Karjalan Valdkundan päiv
| Karjalan Valdkundan päiv | |
 | |
| Tip |
Oficialine regionaline praznik |
|---|---|
| Oficialižesti |
Karjalan Valdkundan päiv |
| Praznuitas |
vodelpäi 1999 |
| Päiv |
joga voden, 8. kezakud |
Karjalan Valdkundan päiv (ven.: День Республики Карелия) — oficialine regionaline praznik, mitte om sidotud valdkundan augonpanendanke. Se praznuitas joga voden 8. kezakud vodelpäi 1999. Nece päivmär om sidotud Karjalan Radkommunan sündundanke vodel 1920, se oli Karjalan, kut erižen valdkundan, istorijan augotišen[1].
Istorii
päkirjutez: Karjalan Valdkund
8. kezakud vodel 1920 oli allekirjutadud Kaikenvenäman valdkundaližen komitetan oficialine azjbumag "Karjalan Radkommunan augonpanendan polhe", mitte andoi oiktusen rahvahale ičeleze tehta pätusen i vahvištoitta Karjalan Valdkundan ripmatomut. Karjalan Valdkundal ozaižihe ičeze röunad, i se tegihe ičenaižeks regionaks, kaiči tradicijoid, kul'turad da kel't.
Karjalan päiv tegihe rahvahaližeks praznikaks vodel 1999, konz sijaližed valdmehed eziniba tomotusenke sen tegemižes. Käsk oli allekirjutadud 27. sulakud vodel 1999, i neciš aigaspäi regionas joga voden 8. kezakud zavottihe tehta erazvuiččid praznikazjtegoid.[2][3].
Praznikan tradicijad
Miše tehta surid praznikazjtegoid, joga voden valitas uz' municipaline agj. Karjalaižed lidnad da küläd tegeba kaiken, miše tehtas praznikan pälidnaks. Se lidn vai külä, kus tehtas praznik, sab rahatuged regionaližes b'udžetaspäi. Sijaližed valdmehed andaba dengoid ei vaiše praznikan tegemižehe, mugažo sijan paremboitusehe da mugavudehe. Muga, edel Karjalan Valdkundan päivän praznuičendad regionas erazvuiččil vozil saudihe surid kinoteatroid, kirjištoid, läžundoid, školid, endištadihe muzejid, randirdoid.
Praznik vedetihe jo Präža-küläs, mugoižiš lidnoiš, kut Kondopoga, Sortavala, Kostomukša, Olonec. Vodel 2019 praznikan pälidnaks tegihe Medvežjegorsk. Vodel 2025 päpraznikazjtegod mäneba Petroskoiš — praznik om omištadud 105-voččele Karjalan Valdkundan augonpanendan jubilejale[4].
Valdkundan päiväl tehtas jarmarkoid, koncertoid, teatrastundoid, miččihe ühtneba henged tradicionaližes karjalan kul'turaspäi. Turistad da adivod voiba mujada rahvahaližid sömižid, lebaita i väta. Praznikan aigan avaitas erazvuiččid ozutelusid, vedetas mastar'-klassoid. Ehtal tehtas prazniksal'ut.
Lähtked
- ГТРК Карелия. Новости.
- События | Петрозаводск Карелия Россия | День республики отметили в Сегеже 2024 Карелия
Homaičendad
- ↑ День Республики Карелия. Официальный интернет-портал Республики Карелия.
- ↑ День Республики Карелия: история и традиции праздника (2021). Дата обращения: 21 semendkud 2025.
- ↑ День Карелии. Настоящая история сегодняшнего праздника., AiF. Дата обращения: 21 semendkud 2025.
- ↑ Праздники в Карелии 2025—2026: какие есть, когда и как отмечают, Отдых в России. Комсомольская Правда.. Дата обращения: 21 semendkud 2025.
|
Nece material om kirjutadud «RUWIKI - internet-tedokirjan» abul. Kävutoitta necidä materialad toižil saitoil voib vaiše «RUWIKI - internet-tedokirjan» laskendan mödhe. |