Statistikradnikoiden päiv (Venäma)

Рувики-späi
«Statistikradnikoiden päiv»
День работника статистики.jpg
Tip Professionaline praznik
Om tehtud 2014
Praznuitas Флаг России Venäma
Päiv 25. kezakud

Statistikradnikoiden päiv — professionaline praznik radnikoil, kudambad radaba statistikas — Federaližen valdkundaližen statistikan službas (Rosstatas), analitikanke da toižiš statistižiš organizacijoiš. Praznik om kaikuččen voden Venämal 25. kezakud.

Mail'man statistikan päiv (ven.) (vep., mitte om tehtud Ühtenzoittud rahvahiden organizacijan statistik-komissijan tahton mödhe, praznuitas 20. redukud kerdan vides vodes. Sovetskijan Sojuzan valdkundad praznuičeba necidä praznikad erazvuiččil päivil: Kazahstanas 8. kül'mkud, Ukrainal 5. tal'vkud, Belorussijas 23. elokud.

Istorii

Statistikrad Venämal zavodihe XVIII voz'sadan lopus. Siloi joudjan biznesmehiden radon ketitoitusen taguiči pidi oppida, kut nece azj painastab ekonomikaha, rahvahan eloho.

Sügüz'kus vodel 1802 oli tehtud Korged manifest, miččen mödhe kaikutte ministr voden lopus andab Venäman Imperatorale Valdkundaližen Senatan kal't kirjutadud ühthevedod kaikes rados da kaikiš erištoiš. Siš aigaspäi zavodihe tehta statistikad Venämal.

20. keväz'kud vodel 1811 imperator Aleksandr I allekirjuti manifestan Venäman imperijan policijan ministerstvan tegemižes, kus oli tehtud statistikerišt, mittušt ohjanzi Karl F'odorovič German.

Vodel 1834 Sijaližiden azjoiden ministerstvan Nevondištos oli tehtud eriline statistikerišt, mitte kerazi täuded tedod ministerstvan kaikiš erištoišpäi.

Vodel 1863 Aleksandr II tegi Statistiknevondišton da Keskstatistikhonusen Venäman imperijan Sijaližiden azjoiden ministerstvas, mitte kerazi tedoid sijaližiden komitetoiden da toižiden erištoiden rados.

Vodel 1866 läksi eloho ezmäine statistikžurnal, miččen nimi oli «Venäman imperijan statistikžurnal».

Vodel 1897 mäni ezmäine Venäman imperijan rahvahan kirjutamine (1897).

Vodel 1918 oli tehtud Keskstatistikohjanduz, mitte lugeb rahvast, tegeližuden da manradon objektoid. Sureks pühäks Sovetskijas Sojuzas tegihe azj, konz elokus vodel 1920 mäni kaiken Venäman kirjutamižiden kompleks: demografine, professionaline, manradon da tegeližuden kirjutamine. Lugetišen jäl'ges oli tehtud Venäman elektrofikacijan valdkundaline plan.

Suran Kodiman voinan aigan statistik päti tärktad tegendad, miše voiži pigai lugeda, äjak radnikoid da rahoid meil om, voib-ik sirttä radvägid Venäman päivnouzman polehe.

Vodel 1987 Sovetskijan Sojuzan keskstatistikohjanduz valdmehišton käskön mödhe oli vajehtadud Valdkundaližeks komitetaks statistikan mödhe[1].

Konz murenzihe Sovetskii Sojuz, sünduiba uded socialižed da ekonomižed jugedused, pätta niid voiži vaiše uden statistiksisteman abul. Sen täht oli pästtud eloho valdkundaližed programmad, konz azjantundijad Venämalpäi radoiba Jevrostatanke, Ühtenzoittud rahvahiden organizacijoidenke, Rahvahidenkeskeiženke val'utfondanke, Mail'man bankanke da toižiden radsijoidenke[2].

Keväz'kus vodel 2004 Venäman prezidentan Vladimir Putinan käskön mödhe oli tehtud Valdkundaližen statistikan federaline služb[3].

Statistikradnikoiden päiv Venämal oli tehtud vodel 2014 Valdkundaližen statistikan federaline služban käskön mödhe[4].

Tradicijad

25. kezakud statistižiš organizacijoiš tehtas avaitud uksiden päiväd. Necil päiväl pauklahjoitas veteranoid da radnikoid.

Ken praznuičeb

Statistikradnikoiden päiväd praznuičeba Rosstatan radnikad, analitikad, eriližiden statistikorganizacijoiden radnikad.

Voden 2020 tedoiden mödhe Rosstataha (ven.) (vep. mülüb 66 territoriališt statistikan erištod, mugažo Keskuzapparat, mitte ühtenzoitab 22 ohjandust. Rosstatas radab enamb 17 tuhad mest, 15 580 heišpäi oma valdkundaližed radnikad, 92 % heišpäi — akad, 8 % — mužikad[5].

Nügüdläine statistik

Rosstat keradab, kaičeb da analiziruib statistiktedoid rahvahan ekonomižiš da socialižiš processoiš, miččed mäneba elos. Oficialižen statistikan tedoiden pohjal tehtas Venäman subjektoiden kehitoitusen strategijad. Paiči rahvahan kijritamižid, Rosstat keradab socialižid tedoid: demografižid tedoid eläjiš, radoloiš, radsijoiš da radmatomudes, rahatulos da rahapidändas, elon hüvüdes, läžundoiš da invalidizacijas, tervhuz'organizacijoiš da openduses[6].

Homaičendad

  1. ↑ Venälaižen statistikan istorii. Valdkundaližen statistikan federaline služb. Дата обращения: 20 semendkud 2024.
  2. ↑ 25. kezakud — Statistikradnikoiden päiv vodel 2023: praznikan istorii da tradicijad. Известия (24 kezakud 2023). Дата обращения: 29 semendkud 2024.
  3. ↑ Venäman prezidentan käsk 09.03.2004 № 314. Federaližen erišton sistem. Venäman prezident. Дата обращения: 30 semendkud 2024.
  4. ↑ Statistikradnikoiden päiv - professionaline praznik. Venälaine lehtez. Azjbumagad (20 elokud 2014). Дата обращения: 30 semendkud 2024.
  5. ↑ Российские статистики отмечают профессиональный праздник. РИА Новости (25 kezakud 2020). Дата обращения: 29 semendkud 2024.
  6. ↑ Пресс-релиз: 25 июня – День работника статистики. Территориальный орган Федеральной службы государственной статистики по Оренбургской области. Дата обращения: 29 semendkud 2024.

Lähtked

Om sadud "https://vep.ruwiki.ru/w/index.php?title=Statistikradnikoiden_päiv_(Venäma)&oldid=510964"