Mail'man arhitekturan päiv
| Mail'man arhitekturan päiv | |
|---|---|
 Arhitektor (1893) | |
| Tip | Professionaline praznik |
| Toižin | "Arhitektoran päiv" |
| Om tehtud | Rahvahidenkeskeine arhitektoroiden sebr |
| Praznuitas | Ma |
| Vodel 2025 | 6 redukud |
| Vodel 2026 | 5 redukud |
| Vodel 2027 | 4 redukud |
| Praznuičend | Joga voden, redukun ezmäižen ezmärgen |
| Tradicijad | Praznikazjtegod |
 Mediafailad RUWIKI-tedoiš | |
Mail'man arhitekturan päiv (ven.: Всемирный день архитектуры) — mail'man professionaline arhitektoroiden da arhitekturan kal'huziden tundijoiden praznik, praznuitas joga voden redukun ezmäižen ezmärgen.
Istorii
Sügüz'kus vodel 1946 Velikobritanian pälidnas, Londonas, mäni rahvahidenkeskeine suim, miččele kerazihe arhitektorad, kudambiden keskes oliba delegatad Sovetskijas Sojuzaspäi. Necil suimal pättihe tehta uz' organizacii, mitte sai nimen Rahvahidenkeskeine arhitektoroiden sebr (RAS)[1]. Nügüd' neciš sebras om läz sadad rahvahališt sekcijad, miččiden ühtnikoin om enamb millionad arhitektorad mail'man erazvuiččiš maišpäi.
Päliči nelläs voz'kümnes vodel 1985 Rahvahidenkeskeine arhitektoroiden sebran ištundal pättihe praznuita "Mail'man arhitekturan päiv" heinkun ezmäižen ezmärgen. No vodel 1996 Ispanian lidnas, Barselonas, ičeze 20. päassamblejal Rahvahidenkeskeine arhitektoroiden sebr päti sirtta "Mail'man arhitekturan päiv" redukun ezmäižeks ezmärgeks — necil päiväl Ühtenzoittud rahvahiden organizacijan ohjandusel praznuitas "Mail'man kodin päiv".
"Mail'man arhitekturan päiväl" oma jo ičeze tradicijad. Necil päiväl kaiken planetan arhitektorad keradase konferencijoile, simpoziumoile, forumoile, kus jagase ičeze tedoil da mahtištol, pätaba problemoid, miččed om sidotid sauvotusiden sauvondanke da udištandanke, tegeba tematižid paginoid. Paksus necil päiväl tehtas erazvuiččid ozutelusid da ekskursijoid[2].
Praznuičend Venämal
Venäman prezidentan käskön mödhe № 1099В "Venäman pauklahjoičendan sisteman paremboitusen tegoiš" voden 2010 sügüz'kun 7. päiväspäi kanman praznuičendad kerdan vodes Venäman Prezident tegeb käskön "Venäman rahvahan arhitektor"-arvnimen pauklahjoičendas.
Moskva
Vodelpäi 2008 Moskvas tehtas "Arhitekturan päiväd"-festival'. Se vedetas kaks' kerdad vodes — redukus (om omištadud Mail'man arhitekturan päiväle) i sulakus. Arhitektiran päiväl päazjas tehtas astund-, avtobus- da velokizrekskursijoid, miččil ozutadas nügüdläšt arhitekturad Sovetskijan aigan sauvotusid, uzid objektoid, käveltas arhitektoroiden pajoihe, vedetas lekcijoid da paginoid, azjtegoid, miččed om oigetud uden da vanhan arhitekturan kosketusile. Festivalin sädai om "P-Arch"-agenstv, kuratorad — Aleksandr Zmeul da Natalia Aleksejeva.
Nižnii Novgorod
Rahvahidenkeskeine arhitekturan päiv pidetas Nižnijas Novgorodas vodelpäi 2006. Necen lidnan eläjad oma ezmäižed, ked zavodiba pidäda necile päiväle omištadud fesival'. Festivalin tomotai da kurator om Marina Ignatuško. Programmas oma erazvuiččed ozutelused, lekcijad, akcijad, ekskursijad. Festivalin kaikenaigaižed partn'orad oma Nižnijan Novgorodan Venäman arhitektoroiden sebran organizacii, "U-kon"-kompanii, ven.: «О’город»-arhitekturb'uro, Sergei Tumanin galerei, А3-taidehpirdajiden jouk, "Ciferblat"-joud avaruz'.
Jekaterinburg
Praznuičend Jekaterinburgas vodelpäi 2011 mäneb TATLIN-painišton ohjandusel. Heinkun ezmäižen ezmärgen tehtas praznik londusel. Vastusen aigan tehtas ozuteluz, kus oma mel'pidod arhitekturan polhe. Mugažo arhitektorad vändaba Gorodki-vändaha, söba hilel žardud lihad i iloitelese veresel il'mal.
"Mail'man arhitekturan päivän" jogavoččed temad
Joga voden praznikal om tem, mitte om sidotud arhitekturanke:
- 2007 — "Lidnad — toivon magnitad" (angl.: Cities, magnets of hope);
- 2008, 6. redukud — oli omištadud Džankarlo Jusale, tetabale arhitektorale, Rahvahidenkeskeine arhitektoroiden sebran vice-prezidentale, kudamb koli 4. heinkud vodel 2005[3]. Devizaks tegihe "Child be the Architect of a better future" (Laps', tehte parahiman tulijan aigan arhitektoraks" vai "Lapsen da arhitektoran pagin") pajospäi, miččele Džankarlo kirjuti runoid;
- 2009 — "Arhitektoran energijad — vobištelendele suren krizisanke"[4].
- 2011, 3. redukud — "Arhitektur i ristitun oiktuded"[5];
- 2012 — "Arhitektorad — lidnoiden reformatorad""[6];
- 2015 — "Arhitektur, sauvond, il'mišt" "Tegendad i niiden pätused"[7].
Homaičendad
- ↑ Международный союз архитекторов. uaa.az. Дата обращения: 19 kül'mkud 2025.
- ↑ Всемирный день архитектуры. ria.ru. Дата обращения: 19 kül'mkud 2025.
- ↑ Джанкарло Юса (Gancarlo Ius), известный архитектор, вице-президент МСА. architectsjournal.co.uk. Дата обращения: 19 kül'mkud 2025.
- ↑ Энергию архитектора — на борьбу с глобальным кризисом. archi.ru. Дата обращения: 19 kül'mkud 2025.
- ↑ Союз архитекторов России | Всемирный день архитектуры. uar.ru. Дата обращения: 19 kül'mkud 2025.
- ↑ Архитекторы — реформаторы городов. realty.ria.ru. Дата обращения: 19 kül'mkud 2025.
- ↑ 2015 год на сайте агентства союзов архитекторов. Дата обращения: 19 kül'mkud 2025.