Primorsko-Ahtarsk

Primorsko-Ahtarsk
Флаг[d] Герб
46°03′00″ с. ш. 38°11′00″ в. д.
Valdkund	Venäma
Istorii da geografii
Tegemižen päiv	1854
Pind	18
Высота	2
Eläjad
Eläjad	▼30 238 чел. (2024)
Lugud
Telefonan kod	86143
Počtan indeksad	353860–353866
Mediafailad RUWIKI-tedoiš

Primorsko-Ahtarsk (ven.: Примо́рско-Ахта́рск) om Venäman lidn Krasnodaran randan lodehes. Se om Primorsko-Ahtarskan rajonan administrativine keskuz da lidnankund.

Istorii

Eländpunkt mainitase ezmäižen kerdan vl 1774 kuti anastadud turkil Ahtar-Bahtar-lidnuz (känduz: «mererandaline vauged kall'»). Vl 1854 ühtenzoittihe Ahtarskii-žilod kozakoiden futorišpäi. Vl 1900 žilo kändihe Primorsko-Ahtarskai-stanicaks (ven.: станица Приморско-Ахтарская). Stanic sai lidnan statusad vl 1949.

Primorsko-Ahtarskan meriport om olmas kalanpüdusen täht, mugažo kazvatadas da ümrbiratas kalad. Om severz'-se sömtegimišton toižid edheotandoid: jauhkombinat, maidtegim. Sötmižmerikoren samižen da ümbriradmižen tegim om üks'jäine mugoine valdkundas. Lotosan plantacijad kazdas lidnan ümbrištos. Lidn om klimatine lebutaho, tervehtajad veded rikvezinikanke.

Geografijan andmused

Lidn sijadase Azovmeren päivnouzmaižel randal, läz Ahtarskan i Jasenin lahtid, Azovveren da Kubanin tazangištol, kaks' metrad ü.m.t. keskmäižel korktusel. Matkad Krasnodarhasai om 150 km suvipäivnouzmha avtotedme vai raudtedme. Raudtestancijan nimi om Ahtari (ven.: Ахтари). Sodalendimport sijadase lidnan pohjoižpäivnouzmaiženno röunanno. Lähembaine lidn om Timašovsk 70 km suvipäivnouzmha orhal, raudtedme vai avtotedme.

Klimat om ven läm' kuivahk, ei olele lumikatet. Vilukun keskmäine lämuz om −0,8 C°, heinku om kaikiš lämhemb — +24,6 C°. Paneb sadegid 587 mm vodes, läz tazomäras kuidme.

Nell' eländpunktad om lidnankundas, ned oma kaks' pen't žilod (Primorskii, Ogorodnii) i Sadki-futor lidnan ližaks.

Eläjad

Vn 2010 Venäman rahvahanlugemižen mödhe eläjiden lugu oli 32 257 ristitud. Vl 2017 kaik 31 925 ristitud elihe lidnas i 34 596 ristitud kaikes lidnankundas. Kaikiš suremb lidnan ristitišt oli 34 tuhad eläjid vozil 1996−2001.

Rahvahad (enamba 0,4% vl 2010): venälaižed — 93,0%, ukrainalaižed — 2,5%, vaugedvenälaižed — 0,5%, armenijalaižed — 0,4%, toižed rahvahad — 2,9%, rahvahuden ozutandata — 0,7%.

Ortodoksižen hristanuskondan kaks' jumalanpertid oma avaitud lidnas: Nimitadud Eläbzdusen i Venäman Uden moknikoiden da pühäpaginan kundlijoiden.

Primorsko-Ahtarskan industrijan da servisan tehnikum om lidnan professionaližen opendusen aluzkundaks.

Edeližed lidnankundan pämehed (Administracijan pämehed) oma Artöm Sošin (keväz'ku 2020 — heinku 2022), Väčeslav Belik (reduku 2018 — keväz'ku 2020) i Vladislav Mavreško (2014 — reduku 2018).

Galerei

• Приморско-Ахтарск IMG 20200720 192419.jpg

  Lidnan tobmuden sauvusen tulend (2020)

• Приморско-Ахтарск IMG 20200721 144704.jpg

  Jumalanpert' sauvomižes, vn 2020 nägu

• Приморско-Ахтарск IMG 20200726 141828.jpg

  Ekstraordinarižiden situacijoiden ministrusen stancii vl 2020

• Памятник ленину набережная 02.jpg

  Vladimir Leninan muštnik randirdal (2011)

• Primorsko-Akhtarsk, Krasnodar Krai, Russia - panoramio.jpg

  Lendim muštnikaks vl 2013

Homaičendad

Irdkosketused

• Primorsko-Ahtarskan lidnankundan tobmuden sait (prim-ahtarsk.ru). (ven.)