Jalgora (kurort)
| Mägisuksiden Jalgora-kurort | |
|---|---|
 | |
| 62°28′47″ с. ш. 34°52′17″ в. д.GЯO | |
| Sijaduz |
 Karjala |
| Lähembaine lidn | Petroskoi |
| Ülembaine korktuz' | 122 m |
| Alembaine korktuz' | 100 m |
| Ted |
4 1 — Openduzsportte (hihtändan startkorktuz') 1 — Vihand sportte (hihtändan augotiž- da keskkorktuz') 1 — Rusked sportte (hihtändan kesk- da rohked korktuz') 1 — Must sportte (hihtändan üläkorktuz') |
| Libundsistem |
1 Bugel'lendimsistem, 1 nel'l'sijaline kanatte |
| Sait | yalgora.ru |
"Jalgora" (ven.: Я́лгора) om mägisuksiden kurort da aktivižen lebaidusen keskuz Änižröunan Pin'guba-tahos Karjalas. Sijadase läz Karjalan Petroskoi-pälidnad Änižen Jalguba-lahten randal, ei edahan ühtennimižes Jalguba-küläspäi[1].
Etimologii
Turistine sportkompleks sijadase Änižen Jalguba-lahten randal. Vepsän kelel "jalos" znamoičeb ven.: большой; "guba" om venälaine paginsana, mitte znamoičeb ven.: залив. Lahten randal om Jalguba-külä, mitte ezmäižen kerdan johtutase voz'sadal XVI. Jalguban ümbri oma kivisižed kukhad, niiden korktuz' om edamba sada metrad. Geologoiden mel'pidon mödhe, nece om endevanhoiden lämoimägiden jändused. Pohjoižpolhe küläspäi om Lebäžja-mägi, hurapoles om lämoisijaline sel'g, miččen rindal seižub Koivuiden Sildad-külä. Ehtbokan poles Jalgubaspäi sijadase Bol'šaja Vera-mägi (om suomen kelen "vaara"-sanaspäi, mitte znamoičeb ven.: «гора»), suvimägipautken voib nägištada ani Petroskoi-lidnaspäi[1].
Jalguban "suren" lahten läz, miččen piduz' om 7 km, leveduz om 500—600 metrad, sijadase pen' Pin'guba-laht. Vepsän kelel "Pen'" znamoičeb ven.: «маленький», a "guba" — ven.: залив. Pin'guba lahten randal seižub ühtennimine külä.
Istorii
Taho mägisuksiden Jalguba-kurortan täht läz Petroskoi-lidnad valittihe ei muite. Vodel 1959 petroskolaine Vitalii Aleksejevič Vibornov avaiži necen mägen ičeze openikoiden suksil hihtändan täht. Sidä aigan tulda mägele voi vaiše Jalguba-külän polespäi, lahtes päliči. V. Vibornov üks'hengenikoidenke zavodiba tehta sportkeskusen ičeze vägil. Tulijan kurorttahonno oli vedädud elektrovägi, čaptud mec, tehtud poukahtuzradod, miše tazoitada magipautken da vaumita sidä päzutandan täht.
Vozil 1970 tehtihe ezmäižen mägehe libundan lendimsisteman, voziden 1980 lopus tehtihe ezmäižen sportten, а vozil 1990 mägisuksiden sportkompleksas jo oliba gigant-slaloman sportted. Sid' zavodiba mänetada valdkundaližed mägisuksiden voibištelendad. V. Vibornov vaumiči kuverz'-se kümenikad Karjalan mägisuksiden sportmest[1].
Möhemba mägisuksiden sportkompleksan kehitoitusehe ühtni V. Vibornovan sebranik suks'voibištelendan sportmastar', mail'man čempionatoiden Venäman sportjoukun harjoitai Stanislav Anikijev. Oliba planad tehta rahvahidenkeskeižen korktuden sportten, no ned jäiba muite. Vodel 2009 Jalguba-sportkompleksan augon panii V. Vibornov koli. Rohkaidused kaita, tugeta, udištada komplaksad jaiba ozatomikš. Mägisuksiden Jalgora-kurort oficiališti kävutajiden täht om avaitud 1. uhokud vodel 2012. Sen udes sündutamižehe ühtni venälaine snoubordist Dmitrii Vaitkus. Hän tegi ičeze mägisuksiden sport- da turistkompleksan projektan, miččen mödhe pigaaigas lendi udes kurorttahon da andoi sille Jalgora-nimen[2].
Vozil 2020-2021 Jalgora-kompleks ühtni Federaližen turizman azjmehišton grantkampanijaha da sai grantan enamba 2,1 mln rubl'ad ičeze territorijan mugavuden da ližaadivpertiden sauvondan täht[3].
Tele2-mobilsidon tedoiden mödhe voden 2022 tal'vkuspäi voden 2023 keväz'kuhusai Jalgora-kurortaha om tulnu enamba 8 tuhad turistad Venäman 52 regionaspäi. Kaikid suremb turistoiden lugumär oli vilukus[4].
Vodeks 2025 kompleksan infrastrukturaha mülüba sportted, spotrotel', kaks'- da nel'l'sijaižed adivpertid, ilotused. Kurort om nügüd'aigaine mägisuksiden sport- da turistkompleks. Keskusen rados om koume pätegod:
- likund-tervehtoituz rad mehiden tervhuden vahvištoitusen täht, tal'veližiden sportroduiden, kezaližen aktivižen vezilebaidusen da elon terveh ladun tugeduz;
- äipoline sportkompleks, mitte vaumičeb sportmehid ühthižvenälaižiden da rahvahidenkeskeižen korktuden voibištelendoihe;
- kehitoitab lapsiden da norišton sportan[5].
Sportted da lendimsistemad
"Jalgora" mülütab 4 mägisuksiden sportted, miččiden korktuz' om erazvuitte. Maksimaline sportteiden korktuz' om 122 metrad meren pindan päl, ühthine sportteiden piduz' om 2000 metrad:
- openduzsportte — hihtändan startkorktuz', sen piduz' om 120 metrad;
- vihand sportte — hihtändan augotiž- da keskkorktuz', sen piduz' om 800 metrad;
- rusked sportte — hihtändan kesk- da rohked korktuz', sen piduz' om 600 metrad;
- must sportte — hihtändan üläkorktuz', sen piduz' om 450 metrad.
Sportted om kalutadud bugel'lendimsistemal da 4-sijaižel kanattel.
Hihtändan aig jatktase kül'mkuspäi sulakuhusai[6].
Infrastruktur da ilotused
Aktivižen lebaidusen Jalgora-keskuz radab vodes ümbri. Tal'vel radab kut mägisuksiden kompleks, a kezal radab kut turistine erazvuiččiden kul'turan da ilotuztegoidenke keskuz. Keskuz sädab:
- tundištoituzmatkad Karjalan melentartuisijoiden mödhe;
- Karjalan küliden ekologižed matkad;
- kalatusen vai aktivižen vezilebaidusen;
- tahon jogavoččen Änižen regata-azjtegon täht.
Mägisuksiden kurortan tahol om angl.: "Yalgora Village" mini-kompleks, miččes eländ om "Pühäpäiv-päivän paket"-programman mödhe. Nece om eriline tomotuz, miččes om märitud elon, murginoičendan, sportkaluiden kortmaha andand. Ližamaksus voib otta professionaližen nevonikan abun vanhembiden da lapsiden täht.
Mägen ladvas om Ice-kafe, mitte ühten aigan om kacundtandreh panoramirdnägonke. Mägen alandusenno om Bistro-kafe, kus voib lämbitadas da söda.
Ližaks Jalgora-keskusen adivod voidas štarkta štarguil jätandrehel, mända mecha joksendsuksil, kävuda kül'betihe. Lapsiden tänt om sätud pol'tošt časuine turistmatk fol'klortehudme. Tundištoituzmatk zavodiše mägen ladval, kuna matknikoid tob lendandsistem, da sidä jäl'ghe mäneb kaidašt tehudme kal'l'oiden da puiden keskes. Völ kezaaigal voib huzaita mägivelokezral, kalatada[7].
Sijaduz
Kurorttaho sijadase 15 kilometras Karjalan Petroskoi-pälidnaspäi Änižen Jalguba-lahten randal. Sadas sportkompleksanno voib personaližel mašinal. Sportkompleksas om sijaduztaho.
Lähembaine Petroskoi-aeroport om 33 kilometras kurortaspäi. Matk aeroportaspäi om 40 minutad. Völ Petroskoihe voib tulda pojezdal.
Homaičendad
- ↑ 1 2 3 Центр активного отдыха для всей семьи и первый горнолыжный курорт в Карелии. yalgora.ru. Дата обращения: 11 uhokud 2026. Архивировано 13 heinkud 2025 года.
- ↑ slaviros. В Карелии открылся новый горнолыжный центр "Ялгора". sdelanounas.ru (3 uhokud 2012). Дата обращения: 11 uhokud 2026. Архивировано 3 heinkud 2014 года.
- ↑ Лето с веслом. Как горнолыжный курорт «Ялгора» проводит межсезонье, и чем намерен удивить. karelia.news (6 elokud 2022). Дата обращения: 26 uhokud 2026.
- ↑ Горнолыжный курорт Карелии посетили туристы из 52 регионов страны. Дата обращения: 26 uhokud 2026.
- ↑ Каталог курортов SKI.RU. Ялгора. Дата обращения: 11 uhokud 2026. Архивировано 14 keväz'kud 2022 года.
- ↑ Ялгора (Jalgora). Дата обращения: 11 uhokud 2026. Архивировано 16 vilukud 2025 года.
- ↑ Ялгора – карельский спортивно-туристический комплекс, расположенный в уникальном месте. Дата обращения: 26 uhokud 2026.