Klassan pämez'
| Klassan pämez' | |
 | |
Tedooblast' |
kazvatuztedo, kazvatuz da openduz |
|---|---|
Klassan pämez' (ven.: Кла́ссный руководи́тель) om opendai, kudamb ohjandab klassan da klassan irdpolišt kaiken klassan openikoiden radod školas da radmahttehnikumoiš. Venämal augotižškolas klassan pämehen velguded oma opendajal, mitte vedäb klassan, ülembaižil školan pordhaižil da radmahttehnikumoiš — ned oma pandud openduzorganizacijan administracijan pätandan mödhe openduzpredmetan opendajale, kudamb radab neciš klassas vai joukus. Äjiden maiden openduzsistemoiš völ voidas panda klassan pämeheks mehid opendajiden joukuspäi.
Istorii
Klassan pämehen institutan augonpanend Venämal om voz'sadalpäi XIX, konz openduzorganizacijoihe tuli uz' radsija — honusen kacui. Rahvahaline openduzministerstv vodel 1813 painzi käskon pansioninstitutoidenno honusen kacujoiden tegemižes, kudambiden pätegend oli "oigeta lapsiden moralin tundmust da personaližid pirdoid, kazvatada tarbhaižid da todesižid kodiman poigid". Küzud honusen kacujiden täht oliba korktad — heile pidi ičeze ozutesel kazvatada moralin tundmust, teta verhaid kelid. Honusen kacujil oli ühthine kazvanikoidenke stol, öduiba hö honusiš, kus magaziba kazvanikad jäl'gendusen mödhe, kävuiba urokoile, abutiba urokoidenke, pidiba hol't puhthudes. Kacundan pätego kazvanikoiš oli vigoiden kodvind "kelen, moralin da magun vasthapäi", sikš ku openikoiden ičtäzevedändale pidi sättuda venälaižen aristokratijan normoihe.
Edeližed klassan pämehen institutan vajehtused om märitud voden 1864 Käskol, mitte tegi klassan nevonikoiden institutan, a akoiden gimnazijoiš — klassan damoiden institutan. Klassan nevonikoiden rad tegihe ei varjoičusine (nece funkcii sirdihe klassan nevonikan abukikale), a sai kazvatuzharakterad[1].
Vodel 1930 Sovetskijas Sojuzas tuli uz' radsija klassan joukunvedäi. Sidä aigahasai kazvatuzradon joukuiš vediba opendajad. Klassan pämehen radsija Sovetskijas Sojuzas om vahvištotoitud Valdmehišton käskol vodel 1934. Toine käsk klassan pämehen radsijas om Valdkundaližiš azjbumagoiš vodel 1960. Sen jäl'ghe Openduzministerstvan azjbumagad klassan pämehen rados oma metodikkirjeižes vodel 1975, а sidä jäl'ghe vodel 2001. Vozil 1990, konz heitiba radon pioneroiden da komsomolan organizacijad, klassan pämehen rad äjiš azjoiš oli kadotud. Nügüd' Venämal klassan pämez' om sidopala openikan da openduzpredmetan opendajan keskes, školan da vanhembiden keskes, lapsen da ümbärdai mail'manke[2].
Jevropan maiš klassan pämehen institut kehitoitihe ka muga. Germanias (saks.: Klassenlehrer), Francias (franc.: professeur principal), Skandinavian maiš (roč.: Klasslärare) klassan pämehed tehtas sidä radod, kut i venälaižed. Amerikas klassan pämehed (angl.: homeroom teacher) oma vaiše augotižškolas, a sidä jäl'ghe ned velguded oma kuratoroil, kudambad oma kingitadud joga openikan taga. Hö nevodas openikoile predmetoiden valičendas, aigmäras, radon valičendas da školan jäl'geližes openduses[3]. Velikobritanias jogahižel openikal om opendai (angl.: tutor), kudamb tarkišteleb hänen satusid openduses, sportas da toižiš školan elon erištoiš[4].
Tegendad
Pedagogižes vajehnikas Kodžaspirovan G. M. da Kodžaspirovan A. Ju. toimištos klassan pämez' (kazvatai) om pedagogine radnik, kudamban radoho mülüb hüviden oloide tegemine lapsen personaližen kehitoitusen täht, hänen kazvatuzsisteman tarbhaine vajehtuz, abu problemoiden pätandas, miččed voidas olda lapsil toine toižen keskes, opendajidenke, vanhembidenke, klassankundan ohjanduz da kazvatuz[5].
Rožkovan M. I. "Klassan pämehele"-abukirjas om nece pätuz: klassan pämez' om školan opendai, mitte om lapsiden elon ohjandai, heiden kožmuzsidomusiden kodvii da jügedoiš rad- da psihologižiš školan elon azjtegoiš ičeze klassan kazvanikoiden kaičii[6].
Klassan pämehen tegendoihe mülüb:
- Klassankundan tegend da kehitoituz;
- Hüviden psihologo-pedagogižiden oloiden tegemine personan kehitoitusen täht, joga openikan ičenaižen vahvištoitusen täht, kaites hänen personaližid erigoičusid;
- Tervhen elonladun kehitoituz;
- Kosketuzsisteman tegemine erazvuiččiden klassankundan kazvatuzradon formiden abul;
- Openikoiden oiktusiden da melentartusiden kaičend;
- Sistematižen radon openikoidenke tegend;
- Gumanizacii kosketusid openikoiden keskes, openikoiden da opendajiden keskes;
- Kehitoituz openikoil moralin tundmust da hengelišt orijentiroid;
- Social'no znamasižen openikoiden sädairadon tegend[7].
Velguded
Klassan pämehen velguded oma:
- Openikoiden opendusen, ičenäzevedändan, kävuimäran monitoring da tarkištelend;
- Kosketuz vanhembidenke — vanhembiden keradusiden vedänd;
- Abu ridoiden pätandas, neniden ridoiden profilaktik, sen lugus psihologoiden, socialradnikoiden da oigedjärgendusen organoiden radnikoidenke ühtes;
- Klassančas-urokan vedänd, miččen aigan pagištoitas aktualižiš päküzundoiš, tedotase oficialine informacii, praniruičese klassan irpoline rad;
- Antta abu školan irpoližiden azjtegoiden mänetandan aigan — klassan tundištoituzmatkoiden muzejihe da teatroihe ohjanduz da toine;
- Azjbumagoiden vedänd, mitte lugetiž rippub školas, miččes radab opendai[8].
Venämal
Venälaižed opendajad klassan pämehen rados sadas jogakuižen ližarahapaukan. Venäman valdmehišton käskon mödhe 1. keväz'kuspäi vodelpäi 2024 ližaabu om 10 tuh. rubl'ad eländsijoiš, miččiden eläjiden lugumär om vähemba 100 tuh. mest, 5 tuh. rubl'ad lidnoiš, miččiš eläb enamba 100 tuh. mest[9].
Vodelpäi 2020 jogahižen voden mänetadas Ühthižvenälaižen klassan pämehiden forum. Azjtegon sädab Venäman openduzministerstv prezidentan Vladimir Putinan käskon mödhe. Foruman programmaha mülüba openduz-, pagištoituz- da kulturpalad. Skiperad da azjtedajad oma todesižed tundijad. Opendajile nece tandreh andab voimusen vajehtadas openduzmahtištol[10].
Foruman memorandumaha om mülütadud mugomd aspektad:
- Cifrovii kirjmaht, kut nügüd'läižen opendajan tarbhaine pala;
- Lapsiden varumatomuz' mail'man internet-openduzümbrištos;
- Urokan irdpoline rad, kut sur' kazvatuzvara;
- Klassančas-urok om klassan pämehen da openikan kosketusiden aktualine form;
- Klassan pämehen da vanhembiden ühthine rad — nece om lapsen kazvatuzprocessan jagamatomuden garant[11].
Homaičendad
- ↑ Е. В. Корябкина. Становление и развитие института классного руководства в России. cyberleninka.ru (2011). Дата обращения: 22 sügüz'kud 2025.
- ↑ Матвиевская Т.Н. История института классного руководства (русский) // Восьмое измерение : газета. — 2021. — 1 октябрь (№ 35). — С. 1.
- ↑ Система школьного образования в США. www.iqconsultancy.ru. Дата обращения: 22 sügüz'kud 2025.
- ↑ Роль тьютора в организации воспитательного процесса в школах Великобритании. 2konferentsia.ucoz.net. Дата обращения: 22 sügüz'kud 2025.
- ↑ Коджаспирова Г. М., Коджаспиров А.Ю. [https://irina-bateneva.ucoz.ru/books/kodzhaspirovy-pedagogicheskij_slovar.doc А.Ю. Педагогический словарь: Для студ. высш. и сред. пед. учеб. заведений.]. — М.: Издательский центр «Академия», 2000. — С. 38 с.. — 176 с. с.
- ↑ Классный руководитель. sh-vadinskaya-r66.gosweb.gosuslugi.ru. Дата обращения: 14 sügüz'kud 2025.
- ↑ Об утверждении методических рекомендаций об осуществлении функций классного руководителя педагогическими работниками государственных общеобразовательных учреждений субъектов Российской Федерации и муниципальных ... (не нуждается в госрегистрации) от 03 февраля 2006 - docs.cntd.ru. docs.cntd.ru. Дата обращения: 22 sügüz'kud 2025.
- ↑ Классный руководитель в школе: кто это, зачем нужен, обязанности и права, роль в образовательном процессе, Lenta.RU. Дата обращения: 22 sügüz'kud 2025.
- ↑ Правительство утвердило постановления об увеличении размера выплат за классное руководство и кураторство. government.ru. Дата обращения: 22 sügüz'kud 2025.
- ↑ Стартует прием заявок на V Форум классных руководителей. Минпросвещения России. Дата обращения: 14 sügüz'kud 2025.
- ↑ Форум классных руководителей (неопр.). Форум классных руководителей. Дата обращения: 22 sügüz'kud 2025.
Literatur
- Классному руководителю: учеб.-метод. пособие / ред. М. И. Рожков. — Москва: Владос, 1999. — 280 с. — ISBN 5-691-00370-4.
Opendusen sistem | |
|---|---|
