Il'l'an Vodlojärven pagast
| Monastir' | |
| ven.: Свято-Ильи́нский Водлозе́рский пого́ст | |
|---|---|
| Il'l'an pagast | |
.jpg) | |
| 62°22′40″ с. ш. 36°54′30″ в. д.GЯO | |
| Valdkund |
 Venäma |
| Sija | Kuganavolokan küläkund[d] |
| Uskond | Ortodoksine uskond |
| Jeparhii | Petroskoin da Karjalan jeparhii |
| Tip | Mužikoiden |
| Ezmäine johtutez | 1592 voz' |
| Sündundpäiv | XVI voz'sada |
| Sauvotused | |
| Il'l'a Prorokan da Uspenija Bogorodican jumalanpertid, kellončuhu; uz' Pühä Ioanna Krestitil'an pühäkodi, miččen völ sauvotas; velliden keljad. | |
| Известные насельники | igumen Kiprian (Griščenko); ierodiakon Martirii; |
| Kacui | igumen Kiprian (Griščenko) |
| Status |
 Venäman rahvahiden kul'turjäl'gestusen objekt federaližel znamoičendal. Рег. № 101620443400006 (ЕГРОКН). Objekt № 1010050000 (БД Викигида) |
| Rad | Radab |
 |
|
 Mediafailad RUWIKI-tedoiš | |
.svg)
Pühä Il'l'an Vodlojärven pagast (ven.: Свято-Ильи́нский Водлозе́рский пого́ст) om Venäman ortodoksižen jumalanpertin Petroskoin da Karjalan jeparhijan mužikoiden monastir, mitte sijadase Vodlojärvel Pen' Kolgostrov-sarel Vodlojärven rahvahaližes puištos. Om arhitekturan muštpacaz federaližen znamoičendad, Karjalan puižen arhitekturan kul'tozutez.
Olendsija
Il'l'an pagast sijadase Vodlojärven rahvahaližen puišton tahol, Pen' Kolgostrov-sаrel, nügüd' sen nimi om Il'l'an, Vodlojärven pohjoižpoles. Sadas sinnä voib vaiše vededme. Nelläs kilometras päivnouzman polhe om saren lähembaine Kanzanavolok-külä.
Istorii
Om starin, miše Il'l'an pagast om tehtud amuižen väruskondan pühäsijan tahol, miččel sijaližed heimod, kudambad eliba sid' novgorodlaižiden tulendan edel, pandihe altarile žertvoid. No oiktemb om toine mel'pido, miše pagastan voz'sadan XVI tehtihe monahad, kudambad astuiba Soloveckijoile sarile. Ezmäižen kerdan johtutesed pagastas vastasoiš Novgorodan mitropolitan Varlaaman "Žalovannaja gramota"-kirjas, mitte anttihe vodlojärveläižile vodel 1592[1].
Il'l'a Prorokan jumalanpert'
Pagastan čomitab Il'l'an Prorokan jumalanpert', mitte om sauvotud vodel 1798 vanhan šatran jumalanpertin sijal sijaližiden pusepiden abul prihožanoiden rahoile. Sauvondan pohjas om projekt, miččen tehtihe professionaližed arhitektorad da vahvištoiti Oloncan konsistorii. Hengeline valdmehišt kel'di sauvoda uden jumalanpertin vanhan ozutesen mödhe, käski vanhan jumalanpertin mureta, a sen sijal leta uden ven.: «в сходственность плана». Arhitektoran A. V. Opolovnikovan mel'pidon mödhe (kudamb ezmäine vodel 1947 oppi da märiči jumalanpertin), jumalanpertin sauvoiba erazvuiččel aigal. Sen kaikid vanhemb pala om nellik, miččehe möhemba oli ühtenzoitud sömsija da kellončuhu. Ezmäi kellončuhun päs oli šatr, mitte lendlihe korktas taivhale.
Voz'sadoil XIX—XX muštpacaz oli udištadud, kellončuhun pälpäi oli heittud šatr da sen sijale pandihe lapakon "polukumpolan" keihanke. Kellončuhu om pälustadud t'osal. Jumalanpertin da sömsijan sauvotusiden pälustamine ühtenzoiti kaik pertin palad ühthe; oliba muretud rippui ülitand, mitte ühtenzoiti kellončuhun pertedesenke da völ kaks' pordast. Oli udištadud kalutamine: vanhan ikonostasan vajehtihe udele — "tehtud arhitekturan sändoiden mödhe". Uz' ikonostas, mitte om vahvištoitud Oloncan sauvond- da tenkomissijal, om tipine toižen voz'sadan XIX polen elektrotaidehrad. Oliba pälustadud laudoil jumalanpertin laged da seinäd.
Aid verajidenke da möndlaukoidenke
Toine Il'l'an pagastan erogoičuz om puine aid. Se om vahvištoitud puižil sauvotusil da kattud kaks'poližel katusel. Mugomil aidoil, miččed tehtas sauvotusen pojavaks amuižeks lidnoituseks, oliba ende aidastadud äjad monastirid da pagastad. Nece aid om Kižin pagastan aidan sauvondan ozutez.
Aidas om tehtud möndsijad, kus maradnikad da kupcad mösketihe praznikoiden da jarmarkan päividen aigan. Voib olda, miše praznikmönd oli satusekaz, sikš ku Kolgostrov-susedsarel oliba tehtud levedad varažoman honused kupcoiden tavaroiden kaičendan täht.
Vozil 1930 Il'l'an pagastan papid da jumalahižid mehid t'urmattihe lagerihe da Il'l'an pagast tühjeni[2].
Nügüd'aigaine monastir
Vodel 1991 zovodihe monastirin udessündutamine.
Vodelpäi 2003 Il'l'an pagastal zavottihe pidäda jumalanloičendoid. Vodel 2004 Vodlojärven rahvahaližen puišton pämez' Oleg Červ'akov tegihe papikš da Il'l'an jumalanpertin ižandaks[3].
23. tal'vkud vodel 2006 Venälaižen ortodoksižen jumalanpertin Pühä Sinodan pätandan mödhe Il'l'an pagastal om sätud mužikoiden monastir' Pühä Il'l'an Vodlojärven monastir'ma. Udes monastiriš ratas igumen Kiprian (Griščenko), ieromonah da ierodiakon, inok da monahad.
Vodel 2007 Petroskoin da Karjalan arhiepiskopan Manuilan blaslovindanke pidettihe Vodlojärven rahvahaližen puišton tedopraktikaližen "Vodlojärven lugemižed"-konferencijan, miččen sädiba Il'l'an jumalanpertin ižand, Vodlojärven puišton pämez' da puišton radnikad. Konferencijan pätem oli Pühä Il'l'an Vodlojärven pagastan istoriko-arhitekturine znamoičend[4].
Vodel 2016 om letud tal'veline puine pühäkodi Ioann Valatajan muštoks. Om sauvotud kuz' keljad, sömsija. Monastirile anttihe mini-elektrostancijan, teplican da mašinan, miše tehta heinäd. Man- da sauvondradoiden täht monastir osti hebon, saren elon da sömtavaroiden tondan täht monastirile lahjoičiba kateran, motorvenehen da snegohodan[5].
Kolgostrov-susedsarel om udištadud voz'sadan XVIII Pühä Bogorodican Pokrova časoun', om sauvotud pert' palomnikoiden täht, künttud monastirin liinma, miččel kazvatadas kaik kazvmused monastirin elon täht. Zavodiše Kuganavolokan monastirin tanhan sauvond.
Loičendad oma joga päivän: 07.00 – homendezloičend, 1-ine čas; 18.00 – ehtloičend. Sobatan da jumalanpertin praznikoiden kanman vedädas öloičendan, mitte zavodiše 20.00 časul. Pühäpäividen da praznikoiden aigan om Božestvennaja liturgija, mitte zavodiše 10.00 časul[6].
Tetabad monahad
- Il'l'an pagastan monahan vozil 2000—2003 oli Nil-ižand, mirus Aleksei Savlenkov (1955—2003), ende oli rok-gruppan "Tainoje golosovanije" muzikant. Nil-ižandan rikttihe elokus vodel 2003 kaks' monahad, kudambidenke zavodihe rida sen täht, miše ned pipkutiba loičendan aigan[7].
- 2. kül'mkud vodel 2015 Vodlojärvel upsi ieromonah Il'l'a[8].
Kut voib sadas
Mašinal Moskvaspäi pidab ajada Moskva — Jaroslavl' — Vologda — Vitegra — Pudož — Kuganavolok matkan mödhe 12—14 časud. Ühthine matkan piduz' om 960 km.
Piterišpäi Kuganavolokha voib ajada avtomašinal Piter — Pöud (lidn) — Podporožje — Vitegra — Pudož — Kuganavolok matkan mödhe.
Petroskoišpäi pidab ajada А119-avtotedme, a sidä jäl'ghe sijaližiden küläteiden mödhe Kuganavolokahasai vai Pudožahasai.
Galerei
Nägo suvipolespäi
Nägo päivlaskman polespäi
Nägo kellotuselpäi
Kaks'toštkümnetüvine koiv — «Kaks'toštkümne apostolad»
Jumalankodin kalundišt
.jpg)
Homaičendad
- ↑ А. В. Пигин. Илии пророка Водлозерская пустынь. Православная энциклопедия (15 redukud 2014). Дата обращения: 16 vilukud 2026.
- ↑ Илья Тимин. Свято-Ильинская Водлозерская пустынь Мужской монастырь на территории крупнейшего в Европе национального парка "Водлозерский" Остров Малый Колгостров, озеро Водлозеро. kareliya.ru (2017). Дата обращения: 16 vilukud 2026.
- ↑ Заповедник – oт слова "Заповедь". Дата обращения: 16 vilukud 2026.
- ↑ Водлозерские чтения 2007. Сайт Петрозаводской и Карельской епархии. Дата обращения: 16 vilukud 2026.
- ↑ Ильинский погост. Дата обращения: 16 vilukud 2026.
- ↑ Свято-Ильинская Водлозерская пустынь. Сайт Петрозаводской и Карельской епархии. Дата обращения: 2 uhokud 2026.
- ↑ За понюшку табаку. Дата обращения: 16 vilukud 2026. Архивировано 13 sulakud 2014 года.
- ↑ Иеромонах, запутавшись в сетях, погиб на Водлозере. Дата обращения: 16 vilukud 2026.
Lähtked
- Свято-Ильинская Водлозерская пустынь на сайте Петрозаводской и Карельской епархии.
- Мужской монастырь Свято-Ильинская Водлозерская пустынь на сайте Петрозаводской и Карельской епархии.
- Ансамбль Ильинского погоста — на сайте "Страна наоборот".
- Ильинский погост на сайте "Карелия. Туристский портал".
- Мужской монастырь Свято-Ильинская Водлозерская пустонь