Pakaiž-ukon eländsija

Рувики-späi
Melentartuisija
Pakaiž-ukon eländsija Sures Ust'ugas
Терем Деда Мороза в Вотчине
Терем Деда Мороза в Вотчине
Valdkund  Venäma
Lidn Sur' Ust'ug
Sauvomine 2002

Pakaiž-ukon eländsija Sures Ust'ugas (ven.: Вотчина Деда Мороза в Великом Устюге) — adivpertiden da kul'tur-turistižen znamoičendan objektoiden kompleks venälaižen uz'vozližen tematikan da valdkundaližen "Sur' Ust'ug - Pakaiž-ukon Kodima"-projektan aigan 12 kilometras Sures Ust'ugaspäi. Kompleksan territorijal, kus om čoma puišt, tehtas ekskursijad, teatrozutelused da mastar'-klassad, kuna ühtneb Pakaiž-uk da toižed venälaižed fol'klorurohod. Kaikuččen voden rezidencijaha tuleb läz 240 tuhad kirješt lapsišpäi da vanhembiš eläjišpäi (koumandez kirjeižišpäi) kaikes miruspäi[1][2].

Projektan istorii da kehitoituz

Turistine valdkundaline "Sur' Ust'ug - Pakaiž-ukon Kodima" - projekt om tehtud 21.12.1998 Vologdan agjan gubernatoran V. Pozgal'ovan da Moskvan pämehen J. Lužkovan ühthižen käskön mödhe sen täht, miše sirtta edehepäiVenäman istoriližid rahvahaližid tradicijoid. Projektan ezmäižen etapan azjtegoiden keskes oma lapsiden lahjpoligrafijan painand, animacionnijoiden rolikoiden tegend, venälaižiden istirližiden da geografižiden škololimpiadoiden tegen Sures Ust'ugas, rezidencijan puišton generaližen planan tegend[3].

Toižel etapal zavodihe kompleksan sauvomine. Ezmäine objekt - vesttud pupertine oli avaitud 25. tal'vkud vodel 1999 — Suren Ust'ugan Pakaiž-ukon pert'. Pertin tegemine da lendamine oli tehtud putegeližuden predprijatijoil, miččed nügüd' mülüba Vologdan agjan "Sokol'skii DOK" - kompanijaha. Sen tegemine mäni sügüz'kuspäi vodelpäi 1999, kaks'žiruižen pertin korktuz' pohjaspäi ülähasai om 23 metrad[4].

Venäman prezidentan V. Putinan tulend vilukus vodel 2008

Voden 2002 augotišes "Pakaiž-ukon eländsija" - organizacii om pandud Juridižiden mehiden ühthižehe valdkundaližehe lugetišehe (om heittud semendkus vodel 2007, nügüd' "Votčina"-adivpertiden kompleks), zavott'as sauvda adivpertižid da tehta tarbhašt infrastrukturad.

Vodeks 2024 nece om 11 pertišt adivoičetusen täht, restoranad da "Snežinka"-kafe, venälaine kül'bet' da sauna. Paiči Pakaiž-ukon pertid om letud mugoižed turistižed objektad kut: Tehuz' da Sarnoiden Pert', Počt, Radhonuz da Paja, Muštlahjoiden lauk da Modan pert', Zoopark da Jäžom. Kompleks nimitadas Votčinaks (eländsijaks)[5][6][7].

Vodel 2023 projektale täudui 25 vot. Logistikan parembzoitusen täht tehtihe udeks Suren Ust'ugan aeroport da pästtihe eriližed turistižed pojezdad, vodes tänna tuleb läz pol't millionad turistad. Eländsija kehitoitase: vodel 2023 Vologdan agjan valdmehištol om allekirjutadud kožmuz venälaižen Cosmos Hotel Group - adivpertiden operatoranke, mitte mülüb AFK "Sistem" - korporacijaha. Rezidencijas linneba uded tundištuzmatkad da turistižed čogad, pindal 87 gektarad linneb letud adivpertiden, sport- da ilo-objektoiden kompleks. Uz' turistine klaster andab Vologdan agjale läz pol' tuhad radsijad[8].

Geral'dik

Pakaiž-ukon štandart
Pakaiž-ukon znam, om registriruitud kezakus vodel 2000

Suren Ust'ugan Pakaiž-ukon valdkundanznam om registriruitud Venälaižes geral'dikan kollegijas. Päelementad — laudaine lumitähthaižen formal, deviz, hobedaine koron, kaks' kondjad-laudaižen pidäjad, oravaine, kelloine da vihandan kuzen oksad.

Laudaižen taivhankarvaine-hobed muju om sur'hengeližuden, puhthuden da toziavoimuden simvol, laudaižen päl om koron, mitte ozutab sur'znamasišt ristitud. Lumitähthaižen form da pakaižen pirdad sidoba sarnališt gerojad tal'venke. Oravaine pagižeb radonnavedindan polhe, kondjad vahvudes da väges. Kuz' om bohatusen da igähižen elon simvol. "Tege hüvüt" - deviz avaidab venälaižen sarnaližen hengen südäimištod da kucub gumanižudeks. Pen' kelloine lentaižen keskusen päl, miččel om kirjutadud deviz, andab toivod, miše sanutud melet tuleba eloho[9].

Pakaiž-ukon počtan flag

Pakaiž-ukol om kaks' flagad: ičeze kudesan da počtan štandart.

Bir'uzan štandartan keskel kuz'agjaižen hobedan lumitähthaižen kuval om ozutadud pen' pidäjan gerb, molenbiš polišpäi om pandud nimen ezmäižed kirjamed[9].

Počtflagan keskel, mitte om mujutadud Venäman koumel mujul, om pandud torvut — enččiden voz'sadoiden piguližiden počtkaretoiden tarbhaine atribut. Kaks' lumitähthašt ozutab korrespondencijan sajale, Suren Ust'ugan gerb sidob Votčinan magišt tozielod elonke, mitte om ümbri[9].

Venäman Geral'dižen Sebran ühtnikad Jefim da jelena Komarovskijad tegiba da lahjoičiba lidnale geral'dižiden elementoiden kuvid[9].

Legend

Suren Ust'ugan valdkundanznamal om ozutadud Vodolei (Neptun-Jumal al'ternativižen istoriližen versijan mödhe). Vezi kahtes nökačuspäi Vodolejan kädes om sijaližiden jogiden ühtenzoitamižen simvol, niiden ühthižes joksmusespäi zavodiše Pohjoiž-Dvina-jogi[10] .

Lapsiden ozatelused vodel 2017 ozateluzlaudal Votčinas

Starinan mödhe (tegii Ol'ga Kul'nevskaja) Vodolei oli Pakaižen vanhemban vellen, hö eliba läz Gleden-mäged ei edahan Sur' Ust'ug-lidnaspäi. Velled-kudesad ohjanziba jogiden da järviden vezil, mugažo sadegil vihmaspäi da lumespäi. Vodolei ižandoiči voden lämäs aigas, a Pakaine radoi tal'vkuspäi. Kerdan velled ridliba, Pakaine läksi matkustamha mail'man mödhe. Hän mäni ümbri Pohjoiž-mapoliškos Japonijaspäi Edahaižehe Pohjoižehesai da tuli Anglijaha. Hahkištunu matkan aigan hänen südäimehe tuli sur' tusk kodid möto, hän pörzihe Surhe Ust'ugaha, kus ižandoiči Vodolei. Vel'l' kaburzi Pakaiž-ukod da tariči tulda elole ei edahaks lidnaspäi, ohjandamha tal'vlondusel da tehta čudoid hüvüdeks[11][12].

Pakaiž-uk praznuičeb sündundpäiväd 18. kül'mkud, venälaižen kudesan päiväd hänen abunikad löuziba vodel 2005. Sis aigaspäi Vologdan agjaha tuleba ezmäižed pakuižed[13].

Keväden tulendan praznik

Tundištoituzmatkad Votčinan turistižiden objektoiden mödhe

Jogavoččoden tundištoituzmatkoiden programmoiden päobjektad:

  • Sarnoiden tehuz'. Vändkonkursad-tegendad Jagi-babalpäi da labirint Pauk Paukovičalpäi, sport-sarnaline vaumičemine da karguiden urok ani mecas.
  • Paja mini-lekcijanke.
  • Sarnoiden pert'. Interaktivine kvest noriden täht, miše löuta lähtend pertišpäi da kaita Ut Vot.
  • Zoosad da lapsiden ajamine koiril.
  • Radpaja. Master-klassad čomenzoitusiden da bobaižiden tegemižen mödhe.
  • Pakaiž-ukon pert'. Tundištoituzmatk 12 honusen mödhe da hengeline besed venälaižen päkudesanke Tronzalas.
  • Počterišt. Kirjeižiden kaičendsisteman da lapsiden lajoiden ozutamine[7].

Adres kirjeižiden täht — 162390, Vologdan agj, Sur' Ust'ug, Okt'abr'skii irdkujo, pert' nomer 1А, Venäman Pakaiž-ukole. No Venäman počt tob kirjeižid Pakaiž-ukole lühenzoittud adresadme: «Sur' Ust'ug, Pakaiž-ukole»[14].

Homaičendad

  1. ↑ Объекты Вотчины. Дом Деда Мороза.
  2. ↑ Деду Морозу из Великого Устюга пришло более 4,5 миллионов писем. Cultinfo.ru (24 kül'mkud 2023).
  3. ↑ Лужков Ю. М., Позгалев В. Е.. Распоряжение «О реализации проекта "Великий Устюг - родина Деда Мороза"». Информационная компания «Кодекс» (21 tal'vkud 1998).
  4. ↑ В канун Нового года вспоминаем о строительстве терема Деда Мороза на его Вотчине в Великом Устюге (30 tal'vkud 2020).
  5. ↑ ОАО "ВОТЧИНА ДЕДА МОРОЗА", сводка. vypiska-nalog.com.
  6. ↑ О «Вотчине Деда Мороза». Гостиничный комплекс «Вотчина».
  7. ↑ 1 2 Мероприятия. Дом Деда Мороза.
  8. ↑ Вотчина Деда Мороза станет туристическим кластером мирового уровня. РИА Новости (31 redukud 2023).
  9. ↑ 1 2 3 4 Памятов О. Геральдика Деда Мороза. Академия русской символики «Марс».
  10. ↑ Герб города Великий Устюг: символ Нового Года в России, численность и описание родины Деда Мороза. Блог про гербы.
  11. ↑ Легенда. Дом Деда Мороза.
  12. ↑ Кульневская О. Братья. Проза.ру.
  13. ↑ Интересные факты про Деда Мороза. kp.ru.
  14. ↑ Чухнин И. Российский Дед Мороз получил 4 миллиона 582 тысячи 736 писем со всего мира. kp.ru (4 elokud 2023).
Om sadud "https://vep.ruwiki.ru/w/index.php?title=Pakaiž-ukon_eländsija&oldid=510664"