Markova Jelena Ivanovna

Рувики-späi
В Рувики есть статьи о других людях с фамилией Markova.
Jelena Ivanovna Markova
Маркова Елена Ивановна Карелия.jpg
Sündundpäiv 15. kezakud 1947(1947-06-15) (79 лет)
Sündundtaho
Ma  SSSR→
 Venäma
Tedoerišt kel'tedo, literaturtedo
Radsija Kelen, literaturan da istorian institut, Petroskoin valdkundaline universitet
Tedostepen' filologijan tedodoktor (2000)

Jelena Ivanovna Markova (ven.: Еле́на Ив́ановна Ма́ркова, om sündunu 15. kezakud 1947, Petroskoi) — sovetskii i venälaine kel'tedomez', kirjutai. Filologijan tedodoktor. Karjalan arvostadud tedoradnik. Kelen, literaturan da istorian institut literaturtedon erišton pätundii. "Sever"-kulehtesen toimitandnevondišton ühtnik. Venäman Kirjutajiden sebran ühtnik. Venäman Koncertradnikoiden sebran ühtnik.

Elostarin

Vodel 1970 J. I. Markova lujas hüvin lopi Petroskoin valdkundaližen universitetan, sai "filolog"-specialižuden, venän kelen da literaturan opendai. Vodel 1974 lopi aspiranturan "sovetskijan aigan literatur"-specialižuden mödhe[1].

Vodel 1975 hän polesti kandidatan dissertacijan "M. S. Šagin'anan sädairad venälaižen sovetskijan lapsiden literaturan istorijas" (Petroskoi, Petroskoin valdkundaline universitet).

11 voden aigan J. I. Markova oli opendajan školas i universitetas: Šoutjärven keskškolas (Karjalan ASSR, 1970—1971), Petroskoin keskškolas № 18 (1982—1984), Ivano-Frankovskan pedagogižes institutas V. Stefanikan nimel (USSR, 1974—1976) i Sterlitamakan pedagogižes institutas (BASSR, 1976—1982).

Voden 1984 redukun 10. päiväspäi hän radab Kelen, literaturan da istorian institutas. Zavodi rata noremban tedoradnikan, oli tedoradnikan, vanhemban tedoradnikan i literaturan erišton pätundijan. Voden 2007 kül'mkuspäi tegihe literaturan erišton ohjandajaks, voden 2010 keväz'kuspäi — literaturan i fol'kloran erišton ohjandai, voden 2016 keväz'kun 1. päiväspäi — literaturtedon erišton ohjandai.

Vodel 1988 oli praktikal Sovetskijan Sojuzan Mail'man literaturan institutas A. M. Gorjkijan nimel (ven.) (vep..

Vodelpäi 1998 — Venäman Kirjutajiden sebran ühtnik.

Vodel 2000 polesti doktoran dissertacijan monografijan mödhe "Nikolai Kl'ujevan (ven.) (vep. sädandrad pohjoižvenälaižen sanataidehen kontekstas" Mail'man literaturan institutas A. M. Gorjkijan nimel (ven.) (vep.. Necil-žo vodel hän sai filologijan tedodoktoran arvnimen.

Hän ezineb dokladoidenke rahvahidenkeskeižil, kaikenvenälaižil da regionaližil tedokonferencijoil Petroskoiš, Moskvas (Mail'man literaturan institut A. M. Gorjkijan nimel, Literaturan institut A. M. Gorjkijan nimel, Moskvan valdkundaline pedagogine universitet i toižed), Piteriš (Venäman tedoakademijan venäalaižen literaturan institut (Puškinan pert'), Vologdas, Vitegras, Volgogradas, Velikijas Novgorodas, Nižnijas Novgorodas, R'azaniš, Smolenskas, Tomskas i toižiš. Mugažo ezineb dokladoidenke kirjutajiden forumoil: Suomaliž-ugrilaižiden kirjutajiden kangressoil (Siktivkar, 1998 i Petroskoi, 2006 — tegi pädokladan), Barenc-regionan kirjutajiden literaturan sessijal (2005, Švecii i toižed).

Vodelpäi 2007 ühtes Petroskoin N. A. Kl'ujevan kirjišton radnikoidenke tegeb "Kl'ujevan lugendoid"[2]. 30. redukud vodel 2022 Petroskoin kirjištos № 3 N. Kljujevan nimel mäniba ХVI Kljujevan lugendad, miččiden nimi oli ven.: «В мироздании став запятой…». Vastuz oli omištadud mugažo Jelena Markovan jubilejale[3]. Vodel 2024 Kljujevan lugendad mäniba mugažo Petroskoin kirjištos № 3 da oli omištadud Nikolai Kljujevan 140-voččele jubilejale[4].

Hän om äjiden projektoiden tegii. Üks' jäl'gmäižišpäi projektoišpäi oli "Karjalan literaturale 100 vot: aig, ecindad, modkuvad", se oli tehtud vozil 2018-2020 Venäman da Karjalan Kul'turministerstvoiden tugel[5].

Bibliografii

J. I. Markova kirjuti enamba mi 150 tedotöd, miččed oli paindud Venämal, Germanias, Latvias, Serbias, Suomes, Kanadas, Amerikas i Avstralias.

"100 vot Karjalan literaturale. Aig. Ecindad. Modkuvad" (ven.: «100 лет литературе Карелии. Время. Поиски. Портреты»)-kollektivižen monografijan tedo-ohjandai i üks' kirjutajišpäi Petroskoi, 2020). Kirjas ezmäižen kerdan om ozutadud Karjalan mel'kuva, mitte om sätud valdkundan literatoroiden abul vodelpäi 1920 vodehesai 2020, täs-žo oma tetabiden kirjutajiden modkuvad.

"Karjalan literaturan istorii" (ven.: «История литературы Карелии»)-III toman üks' pätegijoišpäi (Petroskoi, 2000). J. I. Markova kirjuti Sovetskijan Sojuzan aigan (1930.-, 1945.—2000.- voziden runotuz; 1945.—1960.-voziden proza), fol'kloran, Novgorodan aigkeskustan endevenälaižen literaturan, XVIII—XIX voz'sadoiden literaturan da Kl'ujevan sädandradon polhe[1].

Nikolai Kl'ujevan (ven.) (vep. sädandtön oppii. Vodel 1995 J. I. Markova lopi oppindradon, a vodel 1997 oli paindud monografii "Nikolai Kl'ujevan sädandrad pohjoižvenälaižes sanataidehen kontekstas" (ven.: «Творчество Николая Клюева в контексте севернорусского словесного искусства») (Petroskoi, 1997). Nece om koumanz' Venämal i videnz' mirus monografii, mitte om omištadud ühtele kaikid jügedambišpäi i vähän oppidud "hobedaižen voz'sadan" runoilijoišpäi[6].

Pauklahjad

  • Karjalan arvkirjeine (1999);
  • Petroskoin lidnan laureat (2000);
  • Karjalan premijan laureat kul'turan, taidehen da literaturan alovehes (2002);
  • Karjalan arvostadud tedoradnik (2005);
  • Venäman tedoakademijan prezidiuman arvkirjeine (2009);
  • Karjalan Voden laureat (2015)[7].

Homaičendad

  1. ↑ 1 2 Маркова Елена. Дата обращения: 13 elokud 2025.
  2. ↑ В столице Карелии прошли XVIII Клюевские чтения. Дата обращения: 13 elokud 2025.
  3. ↑ Юбилей Елены Марковой на XVI Клюевских чтениях (30 redukud 2022). Дата обращения: 15 sügüz'kud 2025.
  4. ↑ В столице Карелии прошли XVIII Клюевские чтения. Петрозаводская ЦБС. Дата обращения: 15 sügüz'kud 2025.
  5. ↑ Маркова Елена Ивановна. Дата обращения: 15 sügüz'kud 2025.
  6. ↑ Маркова Е. И. Творчество Николая Клюева в контексте севернорусского словесного искусства. cheloveknauka.com. Дата обращения: 13 elokud 2025.
  7. ↑ Маркова Елена Ивановна. Награды. krc.karelia.ru. Дата обращения: 15 sügüz'kud 2025.

Lähtked

Om sadud "https://vep.ruwiki.ru/w/index.php?title=Markova_Jelena_Ivanovna&oldid=529147"