Kiselövsk

Kiselövsk
Флаг[d] Герб
53°59′00″ с. ш. 86°42′00″ в. д.
Valdkund	Venäma
Istorii da geografii
Tegemižen päiv	1917
Pind	160
Высота	320
Eläjad
Eläjad	▼83 431 чел. (2021)
Lugud
Telefonan kod	38464
Počtan indeksad	652700–652799
Mediafailad RUWIKI-tedoiš

Kiselövsk (ven.: Киселёвск) om Venäman lidn Kemerovon agjan suvipäivlaskmas. Se om agjan kudenz' lidn eläjiden lugun mödhe, Kiselövskan lidnümbrikon administrativine keskuz (vspäi 2005).

Istorii

Ende türkad-teleutad elihe lidnan sijas. Läz 1770 vot sirdnikad Keskuzvenämaspäi paniba Afonino-, Čerkasovo- i Kiselövk-küliden alusid. Vn 1917 redukus zavottihe sada kivihil't Kiselövkan kaivudespäi. Vl 1932 žilo kaivudenno sai radnikžilon statusad Kiselövskii nimenke, sil-žo vodel ühtištuihe lähižidenke külidenke. Kätihe radnikžilod lidnaks agjan alištusenke vn 1936 20. päiväl vilukud.

Kiselövsk šingotase kivihilen samižel (4 kar'jerad) i 2 küllästamižfabrikal, kaivuzmašiništon tegimel, sömtegimištol (konditerine edheotand, maidtegim, kolbasan pästand), mugažo poukahtuzsubstancijoiden tegim, mebel'fabrik i Afoninon savičtegim ratas.

Geografijan andmused

Lidn sijadase Abanjogen (ven.: Аба́, 71 km pitte) üläjoksmusen randal (Tomin hura ližajogi, lankteb Novokuzneckas), 320 m ü.m.t. keskmäižel korktusel, Salairan kräžan ezimägištol. Ottas vet Üläčumišan vezivaradimespäi 15 km suvipäivlaskmha lidnaspäi. Matkad Kemerovohosai om 154 km pohjoižhe orhal, 176 km avtol vai raudtedme. Lähembaine lidn om Prokopjevsk ani suvhe, kundaližen transportan maršrutad oma ühthižed kahtes lidnas. Molembad lidnad mülüdas Novokuzneckan lidnaglomeracijha (1,15 mln rist. vl 2010).

Koume žilod i kaks' küläd mülüdas lidnümbrikho Kiselövskan ližaks. Lidnümbrikon pind — 292,85 km². Lidnümbrik röunatab Prokopjevskan lidnümbrikonke suves, Prokopjevskan rajonanke päivnouzmas i päivlaskmas, Belovon rajonanke pohjoižes.

Eläjad

Vn 2010 Venäman rahvahanlugemižen mödhe lidnan eläjiden lugu oli 98 365 ristitud, lidnümbrikon — 103 019 ristitud. Kaikiš suremb lidnan ristitišt oli 142 tuh. eläjid vl 1962. Vl 2018 kaik 95 160 ristitud elihe lidnümbrikos.

Professionaližen opendusen aluzkundad: Kiselövskan kaivuztehnikum, politehnine tehnikum, pedagogine kolledž.

Edeližed lidnümbrikon pämehed: Sergei Lavrentjev (keväz'ku 2003 — kül'mku 2018), Maksim Škarabeinikov (viluku 2019 — kül'mku 2021).

Galerei

• Белый дом - panoramio (3).jpg

  Lidnümbrikon administracijan sauvuz (2014)

• Мфц - panoramio.jpg

  Lidnan valdkundaline äifunkcionaline keskuz (2014)

• 

  Jumalanmaman «Pigaikundlii»-jumalaižen pühäpert', vn 2004 nägu

• Шахта - panoramio.jpg

  Hilen samižen kaivuz vl 2010

• Рынок - panoramio (64).jpg

  Torgusen sauvuz vl 2014

• Школа.... - panoramio.jpg

  Üks' lidnan školoišpäi, 1. sügüz'ku 2015

• Центр Детского творчества - panoramio.jpg

  Lapsiden sädamižen keskuz (2014)

• 

  «Šahtör»-sportkompleks lidnan keskuzpalas (2006, Kaivai)

• Автовокзал - panoramio (34).jpg

  Avtobusstancii vl 2014

• Жд вокзал - panoramio (15).jpg

  Kiselövsk-päraudtestancijan sauvuz vl 2015

Homaičendad

Irdkosketused

• Kiselövskan lidnümbrikon Rahvahan Ezitajiden Nevondkundan oficialine sait (42ks.ru). (ven.)
• Kiselövskan lidnümbrikon Administracijan oficialine sait (shahter.ru). (ven.)