Perhin Mihail Jevlampijevič

Рувики-späi

Venäman tedoakademijan azjtarkištuz

Logo-ran.png
Om tehtud
Venäman tedoakademijan azjtarkištuz
Venäman tedoakademii
В Рувики есть статьи о других людях с фамилией Perhin.
Mihail Jevlampijevič Perhin
Михаил Евлампиевич Перхин
Michael Perkhin.jpg
Sündundpäiv 22 semendkud (3. kezakud) 1860
Sündundsija
Kolendpäiv 28 elokud (10. sügüz'kud) 1903 (43 года)
Kolendsija
Ma
Polestajad Karl Faberže
Логотип РУВИКИ.Медиа Mediafailad RUWIKI-tedoiš

Mihail Jevlampijevič Perhin (ven.: Михаи́л Евла́мпиевич Пе́рхин, sündui 22. semendkud vodel 1860, Okulovskaja-der'uun, Šujan volost', Petroskoin ujezd, Oloncan gubernii — koli 28. elokud vodel 1903, Piter, Venäman imperii) — venälaine juvelir, "Faberže"-firman pämastar'[1].

Elostarin

Oli sündunu obel'nijas maorjan karjalaiž-lüdilaižes kanzas[2] Okulovskaja-der'uunas[3], Šujan volostiš, Petroskoin ujezdas, Oloncan gubernijas (nügüd' Jalguba-külä Änižröunas Karjalas). Hänen vanhembad — obel'nijad maorjad Jevlampii Arsenjevič (1825—1877) da Anna Trefilovna (1821—1899), oliba sündnuded Jalguban prihodas, ortodoksižed uskojad. Hö venčaihe vodel 1846 Pühän Nikolajan jumalanpertiš Okulovskaja-der'uunas. Oli videnz' seičemes lapsespäi kanzas (koume last koli edel hänen sündundad). Mihail Perhinan ristitat oli Pühän Nikolajan jumalanpertin djakon Matfei Počezerskii - sarelpäi.

Vozil 1878—1879 jäl'ghe tatan surmad Mihail Jevlampijevič ajoi Piterihe, kus zavodi opetas lidnan ühtel pämastaril, juveliral Vladimir Finnikoval. Hän radoi "Bolin"-firmas, mitte oli Faberžen päkonkurent[3]. Vodel 1881, konz hänele täudui 21 vot, hän oli pästtud l'gotan mödhe armijaspäi, sikš ku oli üksjaine kanznik, mitte voi rata (Mihailan mam oli leskiakan da norembale Nikolai-vellele täudui vaiše 15 vot).

24. vilukud vodel 1884 andoi pakičust Piterin Remeslennijaha upravaha, miše händast otaižiba kaikenaigaižeks mastrikš Hobedaižehe cehaze kuldaižen radon mödhe. Vodel 1884 nai hänen opendajan tütrel, 16-voččel Tatjana Vladimirovna Finnikoval[3].

Vodel 1886 Mihail Jevlampijevič sai mastrin nimen, oiktusen ičeze "ven.: М. П. (Михаил Перхин)" - kleimole da oli kuctud Karl Faberžel juvelirradole "Faberže"-firmaha[3].

Vodel 1888 Karl Faberžen abul sai Piterin pämehel P'otr Gresseral laskendad, miše avaita ičeze juvelirpajad, kus oli pämastrin-juveliran Faberžen pertiš 15 vot. Ezmäks Perhinan paja oli Piteriš Surel Morskajal irdal pertiš № 11, tulend oli südäimespäi Kirpičnijas irdkujospäi, a semendkuspäi vodelpäi 1901 — udes Faberžen firman päpertiš Surel Morskajal irdal pertiš № 24. Faberžen firm andoi Perhinan pajale ezipakičusid, kal'hid metalloid da kivid, andoi, ku oli mugoine tarbhuz', velgha den'goid da abuti möda vaumhid juvelirtehmusid. Mihail Perhinan päabunik pajas oli mastar' Henrik Vigström. Vodel 1891 Perhinan pajas jo radoi 16 mest. Vodelpäi 1891 Mihail Perhin oli 2. Gil'dijan kupec. Voziden 1890 lopuks Perhinan pajas radoi jo enamba 50 mest.

Kaikes Perhinan pajas oli tehtud enamba 20 tuhad juvelirtehmust. Pajas mäniba čekannijad da grav'ornijad radod kuldan da hobedan möto, kivitehmusiden opravad, äikerdaižed kal'hed juvelirčomitesed da lahjad: renghad, kurtuhkad, tabakerkadhibusiden kingitimed, škatulkad, portsigarad da äi tošt.

Mihail Perhinan pajas oli tehtud 28 imperatoran äiväivän munad, siš lugus mugoižed šedevrad kut "ven.: Дворцы Дании", "ven.: Бутон розы", "ven.: Мадонна Лилия", "ven.: Транссибирский экспресс", "ven.: Медный всадник" da toižed, mugažo kaik seičeme äipäivän munad Kel'h-Bazanovoiden kanzan täht; mugoižed äipäivän munad kut "ven.: Ротшильдовское", "ven.: Мальборо", "ven.: Скандинавское" da toižed[3].

Äipäivän munoiden temad paksus paniba muštho Venäman valdkundan da carin kanzan znamasižed azjtegod.

Vodel 1897 Mihail Perhin tegi "ven.: Коронационное яйцо" imperatoran Nikolajan II ezmäižen koronacijan muštoks. Hän čomenzoiti sidä kuldaižel emalil, pirdi päiväižen sadegid da raudristikon lavrlehtesišpäi, kaks'päižed sured habukad. Südäimes — karetan todesine kopii, miččel imperatrica Aleksandra F'odorovna ajoi koronacijale.

Vodel 1900 lopihe Transsibirin raudten sauvomine. Necen tärktan azjtegon muštoks oli tehtud üks' kaikiš melentartuižembišpäi radoišpäi — Äipäivän lahjmuna, miččen nimi oli "ven.: Транссибирский железный путь" (todesižen ezmäižen sibir'pojezdan - platinparovozan model', kus oma farad almazoišpäi da fonar' rubinaspäi da viž kuldašt vagonad mägihrustališpäi da allekirjutesed: "počtan", "akoiden täht", "pipkutajiden täht", jäl'gmäine vagon — "pühäpert'"). Muna ozutadihe Mail'man ozutelusel Parižas vodel 1900.

Vodel 1902 Mihail Perhin tegi "ven.: Гатчинский дворец"-munan. Se om jagatud 12 segmentaha penil oiktoil helmäižil. Om čomenzoitud ornamental rusttoiš bantoišpäi, vihandoiš lehtesišpäi, tedon da taidehen simvoloišpäi. Munan s'urpriz — imperatrican Maria F'odorovnan armhan rezidencijan, Gatčinan dvorcan model', mitte om tehtud nel'l'mujuižespäi kuldaspäi, kus om ozutadud kaik arhitekturan erigoičused da Pavlan I muštpacazfasadan edel.

Mihail Perhin tegi mugoižed Äipäivän munad kut "ven.: Белые лилии", "ven.: Ландыши", "ven.: Анютины глазки", "ven.: Клевер". "ven.: Анютины глазки" - muna om tehtud siledas muzavihandas nefritaspäi. Sidä ümbärzoitaba hoikad koveroitud seikheižed änikoidenke da an'utinoiden sil'mäižiden änikurbidenke brilliantoišpäi, rubinoišpäi da kirjavas emališpäi. Munan peitčud — südäinvuitte ümbärduz. Vauktal tagamal om ozutadud imperatrican Maria F'odorovnan brilliantvenzel' da 11 Romanovoiden kanznikoiden pen't modkuvad. Vauktoiden lilijoiden kirb om tehtud oniksaspäi tičinkoidenke brilliantoišpäi, munan päs oma časud. Časud oma zavodnijad, no strelk seižub sijal, mäneb vaiše emaline vöine, mitte om čomenzoitud brilliantoil rimluguidenke.

Vodel 1895 Perhin oli pauklahjoitud arvostadud ristitun arvnimel, sikš ku tegi tehmusid imperatoran täht. Necil-žo vodel kanz ajoi Carskoje Selo - lidnaha, kus Mihail Jevlampijevič osti puižen pertin kaikenaigaižen elon täht[3].

Mihail Perhinan jäl'gmäine rad oli tehtud vodel 1903: nece oli "ven.: Пётр Великий"-muna, se oli omištadud 200-voččeks jubilejaks, konz oli zavot't'ud Piter-lidnan sauvomine. Munan südäimes oli Fal'konen radon tetaban "Mednijan vsadnikan" penikaine replik kal'l'ol sapfiraspäi[1].

Vozil 1896—1903 Mihail Jevlampijevič oli Jalguban zemskijan učiliščan popečitel'an. Vozil 1899—1900 lahjoiči Pühän Nikolai Čudotvorcan nimel pühäpertile Jalgubas kal'hed kuldaižed hobedad jumalanslužboiden sosudad[4], da kuldaižen laudaižen, kus oma čekannijad uzorad Mihail Perhinan heimolaižiden muštoks.

Mihail Perhinan koli 28. elokud vodel 1903 "ven.: сухотка спинного мозга" läžundaspäi bol'nicas hengläžujiden täht[1]. Om mahapandud Piterin Novodevičjal kaumištol[5].

Mihail Jevlampijevič zavetoiči pajan da kaiken instrumentan ičeze ezmäižele abunikale Henrik Vigströmale. Hän jäti akale da videle lapsele 25 rubl'ad kaikuččele, Maria-sizarele — 500 rubl'ad. Ristilapsile, openikoile, mastrile da radnikoile — 100 rubl'ad kaikuččele.

Kanz

Tatjana Vladimirovna Perhina
  • Ak — Tatjana Vladimirovna (neiččen familii Finikova), koli vodel 1907 Carskoje Selo - lidnas, om mahapandud Novodevičjal kaumištol Piteriš ei edahan mužikan kaumaspäi[1].
    • Tütär — Jevgenii (1884—1932), oli mehel toižen kerdan potomstvennijan dvor'aninan, juristan Georgii Jevsejevič Badriašvilin taga (1881—1961). Kanz ajoi vodel 1917 Piterišpäi Tiflisaha da eläškanzi Badriašvilin heimpertiš Ovleviš[6].
    • Tütär — Aleksandra (17. sulakud vodel 1896 — 26. redukud vodel 1979; mehel Bode-Bodei), ajoi Sovetskijal Venämalpäi ühtes mužikanke - štabs-kapitananke Jevgenii Jevgenjevič Bode-Bodejanke (1893—1974) voziden 1920 augotišes, om mahapandud ühtes mužikanke serbian kaumištol Kolmas, läz San-Franciskod[7].
    • Tütär — Anna (1900—1942), koli Leningradan blokadas.
    • Tütär — Zinaida, koli vodel 1944 Baku-lidnas.
    • Poig — Mihail (1894—1941)[8].

Mušt

Ezmäižen kerdan Mihail Perhinan kaum oli löutud XX voz'sadan lopus da oli udes tehtud muretud muštkivi — Karl Faberžen muštfondan tedosekretarin, juvelirtaidehen istorijan tedomehen Valentin Skurlovan da Öbokan Juveliroiden ühtištusen pämehen A. S. Gorin'an abul.

Pauklahjad

Karl Faberžen muštfond vodel 2009 tegi pauklahjan — "150 vot Mihail Perhinale" - arvznaman, miččel pauklahjoitasoiš nügüd'aigaližed parahimad mastrid-juvelirad[9].

Muzejad

Jalguban Istorijan muzejas om ekspozicii, mitte om omištadud Mihail Perhinale.

Toponimii

Petroskoiš om nimitadud Perhinskajan ird juveliran muštoks.

Muštznamad

Heinkus vodel 2022 Istorijan muzejan seinäl om ripputadud muštlaud Mihail Perhinan muštoks. Tekst muštlaudal om kirjutadud venän da karjalan kelil.

21. kül'mkud vodel 2022 Petroskoiš Vägestusen puištos (German Titovan irdan laskendal läz Änižen randirdad) om avaitud Mihail Perhinan muštoks.

Homaičendad

  1. ↑ 1 2 3 4 Кузнецова, 2017.
  2. ↑ В Ялгубе установили памятную доску известному русскому ювелиру. Дата обращения: 11 heinkud 2022. Архивировано 11 heinkud 2022 года.
  3. ↑ 1 2 3 4 5 6 Слепкова, С. Михаил Перхин – крестьянин-ювелир. «Вести Карелии» (29 sügüz'kud 2011). Дата обращения: 30 kül'mkud 2019. Архивировано 10 tal'vkud 2019 года.
  4. ↑ Знаменитый ювелир из Ялгубы. Дата обращения: 18 kezakud 2014. Архивировано 2 uhokud 2014 года.
  5. ↑ Найдена могила ювелира Перхина М. Е. Дата обращения: 18 kezakud 2014. Архивировано 2 uhokud 2014 года.
  6. ↑ Скурлов В. В. Михаил Евлампиевич Перхин
  7. ↑ Боде-Бодей Евгений Евгеньевич. ria1914.info. Дата обращения: 7 semendkud 2019.
  8. ↑ Перхин Михаил Михайлович. Дата обращения: 27 keväz'kud 2021. Архивировано 15 sulakud 2021 года.
  9. ↑ Почётный знак «150 лет Михаилу Перхину». Дата обращения: 1 heinkud 2014. Архивировано 14 heinkud 2014 года.

Literatur

  • Скурлов В. В., Смородинова Г. Г. Фаберже и русские придворные ювелиры. — М., 1992
  • Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД «ПетроПресс», 2009. С. 361—464 с.: ил., карт. ISBN 978-5-8430-0125-4 (т. 2)
  • Кузнецова Л. К. Михаил Евлампиевич Перхин // Петербургские ювелиры XIX – начала XX в. Династии знаменитых мастеров императорской России. — Москва: Центрполиграф, 2017. — ISBN 978-5-227-07179-8.

Tarkendused

Om sadud "https://vep.ruwiki.ru/w/index.php?title=Perhin_Mihail_Jevlampijevič&oldid=524999"