Kitai

Kitain Rahvahaline Tazovaldkund
中華人民共和國
(Čžunhua Žen'min' Gunhego)

Flag	Valdkundznam
Pälidn	Pekin
Eläjiden lugu (2018)	1,384,688,986 ristitud
Pind	9,596,960 km²
Kel'	kitain
Valdkundan pämez'	Si Сzin'pin
Päministr	Li Kecän
Religii	konfucijanuskond, daosizm
Val'ut	kitain juan' (CNY) (¥ • 元 • 圆 • 圓)
Internet-domen	.cn (k. mug. — Kitain internet-domenad)
Telefonkod	+86
Aigvö	UTC+8

Kitai (ičeze nimi — pin'jin': Zhōngguó, vepsän kirjamil Čžun Go «keskvaldkundad»), täuz' oficialine nimi om Kitain Rahvahaline Tazovaldkund (pin'jin': Zhōnghuá Rénmín Gònghéguó, vepsän kirjamil: Čžunhua Žen'min' Gunhego) om valdkund Azijan päivnouzmas. Se om kaikiš suremb valdkund mail'mas ristitišton lugun mödhe. Pälidn om Pekin.

Kitai om ÜRO:n kaikenaigaine ühtnii sen alusenpanendan aigaspäi. Kitain armii om kaikiš suremb aktivižen mülükundan mödhe (2,035 mln ristituid). KRT kodvi ičeze atombombad vn 1964 redukus. Järed ripmatoi kosmine programm om valdkundal.

Istorii

Vl 221 EME Cin' Šihuandi ühtenzoiti Kitain maid imperijaks ezmäižen kerdan.

Vn 1912 1. päiväl vilukud Kitain Tazovaldkundan aluz om pandud, se ohjandab Taivan'-sarel tähäsai.

Vn 1949 1. päiväl redukud tedotihe Kitain Rahvahaližen Tazovaldkundan alusenpanendas. Vozil 1949−1956 Kitai sädi tegimišton bazižid sarakoid NSTÜ:n abul. Marksistad tuliba valdha, i vedihe «suren hüpken» (1958−1966) i «kommunizacijan» politikad Mao Czedunan ohjastusen al. Vll 1966−1976 Kitai eli läbi kul'turrevolücijas. 1980-nzil vozil irdpol'ne politik kadoti agressivižust, zavodihe ižandusen ližakahid reformid, ristitišt söškanzi külläks. Ižandusen šingotez toi hüvid satusid.

Nügüdläine Konstitucii (pin'jin': Xiànfǎ, vepsän kirjamil Sän'fa) om nellänz' lugul revolücijan jäl'ghe, se om vahvištadud vn 1982 4. päiväl tal'vkud, möhembaižed vajehtused oliba vll 1988, 1993, 1999, 2004 i 2018.

Geografijan andmused

Fail:China topo1.jpg

Kitain topografine kart.

Kitai om mavaldkundröunoiš 14 valdkundanke, ned oma: Vjetnam (röunan piduz — 1297 km), Laos (475 km) i Mjanmar (2129 km) suves, Indii (2659 km), Butan (477 km), Nepal (1389 km) i Pakistan (438 km) suvipäivlaskmas, Afganistan (91 km), Tadžikistan (477 km) i Kirgizstan (1063 km) päivlaskmas, Kazahstan lodehes (1765 km), Mongolii (4630 km) i Venäma (4179 km) pohjoižes, KRDT (1352 km) pohjoižpäivlaskmas. Ühthine röunoiden piduz om 22 457 km.

Valdkundan pind om 9 596 960 km², otab koumant sijad mail'mas Kanadan jäl'ghe pindan mödhe. Kitain päivlaskmaižed randad lainištadas Kitain Päivnouzmmeri da Pakuine meri, suvižed randad — Kitain Suvimeri. Ühthine randanpird om 14 500 km.

Tibetan mägišt otab valdkundan suvipäivlaskmpalad. Turfanan alang, −154 m. Znamasižed joged oma Janczi da Huanhe. Mecad ottas territorijan 22,3 procentad.

Londuseližed pävarad oma mametallad), gidroenergii (kaikiš suremb mail'mas), mahuz.

Tobmuz

Kitain parlamentan pert'kulu Pekinas.

Ohjandusen form om unitarine socialistine tazovaldkund dominirujanke partijanke (Kitain Kommunistine Partii, KKP) päižeks. Valdkundan pämez' om Kitain ezimez', hän om KKP:n keskuzkomitetan päsekretar', hän-žo om armijan päkäsknik (Keskuzsodanevondkundan ezimez') tobjimalaz. Valdkundaližen Nevondkundan pämez' om ohjastusen ezimez'.

Parlament om üks'kodine Kaiken Kitain Rahvahan Ezitajiden Suim (pin'jin': Quánguó Rénmín Dàibiǎo Dàhuì, vepsän kirjamil: Cüan'go Žen'min' Daibäo Dahuei) 2970 ühtnijanke. Kaik rahvaz da azekahad väged valitas heid videks vodeks. Todesine käskusenandai tobmuz om KKP, parlament vaiše vahvištab sen pätandoid. Radonoigendai tobmuz om KRT:n Valdkundaline Nevondkund (pin'jin': Zhōnghuá Rénmín Gònghéguó Guówùyuàn, vepsän kirjamil: Čžunhua Žen'min' Gunhego Goujuan' ) vai Keskuzline rahvahaline ohjastuz (pin'jin': Zhōngyāng Rénmín Zhèngfǔ, vepsän kirjamil: Čžunjan Žen'min' Čženfu).

Kitain ohjandai (ezimez') om Si Сzin'pin vs 2013 keväz'kun 14. päiväspäi. Vs 2013 keväz'kun 15. päiväspäi Li Kecän om ohjastusen pämeheks. Parlamentan ühtnijoiden järgenduseližed valičendad oliba vn 2017 redukuspäi vn 2018 uhokuhusai (13. kucund).

Administrativiž-territorialine jagand

   Kacu kirjutuz: Kitain administrativiž-territorialine jagand.

Kitai jagase 34 regionaks: 23 agjad (provincijad), 5 avtonomišt agjad, 4 lidnad keskuzalištusenke (Makao). Regionad alajagasoiš 333 ümbrikoks, ned — 2853 rajonaks.

Eläjad

Vn 2010 Kitain rahvahanlugemižen mödhe eläjiden oficialine (rahvahanikusenke) lugu oli 1 339 724 852 ristitud, vl 2016 — 1 373 541 278 ristitud.

Kitaiš elädas kitajalaižed. Kaik om 56 etništ gruppad oficialižešti (2010): han' — 91,5%, čžuanad — 1,3%, toižed rahvahad i rahvahuden ozutandata — 7,2%.

Uskondan mödhe (2010): rahvahaližiden uskondoiden polenpidajad — 21,9%, buddistad — 18,2%, hristanuskojad — 5,1%, islamanuskojad — 1,8%, induistad — vähemba mi 0,1%, judaistad — vähemba mi 0,1%, toižed uskojad — 0,7% (sidä kesken daoistad), religijatomad — 52,2%.

Vn 2018 kezakus kaik oli 675 lidnad kontinentaližes Kitaiš. Lidnad-millionerad (lidnümbrikod enamba 6 mln. ristituid vn 2010 rahvahanlugemižen mödhe, surembaspäi penembha): Dunguan', Fošan', Čendu, Nankin. Vl 2017 kaik oli 102 lidnümbrikod-millionerad valdkundas kontinental.

Ižanduz

Vl 2010 Kitain kogosüdäiprodukt jäti jäl'gele Japonijan KSP:d, vl 2015 — AÜV:oiden produktad ostmižmahtusen paritetan mödhe, i nügüd' kaikiš suremb mail'mas. KRT om kaikiš järedamb eksportirui mail'mas, «mail'man fabrik» — materialižiden tavaroiden tegii. Tariž äi torhut da energetižid satandoid ižandusen täht, i se valatoitab lujas mail'man torguindlavoid. Kitai om ezinenas kuldan da valütan varan mödhe.

Homaičendad

Irdkosketused

Tobmuz

• Kaiken Kitain Rahvahan Ezitajiden Suiman oficialine sait (npc.gov.cn). (kit.)  (angl.)
• KRT:n Valdkundaližen Nevondkundan oficialine sait (gov.cn). (kit.)  (angl.)

Ühthine informacii valdkundas

• Kitain Rahvahaližen Tazovaldkundan informacine sait (china.org.cn).  (angl.) (kit.) (fr.) (saks.) (jap.) (ven.) (isp.) (arab.) (esper.) (kor.)