Aleksandr Nikonov
| Aleksandr Jefimovič Nikonov | |
|---|---|
| Täuz' nimi | |
| Sündundpäiv | 10. sulakud 1923 |
| Kolendpäiv | 1978 |
| Ma |
Venäma Sovetskii Sojuz |
| Pajosebrad | Vepsän rahvahan hor |
Aleksandr Jefimovič Nikonov (ven.: Александр Ефимович Никонов), (sündui 10. sulakud vodel 1923, Venäma, Karjalan radkommun, Vasiljevskaja-külä, Šokš — koli vodel 1978) — muzikant, fol'kloran keradai, Vepsän rahvahan horan pämez' (vozil 1946-1975).
Elostarin
Aleksandr Jefimovič Nikonov om sündunu 10. sulakud vodel 1923 Šokšun Vasiljevskaja-külähä[1]. Kanzas oli kuz' last, Aleksandr oli noremban lapsen. Hänen laps'aig oli juged sikš, ku ühten aigan pidi abutada vanhembile da opetas školas. Lopi seičeme klassad školas da päzui opendamhas Petroskoihe keitajan kursoile. Lopi kursad da vähan radoi keitajan «Pohjoine»-adivpertiš Petroskoiš.
Hänel oli sur' taht sada muzikopendust. Vodel 1939 päzub opendamhas Petroskoin muzikaližehe radmahttehnikumha horerištole. Lopta opendust hän ei ehtind, sikš ku zavodihe Sur' Kodimaine voin. Nor' 18-vozne üläopenik läksi voinale ičetahtnikan Petroskoin istrebitelin polkaha.
Tal'vkus vodel 1941 läz Medvežjegorsk-lidnad vointoras händast randihe da ottihe anastusehe. Hän putui Suomehe, kus händast oigetihe hutorale radnikaks. Radoi hän hüvin. Emäg, miččen poigan riktihe voinal, arvosti Aleksandrad abus da rados, sikš osti da lahjoiči hänele bajanan, miččenke hän pörzihe kodihe.
Jäl'ges anastust, vodel 1944 päzui äiluguižiš kodvindoišpäi da fil'tracionnijoiš lagerišpäi. Vodel 1945 sügüzel porzihe kodihe.
Pörttes kodihe ezmäine hänen taht oli udes kerata Vepsän rahvahan horad.
Rad Vepsän rahvahan horas
Vodel 1946 zavodi rata Šoutjärven kul'turpertin taidehohjandajan, a jäl'ges tegihe sen pämeheks.
Jäl'ges jügedad voinaigad hän ühtes Anna Jefomovna Fabrikovanke (Šoutjärven kul'turpertin pämez') udes kerazi Vepsän rahvahan hor, miččenke radoi läz 30 vot. Ezmäižed horan ühtnikad, miččed käveliba horaha völ edel voinad, oliba Praskovja Mironovna Moškina, Ol'ga Ivanovna Kottina, Maria Nikolajevna Bogomolova, Pelageja F'odorovna Kottina. Möhemba pajosebraha zavodiba tulda uded pajanikad i hor il'mestui udes. Repeticijad oliba kaks' kerdad nedališ.
Jo vodel 1947 hor ühtneb Toižehe valdkundaližehe rahvahaližiden pajosebroiden kacundaha Petroskoiš.
Aleksandr Jefimovičan horan vedämižen aigan pajanikad äjan eziniba rahvahan edes, oliba adivajelusil, eziniba kaikil külan praznikoil da saiba arvostandad. Aleksandr Jefimovič tegi suren radon fol'klormaterialoiden keraduses, iče kirjuti pajoid vepsän da venän kelel. Erased hänen pajod horan repertuaras oma nügüd'-ki: “Därven randal” (“На озёрном бережке”), “Vepsän ma” (“Вепсская земля”), “Ala kana kakata” (“Не квохчи, курочка”), “Eli Griska” (“Жил был Гришка”), «Pajo Anna Lisicinas» («Песня об Анне Лисициной»), «Minun Kodima» («Родина моя»), «Kiviradnikoiden pajo» («Горняцкая трудовая»), «Priha kävel' neiččenke» («Парень с девушкой гулял»), «Naku ilos elämei» («Вот как весело живем»), «Ala manita mindai» («Не обманывай меня») da toižed.
Vodel 1967 hor ezini «Rosinka»-pajonke Kaiken Sojuzoiden taidehkacundal, mitte oli omištadud 50-voččele Suren Okt'abrin jubilejale da sai Laureat-nimen. Vodel 1968 Hel'sinkin akademijan tedomehed kuctihe Vepsän rahvahan hor Suomehe, mitte ozuti ičeze mastarut kahesa päiväd. Horan ühtnikad pidiba äjan koncertoid Suomes da jäl'gmäižel päiväl Hel'sinkin universitetas hor ozuti uden «Vepsläine kadril'»-programman, miččes oli pajoid vepsän da venän kelel, da pajoid, miččed om kirjutanu Aleksandr Nikonov. Hel'sinkin universitetan proffesor Pertti Virtaranta sanui: «Vepsän horan ezituz om necen nedalin todesine sensacii»[2].
Vodel 1969 hor ühtni "Muzikaline Karjala"-telefil'man sjomkoihe, ned mäniba Kiži-sarel.
Vodel 1970 Karjalan literaturan da taidehen dekadan ühtnik Leningrad-lidnas. hor ezini predprijatijoil, tundištoiti Leningradan eläjid ičeze koncertezitusidenke.
Vodel 1971 hor sai "Rahvahaline kollektiv"-arvnimen.
Vodel 1972 hor – Kaiken Venäman taidentegendan kacundan laureat.
Vodel 1975 Aleksandr Jefimovič om lähtnu radolpäi horanke ičein süiden täht.
Vodel 1978 hän om kolnu.
Muštlosed
Aleksandr Jefimovič ei sand muzikališt opendust, no hänen sur' londusine muziklahj da naprind radoho lapsidenke da aigvoččidenke ristituidenke kel oli armastuz muzikaha, pajoho da karghu om korktas arvostadud ristituil. Händast lujas navediba külän eläjad da horan ühtnikad.
Aleksandr Jefimovičan radon aigan horas el'mestuiba uded pajod vepsän kelel. Nägumata sihe, miše hän eče kirjuti pajoid, hän radoi da kucui abuhu sen aigan kompozitoroid, runoilijoid da hormeisteroid, miččed parembzoitiba horan vepsläšt repertuarad, no ked hö oliba ei ole tedoid. Istorijan muziktedos oma jänuded vaiše nene nimed: N. N. Levi, L. K. Jousinen, K. N. Stas'uk, S. N. Legkov[3].
El'vira Vasiljevna Kottina, Vepsän rahvahan horan pajanik (pajati 40 vot), johtutab:
Oldes školan openikan, minä kävelin pajosebraha, mittušt vedi Aleksandr Jefimovič Nikonov Kalagen kahesavoččes školas. Minä lopin kesk'školad jo Šoutjärves. Siloi tulin pajatamha Vepsän rahvahan horha, da jäin sinna enamba mi 40 vodeks. horan repertuaras oliba päazjas Kononovan kargud, no mö, horan pajanikad da Aleksandr Jefimovič tegiba uded elementad, erašti otim ičeze melespäi, miše kargud oližiba melentartuižembad. Kargaižim "vepsläšt kadrilid", "Topotandad". Hüvid sanoid jubileivodel tahtoin sanuda völ ühten horan vedäjale Anatolii Barancevale, kudamb radoi horanke lühüdan aigan.
Aleksandra Vasljevna Kurganova, Vepsän rahvahan horan pajanik (pajati 30 vot), sanub:
Vodel 1955 horha mindai toi mamoi Pelageja F'odorovna Kottina. Mamoi iče käveli horha vodelpäi 1936. Aigad oliba lujas jügedad, no meiden kanz lujas nevedi pajatada kaiken. Aleksandr Jefimovič oli hüvä, tark horan vedäi. Äjad kargud abuti meile panda Vasilii Ivanovič Kononov. Muštan, nece oli 50-voziden lopus, mö vaumičimoiš pajatada ühten sebran vastusel, meiden repeticijale tuli P'atnickijan horan baleitmester Tatjana Aleksejevna Ustinova. Oh, kut-žo kibištiba jaugad jäl'ghe ningoimid repeticijoid. Ezituz mäni lujas hüvin! Šoutjärven kul'turpertiš Aleksandr Jefimovič tegi agitbrigadad, kuna ühtni meiden külälaine norišt. Hän ajeli kaiked rajonadme, pajati vepsläižid, venälaižid pajoid, lugi runoid. Meid ihastusenke vastsiba traktoroiden vedäjad, lehmiden lüpsajad, manradon brigadad. Mitte oli melentartuine aig!
Homaičendad
- ↑ старинное вепсское село в Прионежском районе Республики Карелия.
- ↑ М. В. Крайнова, Из истории Вепсского народного хора под руководством А.Е. Никонова в период с 1946 г. по 1975 |title=Из материалов XI научной конференции «Краеведческие чтения» г. Петрозаводск, 2017 г.
- ↑ Ирина Борисовна Семакова ВЕПССКИЙ НАРОДНЫЙ ХОР.
Literatur
- М. В. Крайнова, Из истории Вепсского народного хора под руководством А.Е. Никонова в период с 1946 г. по 1975 // Из материалов XI научной конференции «Краеведческие чтения» г. Петрозаводск, 2017 г.
- И. Б. Семакова, Вепсский народный хор и его создатель В. И. Кононов (1936-1944 гг.)// Музыкальный журнал Европейского Севера №2(30), 2022 год, УДК 781.7+784, DOI 10.61908/2413-0486.2022.30.2.113-138
- Р. П. Лонин, Люди - гордость нашего края // Р. П. Лонин, Хранитель вепсской культуры (к 40-летию Шелтозерского вепсского этнографического музея). Петрозаводск, 2007. 97 с.