Petroskoin flag

Рувики-späi
Petroskoin lidnalaižen ümbrusen flag
Petroskoin linnupiirin fluagu
Flag of Petrozavodsk (Karelia).svg
Subjekt Petroskoi
Region Karjala
Ma Venäma
Vahvištoitud 1. keväz'kud 2001
Proporcii 2:3
Tegijan oiktuded
Flagan avtor Nikolai Triškov

Petroskoin lidnalaižen ümbrusen flag (ven.: Флаг Петрозаво́дского городско́го о́круга, karj.: Petroskoin linnupiirin fluagu) — oficialine, konvencionaline tedištusen-oiktuzznam, mitte om Petroskoin lidnan simvol Karjalas Venämal ühtes Petroskoin lidnanznamanke[1]. Petroskoin flag da azjbumag sen polhe om vahvištadud XXIV kucundan lidnalaižen nevondišton IX sessijal (pätuz №XXIV/IX-175) 1. keväz'kud vodel 2001[2]. Ei ole pandud Venäman valdkundaližehe geral'dižehe lugetišhe[3].

Status

  • 15. kül'mkuhusai vodhesai 2004 — municipaližen "Petroskoi-lidn" eländtahon flag.
  • 16. semendkuhusai vodhesai 2007 — Petroskoin lidnalaižen küläkundan flag.
  • 16. semendkuspäi vodelpäi 2007 — Petroskoin lidnalaižen ümbrusen flag.

Tedod

Eskiz om tehtud lidnan pätaidehpirdajal Nikolai Triškoval. Petroskoi-lidnan flag om oigedčogaine, sil om vauged-sinine kangaz, miččel huras ülembaižes čogaižes om ozutadud Petroskoin lidnanznam. Flagan leveduz' da piduz' oma 2 : 3. Lidnanznaman leveduz' om flagan pidusen 1/4 pala, piduz' flagan huras agjan mödhe lidnanznamahasai om 1/2 palad lidnanznaman levedust. Piduz' flagan ülembaižes agjan mödhe lidnanznamahasai om 1/4 palad lidnanznaman levedust. Sinialdoižen šoidun leveduz' om 1/5 palad flagan levedust da se om pirttud alembaižes palas[2].

Vauged muju lidnan flagal om puhtastusen da lumen simvol, sikš ku tal'ved Petroskoiš oma lujas lumekahad. Sinine ald pagižeb siš, miše lidn seižub Änižen järven randal, da Petroskoi om viden meren port, sikš ku jogiden da kanaloiden sisteman kal't voib lähtta Baltian, Vauktaha, Kaspijan, Mustaha da Barencan merihe[4].

Istorii

8. kezakud vodel 2005 Venäman prezidentan geral'dine nevondišt kel'di pakičust registriruida Petroskoin lidnanznamad da flagad Valdkundaližes geral'dižes lugetišes. Se sel'genzoiti ičeze pätust sil, miše Petroskoin lidnanznaman ülembaižes palas kävutadas Oloncan — Oloncan gubernijan (ven.) (vep. edel revol'ucijad tehtud lidnanznam, sen sijas oli tehtud Karjalan Valdkund. Mugoine kompozicii geral'dikan zakonoiden mödhe pagižeb siš, miše Karjalan pälidn om Oloncan lidnan valdas. Sen ližaks Oloncan lidnanznam ei ole registriruidud Venäman valdkundaližes geral'dižes lugetišes, sikš ei voi kävutoittas lidnanznamoiš, miččed tahtoiba putta lugetišhe. Geral'dine nevondišt tariči Petroskoin administracijale udessündutada istorilišt lidnanznamad, kus oma ristitadud malatad vihand-kuldaižel pöudol[3][5].

Semendkus vodel 2019 Petroskoin lidnan administacijas mäni ištund, kus kactihe lidnan simvilan seičeme variantad, miččid tegiba petroskolaižed geral'distad Ilja Jemelin da vepsläine taidehpirdai Aleksei Maksimov. Paginan lopus oli pättud jätta flagan projektan koume variantad, miččed om tehtud geral'dikan sändoiden mödhe da ei telustagoi municipaližen simvolikan zakonale. Flagan ezmäine variant kogonalaz toštab Petroskoin lidnanznamad, toine — vaiše alembaižen palan — istoriližen lidnanznaman — koume malatad vižrivižel vihand-pakuižel pöudol, koumandes om viž rived: koume vihandad da kaks' pakušt. Nene koume projektad oli vahvištadud lidnalaižel radgruppal da oigetud Venäman prezidentan geral'dižehe nevondištoho, no sigä ei olend vahvištadud[6][7].

  • Petroskoin lidnan flagan udištoitud versii. Variant 1

    Petroskoin lidnan flagan udištoitud versii. Variant 1

  • Petroskoin lidnan flagan udištoitud versii. Variant 2

    Petroskoin lidnan flagan udištoitud versii. Variant 2

  • Petroskoin lidnan flagan udištoitud versii. Variant 3

    Petroskoin lidnan flagan udištoitud versii. Variant 3

Vodeks 2025 Petroskoin lidnan flag, mitte oli vahvištadud vodel 2001, ei ole pandud Venäman valdkundaližehe geral'dižehe lugetišhe (ven.) (vep..

Kävutoitamine

Petroskoin lidnan flag pidab sanumata panda mugoižiden pertin seinile, zaloihe da radhonusihe, kut:

  • sijaližen ičeohjandusen erištoiden pertid;
  • sijaližen ičeohjandusen märitadud valdmehiden ajamed;
  • sijaližen ičeohjandusen märitadud valdmehiden radhonused;
  • zalad, kus mäneba ištundad, vastused, konferencijad da toižed azjtegod;
  • zalad, kus vastatas oficialižed delegacijad;
  • sijad, kus mäneba praznikaližed azjtegod.

Flagan suruz' ei voi olda enamba toižid flagoid.

Konz libutadas ühtel aigal Venäman flag da Venäman subjektan flag, Petroskoin lidnan flag pidab panda oiktaspäi Venäman subjektan flagaspäi (ku kacta niiden päle modol)[2].

Homaičendad

  1. ↑ Государственный флаг и Государственный герб Республики Карелия утверждены в качестве официальных символов. statesymbol.ru. Дата обращения: 23 tal'vkud 2025.
  2. ↑ 1 2 3 Об утверждении геральдического знака - флага города Петрозаводска, описания геральдического знака - флага, Положения о геральдическом знаке - флаге города Петрозаводска. kodeks.karelia.ru (1 keväz'kud 2001). Дата обращения: 23 tal'vkud 2025.
  3. ↑ 1 2 Геральдический Совет отказал в регистрации герба и флага Петрозаводска. ria.ru (8 kezakud 2005). Дата обращения: 23 tal'vkud 2025.
  4. ↑ Мобильный класс "Регион - Карелия". Фонд венчурных инвестиций Республики Карелия. Дата обращения: 23 tal'vkud 2025.
  5. ↑ Геральдический Совет отказал в регистрации герба и флага города Петрозаводска. /statesymbol.ru (8 kezakud 2005). Дата обращения: 23 tal'vkud 2025.
  6. ↑ Геральдический Совет при Президенте России даст экспертную оценку новых вариантов флага Петрозаводска. petrosovet.info. Дата обращения: 23 tal'vkud 2025.
  7. ↑ У Петрозаводска появится новый флаг. stolicaonego.ru (22 semendkud 2019). Дата обращения: 23 tal'vkud 2025.

Lähtked

Om sadud "https://vep.ruwiki.ru/w/index.php?title=Petroskoin_flag&oldid=461179"