Pakaiž-uk
| Pakaiž-uk | |
|---|---|
| karj.: Pakkaine | |
 Fotokuvan tegii: "Respublik" tedoline azjmehišt/Nikolai Smirnov | |
| Karjalaine sarnaline tal'vnoid | |
| Mifologii | Nügüd'aigaine Karjalan mifologii |
| Taho | Karjala, Venäma |
| Pol' | prihapol'ne |
| Sündund | Nügüd'aigaine karjalan legend |
| Rindatused | Pakaiž-uk |
Pakaiž-uk (karj.: Pakkaine, ven.: Паккайне) ― karjalan sarnaline tal'vnoid, ühtejitte venälaižen Pakaiž-ukonke[1][2][3]. Karjalan kelel sana Pakkaine znamoičeb «pakaine (морозец)»[4]. Toižiš Pakaiž-ukoišpäi hän eroneb sil, miše hän om nor' mužik bardata[5].
Istorii
Karjalan tal'vnoid-lahjoičii Pakaiž-uk eläb Oloncas. Neciš lidnas joga voden tehtas «Oloncan pakaižed vändod»-festival'.
Hüväsüdäimeližiš noidasižiš azjoiš Pakaiž-ukole abutab hänen todesine sebranik Luminaine ven.: Луминайне[5].
Legend Pakaiž-ukos
Legend Pakaiž-ukos ei ole endevanh. Se oli sätud Oloncan livvin karjalaižiden rahvahaližen muzejan radnikoil, miše kehitoita kodilidnan tal'vturizmad[6].
Legendan mödhe kerdan Oloncaha pörzihe kupcoiden regijono. Sil tal'vel oliba kovad pakaižed. Äkkid matkan aigan ühten kupcan ak zavodi tehta last. Muga ani reges, 1. tal'vkud, om sündunu vägev da terveh prihaine. Vagahaine laps' kebnas vedi ičtaze jügedas matkas da ei värižend-ki[7].
Vaiše konz händast toiba kodihe, hän ezmäižen kerdan ei hätkeks väreganzi. Ozavad tatoi da mamoi sarnaližen matkan muštoks pätiba nimitada ičein prihašt Pakaine-nimel (Морозец)[5].
Prihaine kazvoi vägevan da tervhen. Navedi iloteldas, oli lapsiden zatrindoiš päsijal, kaiken oli ezmäižen tal'vvändoiš da tal'vvoibuiš. А konz kazvoi, ka tegihe ilokahan prihan, miččehe kodiröunan čomad neiččed peitošti mel'duiba.
Priha mäni tatan jäl'gidme, tegihe kupcan da zavodi hüvinmänijan möndan. Vedeli toižihe röunihe da möi sigä čomad oloncan sidomused. Sigäpäi toskeli nägumatomid kodiröunas verazmaižid tavaroid. A praznikpäivil Pakaiž-uk kaiken ihastoiti ičein kodiröunan eläjid. Oloncan eläjad navediba händast melevudes, ilokahas tabas da nores hengenlibus[5].
Oli Pakaiž-ukol üks' harjenemuz: navedi kactas zirkloho da čomiteldas. Necidä harjenemut ei heitand hän i ičein edahaližiš matkoiš. I naku ozaižihe čud - oloncan kupcan nägo niiš zirkloiš, miččihe hän kacui, oli jänu[8].
Konz Pakaiž-uk lebaižihe kodiš Olonec-lidnas, äiluguižed nägod edahaižiš röunišpäi da maišpäi lendiba hänennoks. Siloi kupcan kodimal zavodihe-ki tehta voibud da voibišteldas kesketi, miše todištada ken om kaikid udatikahamb da vägevamb. A iče Pakaiž-uk kaiken kacui sihe, starinoiči ilokahid sarnaižid da nagroi. Hän se jo tezi, ken sid' om todesine Pakaiž-uk.
Nece nügüd'aigaine legend tegihe vodel 1999 «Oloncan pakaižed vändod»-festivalin praznuičendan tüveks. Neciš aigaspäi joga voden tuldas tänna Pakaiž-ukod, miše ühtneda melentartuižihe voibuihe[5].
Heng
Vodel 2005 tuli eläb Pakaiž-ukon heng. Pit'kän ecindan jäl'ghe oli valitud Valerii Kucabov[6], mitte völ ezmäižil oloncan vändoil oli Pakaiž-ukon roliš.
Pakaiž-ukon sädon tegi Irina Porošina, dizainer Petroskoišpäi. Ičeze elorados hän pit'kän aigan oppi da tegi karjalan rahvahan sädoid.
Tüvehe dizainer oti voz'sadan XI—XII kupcan rusttan sädon. Karjalan tal'vnoidan irdnägo tuli mujukaz da ičeladuine. Karjalan Pakaiž-uk lujas eroneb toižiš Pakaiž-ukoišpäi. Ned oma vanhad ukoižed vauktoiden bardoidenke, a nece - om nor' da vägev priha. Toižil hänen «ühtesradnikoiden» päl oma pövud da šapkad, a Karjalan Pakaiž-ukon päl om läm' kaftan, da päs om modakaz kartuz.
Pakaine äjan matkadab Venämal, ühtneb erazvuiččihe praznikoihe da azjtegoihe. Ühtes todesižen abunikanke Luminaiženke kävub lapsiden da socialižihe pertihe. Oli tulnu Pakaiž-ukon Sündundpäiväle Sur'he Ust'ugaha[5].
«Oloncan pakaižed vändod»-festival'
Joga voden, Pakaiž-ukon sündundpäiväl, Olonec-lidnas mäneb «Oloncan pakaižed vändod»-festival'. Erazvuiččil vozil festivalile om tulnu venälaine Pakaiž-uk Sur' Ust'ugaspäi, Baikal'skii Pakaiž-uk, Sosnovoborkii Pakaine Dobrodejevič, Hala Uk Karjalaspäi, Santa-Klaus Laplandijaspäi. Festivalil oma Venäman erazvuiččiš lidnoišpäi tulnuziden Pakaiž-ukoiden voibud.
Festivalin aigan oma mugomad praznikazjtegod, kut «Pakaine jaugmäčvänd» da «Pakaižed ujumižed», miččid pandas muštho festivalin adivod[5].
Rezidencii
Pakaiž-ukon rezidencii om kupcan ezitanaz[9] läz Oloncan rahvahališt muzejad[10]. Rezidencii om avaitud vodel 2014, i sihe mülüb kaks' pähonust: kupcan lauk da uden voden aitaine[7].
Pakaižen kupcan ezitanhal om regi, miččes hän om sündunu. Om puine Pakaiž-ukon velokezr, da völ eraz kalu: «čudo — dengaine». Ken kosketab sidä, se tegese ozavan.
Pakaiž-ukon rezidencijas abunikan om adivoičetai Luminaine. Hän starinoičeb Pakaiž-ukon polhe, tegeb tundištoituzmatkad rezidencijas. Luminaine tundištoitab adivoid kupciden radonke, starinoičeb noidasižiden kaluiden peituses[5].
Homaičendad
- ↑ Карельские Деды Морозы: Талви, Халла и Паккайне.
- ↑ Тринадцать родственников Деда Мороза. ТАСС (28 tal'vkud 2016).
- ↑ Яковенко И.М., Якубова Ф.А. Мифологические ресурсы и направления их исследования для целей туризма // Ученые записки Крымского федерального университета имени В. И. Вернадского. География. Геология. — 2016. — № 2.
- ↑ Дьяконова Мария Владимировна, Родионова Александра Павловна. Язык и культура карел как бренд развития малых территорий (на примере этнолокальной группы карел-людиков) // Современные проблемы сервиса и туризма. — 2018. — № 4. — doi:10.24411/1995-0411-2018-10411.
- ↑ 1 2 3 4 5 6 7 8 Карельский Морозец Паккайне.
- ↑ 1 2 Карельский Дед Мороз.
- ↑ 1 2 Карельский Дед Мороз и его резиденция в Олонце.
- ↑ Карельские Деды Морозы: Талви, Халла и Паккайне.
- ↑ Купеческий двор Паккайне.
- ↑ Резиденция Паккайне.
Literatur
Яковенко И.М., Якубова Ф.А. Мифологические ресурсы и направления их исследования для целей туризма // Ученые записки Крымского федерального университета имени В. И. Вернадского. География. Геология. — 2016. — № 2.
Дьяконова Мария Владимировна, Родионова Александра Павловна. Язык и культура карел как бренд развития малых территорий (на примере этнолокальной группы карел-людиков) // Современные проблемы сервиса и туризма. — 2018. — № 4. — doi:10.24411/1995-0411-2018-10411.