Mark Pimenov
| Mark Pimenov | |
|---|---|
|
| |
|
Petroskoin lidnan pämez'
|
|
|
|
|
| Sündundpäiv |
23. redukud 1799 Porfirjevskoje-külä, Šokš, Petroskoin ujezd, Oloncan gubernii |
| Kolendpäiv |
20. sulakud 1865 (65 vot) Petroskoi |
| Mahapanendan sija | |
| Tat | Pimen Moisejev (sünd. 1774) |
| Mam | Matr'ona Tarasovna (sünd. 1774) |
| Pauklahjad |
  |
Mark Pimenovič Pimenov (ven.: Марк Пи́менович Пи́менов) (1799—1865) — Venäman imperian valdmez', Petroskoin pämez', 1. gil'dian kupec, hüvätegii, ezmäine Petroskoin arvostadud eläi, kommercijan nevonik.
Elostarin
Vanhembad — pripisnijan maorjad-vepsläižed, venčaihe vodel 1796. Mark sündui ezmäižen kanzas. Möhemba sündui nel'l' norembad velled — Grigorii, Nazarii, Ivan, Nikolai da kaks' sizart — Ksenia da Anna. Pimenoviden familii tartui suguhu völ Mark Pimenovičan da hänen velliden aigan[1]. Sistematiziruitud opendust ei sand, openduzškoloiš ei opendanus.
Zavodi rata prikazčikan d'adil Pavel Voropaikinal, kudamb oli Šokšun maorjan da möjan, sai da möi Šokšun babarmmujuižen kived Piterihe. Voziden 1820 augotišespäi Mark eli Piteriš. Konz vodel 1825 Voropaikin koli, Mark tartui iče neche radho da sai palan hänen rahoišpäi[1].
Vodel 1836 hän kirjutihe pälidnan kupečestvaha 1. gil'dijan mödhe.
Pästi eloho valdkundaližid da üks'kerdaižid podr'adkontraktad sauvondkiven samižen da tomižen täht pertiden, sildoiden da randirdoiden tegemižele Piteriš, mugažo kivisauvomižiden tegemižele Kronštadtas. Vilukus vodel 1841 hän oli üksnäine podr'adčik Aničkovan sildan kohemdamižen aigan Piteriš. «Hüväs da vanhas napernas» sildan tegemižes Pimenov sai kuldaižen medalin «Hüväs rados» Aleksandrovskijal lental. Jäl'ghe hän oli podr'adčikan fortifikacionnijoiden sauvomižil Kronštadtas, mugoižil kut «Kn'az' Menšikov»-batarei, «Risbankan»-fort, «Kronšlot»-fortan Nikolajevskijan batarei, P'otr I kanalan laivhišton dokad.
Kül'mkus vodel 1842 sirdihe Petroskoin kupečestvaha 1. gil'dijan mödhe, ajoi Piterišpäi Petroskoihe. Möi leibäd, hänel oliba jogiden da järviden laivad.
Om tetab kut suremb hüväntegii Oloncan gubernijas.
Sauvoi ičeze rahoiš Petroskoiš Kirovan irdal Sobornijan avoinirdal läz Petrovskijad sadad — kaks'žiruižen puižen pertin kivipohjal ezmäižen Oloncan gubernijas lapsiden prijutan täht magaduzhonusenke, jumalanpertinke da teatrzalanke. Prijut oli avaitud 21. sulakud vodel 1849 da ezmäks korktembaižen käskön mödhe sen nimi oli «Pimenovskii». Lapsed Petroskoin golliš kanzoišpäi openzihe prijutas kirjaha, jumalan istorijaha da horan pajatamižehe. Paiči necidä, prihaižed-openikad openzihe radmaha käzil, neičukaižed — poimmaha. Urokad mäniba kahesaspäi časuspäi homendest kudehe časuhusai ehtad. Vodelpäi 1855 imperatoran Nikolajan I muštoks prijut oli sai uden «Nikajevskii»-nimen. Vodelpäi 1849 vodhesai 1862 prijutas maksoi Mark Pimenov, a sid' prijut rahoitihe erižes gubernijan da rahvahan maksundoišpäi. Lapsen prijutan radaigan vozil 1849—1918 siš openzihe enamba tuhad armatomad last da last golliš kanzoišpäi[2].
Vozil 1840 sauvoi da lahjoiči Petroskoin magistratale koume pertid, kus oliba gubernijan da lidnan vastuzsijad, maksun kävutamižes pidi oigeta lidnalaižehe lapsen prijutan fondaha.
Ičeze kodiküläs Šokšus vodel 1842 Mark Pimenov sauvoi jumalanpertin kivespäi Nikolai Čudokahan nimen muštoksgubernian arhitektoran Vasilii Tuhtarovan projektan mödhe.
Vodel 1849 Valdmehišton senatan käskön mödhe Mark Pimenovale, ezmäižele petroskolaižišpäi, anttihe Petroskoin arvokahan eläjan da «kommercijan nevonikan» nimen.
Vozil 1852—1854 sauvoi ičeze rahoiš uden pertin jumalanpertinke da kahten fligel'anke lidnalaižen bogodel'n'an täht da lahjoiči pertin lidnale.
Vozil 1853—1854 oli petroskoin lidnan pämez'. Lahjoiči lidnale osttud ičeze rahoiš irdl'moin fonarid.
Vodel 1854 sauvoi ičeze rahoiš da lahjoiči lidnalaižele magistratale Mark Pimenovan sildan pidusel 100 metrad päliči Lososinka-joged (nügüdläižel Lunačarskijan irdal).
Andoi äi rahoid Krestovozdviženjan pühäpertin kivisauvomižen täht Zareckijal kaumištol Petroskoiš.
Blagoveščenjan Iona-Jašjärvelaižen monastiriš hän ičeze rahoiš vozil 1854—1855 sauvoi jumalanpertin kivespäi Preobraženje Gospodnen nimen muštoks kelloiden sijanke[3]. Hänen rahoiš oli tehtud ikonad koumežiruižen ikonostasan täht Preobraženskan jumalanpertiš. Vozil 1855—1856 Mark Pimenovič sauvoi monastiriš velliden sömsijan keitimpolenke, adivpert' arvokahiden adivoiden täht da jauhmel'nican[1].
Oli pauklahjoitud Pühän Annan 3. stepenin ordenal, Pühän Stanislavan 2. stepenin ordenal, koumel kuldaižel medalil «Naprindas».
Vodel 1862 Pimenovan tervhuz' ühtnägoi tegihe hondoks. Jäl'ghe pit'käd jugedad läžundad hän koli 20. sulakud vodel 1865. Jäl'gmäižen tahton mödhe händast pandihe maha Petroskoiš Zareckijal kaumištol läz Krestovozdviženskijad pühäpertid.
Kanz
Ak — Matr'ona Timofejevna (1801—1874). Lapsid ei olend. Ottihe poigaks plemännikan Jefim Pimenovan, kudamb sai rahoid da Mark Pimenovan azjad.
Homaičendad
- ↑ 1 2 3 Кораблёв, Николай Александрович, Т. А. Мошина Пименовы: династия предпринимателей, благотворителей, общественных деятелей. — Петрозаводск: КарНЦ РАН, 2013. — 107 с.: 45 ил.
- ↑ История Петрозаводска: власть и горожане. — Петрозаводск: КарНЦ РАН, 2008. — 375 с. ISBN 978-5-9274-0328-8
- ↑ Династия семьи Пименовых Om pandud arhivaha 5 kezakud 2011 vodel.
Literatur
- Пименов М. П.: [Некролог] // «Олонецкие губернские ведомости». 1865. 24 апр.
- Кораблёв, Николай Александрович. Городские головы Петрозаводска (1778—1918). Биографический справочник / Н. А. Кораблёв, Т. А. Мошина. — Петрозаводск: Стандарт, 2008. — С. 32—35. — 82 с. — ISBN 5-87870-007-7.
- Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД «ПетроПресс», 2009. — С. 386—464 с.: ил., карт. ISBN 978-5-8430-0125-4 (т. 2)
- Н. А. Кораблев, Т. А. Мошина Пименовы: династия предпринимателей, благотворителей, общественных деятелей. — Петрозаводск: Периодика, 2016. — 107, [2] с.: ил. (2-е издание, переработанное и дополненное)