Anastasia Logačova

Рувики-späi
Anastasia Jegorovna Logačova
ven.: Анастасия Егоровна Логачёва
Anastasia Logačova.jpg
Sündundpäiv 1896(1896)
Sündundsija: Šoutjärv-külä
Rahvahuz' Sovetskii Sojuz→Venäma
Professijad: vepsläine sarnoičii


Anastasia Jegorovna Logačova (ven.: Анастасия Егоровна Логачёва) om sündunu vodel 1896, Šoutjärv-posadas, Änižröunas, Karjalan Valdkundas, Sovetskijas Sojuas — koli vodel 1987 — Šoutjärv-posadas, Änižröunas, Karjalan Valdkundas, Venämal, vepsläižen fol'kloran tundii, vepsläine sarnoičii[1].

Elostarin

Om sündunu Šoutjärv-posadas sures maorjan kanzas. Hänel oli seičeme velled da sizared. Anastasia läksi mehele sovetskijan valdan ezmäižil vozil, konz külälaižes elos mäniba sured vajehtused: sünduiba kolhozad, likbezad. Necen aigan polhe hän johtuti muga:

«Minä vodel 1930 üks' ezmäižišpäi tulin kolhozaha radole. Radoin se pöudol, se hebol, se kladovščikan, vozil 1940—1941 olin eskai kolhozan pämehen. Kazvatin lapsid üknäin jügedoiš voinan voziš. Kazvatin nel'l' last, openzin kaikid, nügüd' minai om 12 vunukad, kuz' pravunukad — om kelle starinoita sarnoid».

Mamoi starinoiči Anastasijale sarnoid, a mamale - hänen mamoi (minun baboi). Sarnoid starinoitihe ičemoi kelel, sikš ku venäks ei tekoi ni üht sanad, hö molembad ei mahtnugoi ni lugeda, ni kirjutada. Hänen kanzas kaik teziba sarnoid: hän, velled, sizared.

Anastasia mahtoi starinoita ei vaiše sarnoid ičemoi kelel, no mahtoi hüvin voikta-ki. Hän tezi nevestan svadibvoikuid,tezi äi puhegid pahudespäi. Hän tezi lujas äi aforizmoid, muštatešid, sanutesid. Hän paksus starinoiči amuižiš vepsläižiš veroiš, tradicijoiš, elon polhe. Erased änetused, miččid tedomehed kirjutiba vepsläižil, kaičesoiš Karjalan tedokeskusen arhivas.

Mahtoi rata käzil. Hänen käzipaikad da toižed tehtud käzil tehmused kaičesoiš Šoutjärven vepsän rahvahan etnografižes muzejas R.P. Loninan nimel. Hän jäti muštlosid ičeze polhe, sikš ku mahtoi spravitoitta rahvast. Hänennoks tuldihe Änižröunan edahaižiš külišpäi[2].

N.F. Oneginan da M.I. Zaicevan "Vepsän rahvahan sarnad"-kirj zavodiše Anastasia Logačovan sarnoišpäi. Hänespäi om kirjutadud 15 sarnad: «Проклятая дочь», «Мачеха и падчерица», «Замарашка Варвей», «Отец и дочь» da m.e[3].

Voik mamad möto

Anastalia Logačovan voik pohjoižvepsän kelen paginal muštoks maman polhe[4]

“Käte-ške käbedaks kägoihudeks”[5]:

Ka kuspei tuli nece bedaine? Да откуда пришла эта беда?

Tuli miile pimed päiväine, Пришел к нам темный денек,

Kadoi lämmoi milei sil'mišpei, исчез свет с наших глаз,

Tuli sinus kibu kohtule. появилась из-за тебя боль в животе.

Kut vel däda mili sinuspei? Как нам остаться без тебя?

Homezpäiväižed kut vastata? Рассветы как встречать?

Ühtein sina mindei dätid kut? Как одну ты меня оставила?

Kut-žo olda nügud sinuta? Как же быть теперь без тебя?

Om vel sanunu, kut eläda, Еще сказано, как жить,

Miččel dorogaižel kävuda, По какой дороженьке ходить,

Sinuta ken holid hubendab, Без тебя кто хлопот убавит,

Ken vel igad mili ližadab. кто еще век нам продлит,

Aveikatoi, kaidad uksuded, откройтесь, узкие дверцы,

Alegatoi, korktad mecaižed, станьте ниже, высокие леса,

Mänem mamuškon mö koumaižele. пойдем мы на матушкину могилушку.

Dätin armhan maman houdeižehe, Оставила любимую маму в ямушке,

Lämbitagha sindei vilupäiv, пусть согреет тебя холодный день,

Tulgha kebnas tänna keväz’aig, пусть легко придет сюда весенняя пора,

Paštkaha päiväine sinunno d’oga homesel, пусть светит у тебя солнышко каждое утро,

Liinen muštmaha sindei d’oga päiväižel. буду вспоминать тебя каждый день.

Sina kuldaine, oi, miide mamoine, Ты золотая, ой, наша мамочка,

Lujas olid kaikiš armhemba. была ты самой любимой.

Kut sinuta pidab eläda, Как без тебя придется жить,

Pit’kad päiväd tuskas vedada? долгие дни в тоске проводить?

Kumarzimoi mina sinun edehe, Склонилась я перед тобой,

Satoin däl'gmäižehe udhe kodihe, доставила в последнее новое жилище.

Nügud uniš vaise sindei nägištan, Теперь во сне только тебя увижу,

vahvas uindan, siloi vaise unohtan. крепко засну, тогда только позабуду.

Alevtina-tütär

Tetab kaikile vepsläine runoilii, lehtmez' da Karjalan radioradnik Alevtina Andrejeva om Anastasijan tütär. Necidä lahjavut kirjutamha ičemoi kelel hän oti mamalpäi. Mam openzi tütärt čomin pagižmaha vepsän kelel, opendamha ičeze Kodimad. Alevtinan runod om paindud erazvuiččihe lehtesihe, kulehtesihe, al'mahahoihe, runokogomusihe da openduzkirjoihe.

Mušt

Šoutjärv-posadas Počtan irdal pertiš nomer 17, mitte seižub ei edahan Šoutjärven muzejaspäi, eli vepsän rahvahan kaks' loštajad, kal'hed ezitajad: vepsläine sarnoičii, tervehtoitai da voikii Alastasia Jegorovna Logačova (1896 - 1987) da hänen tütär - runoilii, lehtmez' da radioradnik Alevtina Ivanovna Andrejeva (1938-2001).

Anastasia Jegorovna oli lujas lahjakaz saroičii pohjoižvepsläižiden keskes Änižröunas. Hänen pagin oli kaiken täuttud ičeladuižil rahvahaližil aforizmoil, muštatešil, sanundoil. Hän lujas äjan tezi vepsän rahvahan elos, mahapanend- da saiveroiš, voikuiš, puhegiš. Äjad tedod hän andoi ičeze Alevtina-tütrele. Alevtinad tet'he kaikuččes vepsläižes küläs Änižröunas. Händast varastet'he kaikuččes vepsläižes pertiš. Kut lehtmez' hän starinoiči ičemoi röunan kaikiš problemoiš, kingiti valdmehišton homaitust niiden pätandaha. Äjan starinoiči külän eläjiš. Hän oli Karjalan radion üks' ezmäižiš vedäjišpäi vepsän kelel.

Šoutjärven muzejas kaikuččen voden tehtas muštehtad, konz johtutadas Anastasia Logačovad da Alevtina Andrejevad.

Literatur

  • Онегина Н. Ф., Зайцева М. И., Vepsanrahvahansarnad — Вепсские народные сказки. Петрозаводск, 1996.
  • Аникин В. Н. Русская народная сказка. М., 1959.
  • Богданов Н. И. Народность вепсы и их язык // Тр. Карельского филиала АН СССР, сер. Прибалтийско-финское языкознание. Вып. 12, Петрозаводск, 1958. С. 63-75.
  • Зайцева М. И., Муллонен М. И. Словарь вепсского языка. Л., 1972.
  • Зайцева М. И., Муллонен М. И. Образцы вепсской речи. Л., 1969.
  • Пименов В. В. Вепсы. Очерк этнической истории и генезиса культуры. М.-Л., 1965.
  • Пропп В. Я. Морфология «волшебной» сказки., М., 1998
  • Русская сказка (Собрание трудов В. Я. Проппа). Под ред. Расскаэова Ю. С., М., 2000
  • Северные предания (Беломорско — Онежский район) — Сост. Криничная Н. А., Л., 1978.
  • Хямяляйнен Л. Вепсский язык // Языки народов СССР. М., 1966. Т. 3

Homaičendad

  1. ↑ Новая выставка в Шелтозерском музее. Дата обращения: 16 kezakud 2016.
  2. ↑ Слово о сказительницы Анастасии Логачёвой.
  3. ↑ Miška i Маša, подкорпус вепсских сказок, Корпус вепсского языка. Информант: Логачева Анастасия Егоровна.
  4. ↑ Voik mamad möto.
  5. ↑ Käte-ške käbedaks kägoihudeks. Вепсские причитания.
Om sadud "https://vep.ruwiki.ru/w/index.php?title=Anastasia_Logačova&oldid=531787"