahan deputatoiden keradusen zakonkogomusine laudkund uden zakonkogomusen tegendan täht oli tehtud heinkus vodel 1990. Sen ohjandajan oli RSFSRan Ülembaižen Nevondišton pämez' Boris Jel'cin. Nelläs vodes, vodespäi 1990 vodehesai 1993, erazvuiččed politižed da kundaližed sebrad oma tehtud läz 20 zakonan variantad, miččišpäi oficiališti oli kactud vaiše kaks’. Ezmäižen variantan päkirjutajad oma Sergei Aleksejev — Venäman pämehen üksnäižoiktuden oppindkeskusen nevondišton pämez’ da Sergei Šahrai — Venäman valdmehišton pämehen varapämez’. Toižen variantan tegiba Zakonkogomusižen laudkundan ühtnikad Oleg Rum’ancevan ohjandusel[2].

Laudkundaha formaližesti mülüi läz sada deputatad. Todeks Zakonkogomusen projektanke radoi 12-15 mest, kudambad oliba radjoukus. Joukun «motoran» oli vastusenpidäi sekretar’, 30-vozne Oleg Rum’ancev. Ühtes hänenke projektanke aktivižesti radoiba völ kuverz’-se deputatad, niiden keskes voib erigoitta Viktor Žeinis, Jurii Rižov, Boris Zolotuhin, F’odor Šelov-Koved’ajev, Jevgenii Ambarcumov, Sergei Šahrai. Azjtedajiden joukuspäi voib erigoitta Boris Strašunad,Leonid Mamutad, Vladimir Lafitskijad. Laudkundan pätegendan oli venälaižen zakonkogomusižen modelin tegend mail’manmahtišton pohjal.

— Andrei Gol’cblat[3]

1993 Venäman prezidentan Boris Jel’cinan tomotusen mödhe oli tehtud Zakonkogomusižen ištund, ühtnikoiden keskes oliba valdmehišton valdelimed, sijaližen ičenaižen valdelimed da kundaližed sebrad, miččel vahvižtoittihe uden Zakonkogomusen jälgmäine redakcii. Sel aigal Sur’ Keraduz da Venäman Ülembaine Nevondišt vaumičiba ičeze päzakonan versijad, miččen planiruiba vahvištoitta 17. kül’mkud vodel 1993 X rahvahan deputatoiden keradusel. No todesine prezident pästi Rahvahan deputatoiden nevondišton da ühtes senke Venäman Ülembaižen Nevondišton, a niiden sijas ladi tehta Federaline Keraduz. No Venäman Zakonkogomusine sud sanui. miše nece pätandan vastustab päzakonale.Zakonkogomusen mödhe Venäman Ülembaine Nevondišt lopi prezidentan Boris Jel’cinan valdoiktuded da andoi niid Venäman vice-prezidentan Aleksandr Ruckovan päle. Rigehtusel kerazihe X akkiline rahvahan deputatoiden keraduz. Moskvas Ülembaižen Nevondižton pert’, kus ištuiba deputatad, oli saubatud südäinvoiskil da milicijal Boris Jel’cinan käskol. 3. redukud vodel 1993 pälidnaha tuliba voinväged, miččed toižel päiväl jäl’ges tankambundad tacindal ottihe parlamentan pertin. Vastustaijoukun pämehed, parlamentan pämez’ da vice-prezident, oliba türmatud[2].

Redukus-kül’mkus vodel 1993 zakonkogomusen projekt, miččen hüväksiti Jel’cin, vaumittihe lophusai zakonkogomusižen paginištundan valdelimed: Kundaližel da Valdkundaližel palatoil da Zakomkogomusižen arbitražan komissijal. Prezident allekirjuti käskon ühthižrahvahan änestamižen mänetandas zakonkogomusen projektan mödhe 12. tal’vkud vodel 1993[2].

Pidi pätta küzundoid ühthižrahvahan änestamižen vaumičendas uden zakonkogomusižen järgendusen pohjal. Referenduman satuses kaikile politikvägile, valdmehištoile, da regionoile pidi ühtneda uden Zakonkogomusen alandusiš ümbri, mi andaiži vägevan tahton Venäman valdkundaližen ühtenzoitusehe. No, nece kovas küzui kaikid politikprocessan surid naprindoid. Tariž oli kut-se eläda-tirpta necidä aigad referendumahasai — keskustamata valdmehištoiden tazoväged, paremban effektivižen valdkundan ohjandusenke da hüvän politikholišton tegendan tulijan toižetusiden täht.

— О. G. Rum’ancev[4]

Venäman zakonkogomusen vahvištoituz

Venäman Zakonkogomusen uz’ variant oli vahvištoitud ühthižrahvahan änestamižel 12.tal’vkud vodel 1993, se tuli radoho jäl’ges paindandad Venälaižes lehteses (ven.: Российская газета)[5] 25. tal’vkud sel-žo vodel. Vodel 1994 Venäman prezident pästi käskod «Venäman Zakonkogomusen Päivän polhe» da «Pühäpäivän polhe 12. tal’vkud». 12. tal’vkud sanuttihe valdkundaližeks praznikaks[6].

Vodel 2005 Zakonkogomusen päiv tegihe radinpäiväks, no sen ühtes Venäman muštpäiväks[7], sen täht ku 24. tal’vkud vodel 2004 Valdkundaline Duma todišti vajehtusid Venäman radkodeksaha, miččed toiba vajehtusid Venäman praznikkalendarihe[8].

Tradicijad

Kacmata sihe, miše Zakonkogomusen päiv om radpäiv, 12. tal'vkud kaikjal meiden mal pidetas erazvuiččed patriotižed azjtegod, mitingad da koncertad. Jo tegihe tradicijaks necel päiväl pauklahjoita arvostadud juristoid da sudjid[9].

Hüväks tradicijaks tegihe Zakonkogomusen päiväl antta ezmäižed pasportad venälaižile, miččed jo oma 14-voččed. Necel päiväl školopenikoiden da üläopenikoiden enambišt ühtnedas erazviččihe temazjoihe, miččid pidetas openduzorganizacijoiš necen päivän muštoks [9].

Literatur

  • Шахрай С.М. О Конституции: Основной закон как инструмент правовых и социально-политических преобразований. Отделение общественных наук РАН. М.: Наука, 2013. С. 58–59.
  • Бабурин С.Н. Русская государственность и Российское государство в системе ценностей и интересов современной политики, международного и конституционного права: морфология. М: ЮНИТИ-ДАНА, 2018. С. 161.

Homaičendad

  1. ↑ Указ Президента Российской Федерации от 19.09.1994 г. № 1926. Дата обращения: 10 tal'vkud 2021. Архивировано 21 elokud 2021 года.
  2. ↑ ТАСС (12 tal'vkud 2022). Дата обращения: 8 tal'vkud 2023.
  3. РБК (12 tal'vkud 2028). Дата обращения: 10 tal'vkud 2023.
  4. ↑ О.Г. Румянцев. К истории создания Конституции Российской Федерации. О работе Конституционной комиссии (1990-1993 гг.) // Из истории создания Конституции Российской Федерации. Конституционная комиссия: стенограммы, материалы, документы (1990–1993 гг.) : в 6 т. / О. Г. Румянцев. — М.: Волтерс Клувер, 1992. — Т. 3. — С. 40. — ISSN 978-5-466-00354-3.
  5. Российская газета.
  6. Российский союз молодёжи (12 tal'vkud 2020).
  7. ↑ Федеральный закон от 13 марта 1995 г. № 32-ФЗ «О днях воинской славы и памятных датах России». Президент России. Дата обращения: 9 tal'vkud 2023. Архивировано 26 kül'mkud 2021 года.
  8. ↑ Дума изменила праздничный календарь, Вести (24 tal'vkud 2004). Архивировано 14 tal'vkud 2014 года. Дата обращения: 10 tal'vkud 2023.
  9. ↑ РЕН ТВ (12 tal'vkud 2022). Дата обращения: 10 tal'vkud 2023.

Tarkendused

Om sadud "https://vep.ruwiki.ru/w/index.php?title=Venäman_zakonkogomusen_päiv&oldid=253562"