Livikad

Экспертиза РАН

Venäman tedoakademii
tegeb azjtarkištust

Ližäkse

Livin-karjalaižed
Lugumär	19 000
Eländsija	Venäma
Kel'	livin kel', venän kel'
Uskond	ortodoksine uskond
Mülüb	Karjalaižed
Heimrahvahad	karjalaižed, vepsläižed, lüdikad, livad

Karjalan rahvahan flag

Livikad, livin-karjalaižed (ven.: Ли́ввики, каре́лы-ли́ввики, livv.: liygiläzet), mugažo Oloncan karjalaižed (ven.: оло́нецкие каре́лы — üks' koumes sures subetnosaspäi (paiči lüdikoid da pohjoiž-karjalaižid), mitt mülüb karjalaižehe rahvahaze. Kut lüdikoiden subetnos, mugažo lujas erineb pohjoiž-karjalaižišpäi kul'turan da kelen mödhe (eskai kirjamištoiden erod). Livikad eläba enambištos Oloncan rajonas, Karjalas, Priladožjen päivnouzmanpoles da pohjoižes.

Istorii da sündumine

Livikoiden sündumine, kut karjalaižiden sündumine, ei ole oppidud völ lophusai. Om üleine mel'pido, miše subetnos sündui jäl'ghe korelan da ves'-heimoiden kosketusid kesk'aigan, konz suren painusen tegi ves'-heim, nece nägub kut livikoiden ičeladuižes keles, muga kul'turas-ki. Oma lähtked, kus kirjutadas versijad livvikoiden baltianmeren juriš, sikš ku heiden nimi pohjoiž-karjalan kelel (karj.: livvikoi) lujas nahodib livoiden nimehe. Voib olda erased livad Kesk'aigan augotišes tuliba elole Priladožjehe da segoiba korela-heimonke, no kaičiba muštod ičeze juriden polhe. Dmitrii Bubrih homaiči, miše kesk'aigan materialižen kul'turan muštpachad ozutaba rahvahan sirdämišt suvipolespäi da ühtenzoitust karjalaižidenke, miččed oma-ki livin-karjalaižed.

Ezmäine kirjutadud johtutez livikoiš oli völ VI voz'sadal: Iordanan "Getoiden sündumižes da radoiš"-kirjas oma kirjutadud suomlaiž-ugrilaižed rahvahad, kudambid oti ičeze valdha gotoiden pämez' Germanarih. Äjad tedomehed (J. Koskinen, К. Müllengoff, V. Tomašek da toižed) oma vahvas sidä mel't, miše necen lugetišen Iordan oti itinerarijaspäi, mitte ei tulend meile. Neciš lugetišes ühtes meränke da mordvanke om rahvaz, miččen nimi om «Thiudos in Aunxis», nece znamoičeb F. Braunan mödhe "Oloncan čud'" (ven.: «чудь олонецкая») (karjalan da suomalaiž-ugrilaižil kelil Olonec nügüdehesai om Aunus, ku panda tarbhaižehe kändoho Aunuksis).

Livikoiden pälidnaks Kesk'aigan augotišespäi oli Olonec-lidn; Oloncan lidnoitusen augonpanendan päiv ei ole tetab, ezmäižen kerdan Olonec johtutadas kirjutadud lähtkiš Novgorodan kn'azin Sv'atoslav Ol'govičan käskkijas, mitte oli anttud Novgorodan Sofijan pühäpertile vodel 1137 makskeradamižiden vajehtuses Novgorodan jeparhijan täht. Livikoiden territorii mülüi Novgorodan man Obonežjan pätinan Korelan maha. Ühtes Novgorodan manke Ivan III ohjandusen aigan livikad mülüškanziba Moskvalaižen valdkundaha, Oloncan lidnoituz oli vahvas udessauvdud vodel 1649. Vodel 1773 Jekaterina Sur' tegi Oloncan agjad Novgorodan namestničestvas, kuna mülüškanziba kaik livikoiden mad da sen pälidnaks tegihe Olonec-lidn vodhesai 1782.

Kodimaižen voinan aigan vodel 1812 tegihe tetabikš Oloncan ambujad — livin-karjalaižiden ičetahtnikoiden opolčenii, mitte oli keratud professionaližiš mecnikoišpäi nahkzverihe, hö vojuiba kuti sirttud kaiked frontadme jeger'ad.

XX voz'sadan lophusai livikoiden enambišt eli Suomen mal, kus kaiči ičeze kel't da kul'turad, no nügüdläižeks aigaks suomalaižiden tedomehiden tedoiden mödhe hö kogonalaz om assimiliruitud suomalaižikš.

Kel'

Livin kelen sündumine nügüdehesai ei ole märitadud, sikš ku ei ole sel'ged kut sünduiba iče livikad; se mülüb suomalaiž-ugrilaižehe kel'gruppaha kut aggl'utinativine kel'. Keles om äi velgsanoid endevanhas vepsän kelespäi, om mugažo päivlaskmanpolen baltianmeren vaihištod, mittušt ei ole toižiš karjalaižiš keliš. Tozitedoid livikoiden kirjamišton polhe ei ole, XIX voz'sadal se jo oli kirillican pohjal, vozil 1930 eloho tuli kirjamišt latinican pohjal.

Livin kelen vanhtunu kirjamišt

A a	B b	Č č	D d	Ǯ ǯ	E e	F f	G g
H h	I i	J j	K k	L l	M m	N n	O o
P p	R r	S s	Š š	Z z	Ž ž	T t	U u
V v	Ü ü	Ä ä	Ö ö	'

Livin-karjalan keles oma mugoižed alapaginad:

† — kolnuded alapaginad

• sämjärven †
• tulemajärven
• vedljärven †
• vitelän †
• salmen (vidlican)
• kotkatjärven
• ripuškalin
• nekkulin

Venälaižes kel'tedos kel' lugese karjalan kelen alapaginaks, sil aigal kut suomalaižiden da päivlaskmanpolen kel'tedomehiden pala lugeba sidä erižeks keleks.

Literatur

• Финно-угры и балты в эпоху средневековья. Археология СССР. Под ред.: Рыбаков Б. А. — М., 1987 г.
• Финны в Европе. В 2-х томах. — М., 1990 г.
• Вага Т. В., Потахин С. Б. Особенности расселения и землепользования карелов-ливвиков // Н. М. Пржевальский и современное страноведение: Материалы международной научно-практической конференции. Часть II. Смоленск: Изд-во СГУ, 1999.
• Бубрих Д. В. Догосударственный период истории балтийско-беломорского севера.
• Браун Ф. А. Разыскания в области гото-славянских отношений. С-Пб., 1899.
• Иордан. О происхождении и деяниях гетов. СПб., Алетейя, 1997.

Lähtked

• Эса Анттикоски. Карелы.
• «Oma Mua» — газета на ливвиковском языке
• Национальный вопрос
• Олонецкий национальный музей карелов-ливвиков им. Н. Г. Прилукина
• Трифонова Л. В. Традиционный интерьер избы пряжинского карела-ливвика из окрестностей Ведлозера начала XX века