Venäman sambon päiv
| Venäman sambon päiv | |
|---|---|
 | |
| Tip | Valdkundaline praznik |
| Om tehtud | Venäman Prezidentan Vladimir Putinan käskol vodel 2022 |
| Praznuitas | Venäma |
| Päiv | 16. kül'mkud |
| Praznuičend | 16. kül'mkud |
Venäman sambon päiv (ven.: Всероссийский день самбо) on sportpraznik, mitte praznuičese Venämal vodelpäi 2022 joga voden 16. kül'mkud, sambon sportladun popul'arizacian da kehitoitusen täht. Nece om ei vaiše kaikid suremb sambovoibištelend (sportvoibištelendad da praznikan azjtegod mäneba kaikes mas), no völ tärged socialine azjtego, mitte abutab kucta lapsid da norištod sportaha.
Praznikan päivmär 16. kül'mkud om vahvištoittud Venäman prezidentan Vladimir Putinan käskol tal'vkus vodel 2022[1].
«Venäman sambon päiv — ei ole voibištelend voibištelendan täht. Nece om šans rata kaikel mal ühtes joukus. Azjtego pidetas sen täht, miše kucta sambon sportčasuile kut voib enamba lapsid, vajehtuzigäižid da aigvoččid. Praznik mänetase federaližel korktudel. Venäman sambon päiv-praznikan päsabustuz om mehiden äjüz'. Enamba kluboid pidetas necel päiväl voibištelendad lapsiden täht, noriden sambistoiden täht. Mugomil turniroil ei ole vägestadud ühtnikoid, paazj om ühtnend niihe.»
— Sergei Jelisejev, Venäman sambofederacijan Prezident
Praznikan istorii da tradicijad
Sambon sündundpäiv om 16. kül'mkud vodel 1938, siloi Sovetskijan Sojuzan Sportkomitet painzi käskon № 633 «Voibištelendan valdaližen stilin (sambo) kehitoituses» da mülüti sidä valdkundan kehitoitajiden sportladuiden keskhe. A iče sambo-sportlad meiden male tuli vodel 1923[2].
Ezmäižen kerdan levedas praznuičemha sambo tedendad pätiba äi vozid mändes sündundpäiväspäi. 19. redukud vodel 2008 Moskvas tehtihe «Sambon jubilei Rusttal avoirdal»-koncert-sportpraznikan, 70-voččen venäman sambon jubilejan praznuičemižen täht. Praznikan tegijad oliba Venäman da Moskvan sambofederacijad. Azjtegoho ühtniba veteranad, sportmehed, harjoitajad, ohjandajad, regionaližiden sambon federacijoiden ühtnikad da arvostadud adivod[3].
Vodelpäi 2008 Venäman sambofederacii zavodi joga voden kül'mkun augotišes mänetada jouksportazjtegod «Sambo päiv»-päiväks.
Vodel 2015 turnitad mänetiba jo Venäman 100 lidnas, kuna ühtni enamb 11 000 norid sportmehid da 98 lidnas turniroil radoiba regionaližed telekanalad, vestišton radnikad da internet-painused. Täl vodel praznuičemine oli udes formatas. Voibištelendan ühtnikoile tariž oli pidäda ven.: «Ты готов к сдаче ГТО?»-testad, ozutada ičekaičusen mahtod, miččed mülüba Venäman likund-sportan ven.: «Готов к труду и обороне»-kompleksaha. Völ oliba voibištelendad Venäman subjektoiden joukuiden keskes.
Vodel 2016 voibuižiden sädajad vaumičiba eriližed sambon pauklahjad. Ezmäižen kerdan Venäman sambon päiv-praznikan praznuičemha ühtni Doneckan rahvahaližen valdkundan sportjouk.
Vodel 2017 Sambo päiv oli sportan da opendusen Sambo-70-keskuses. Voibištelendoihe ühtni 200 nort sportmest 16 sportjoukud kaikišpäi Venäman federaližiš subjektoišpäi. Praznikavaidusen pätem oli kosmos. Arvadivon oli Venäman Geroi, lendai-kosmonavt F'odor Jurčihin. Hän andoi Venäman da Evropan sambofederacijan prezidentale Sergei Jelisejevale flagan, mitte oli olnu kosmosas.
2018 voz' sambon täht oli jubileine, sille täudui 80 vot. Necel päiväl voibištelendad da praznikan azjtegod mäniba ühten aigan enamba, mi 150 Venäman lidnas. Jubuleižen praznuičendan aigan Tetabuden käveluzkujol Lužniki-sportkompleksas oli pandud muštpachan aluz rahvahaližen sambon tegijoiden Anatolii Harlampijevan, Vasilii Oščepkovan da Viktor Spiridonovan muštoks. Völ necel päiväl Venäman Prezident Vladimir Putin allekirjuti käskon «Venäman sambon tugeduses da kehitoituses».
18. tal'vkud vodel 2020 oli sambon tegijoiden muštpachišton praznikavaidusen Moskvas Tetabuden käveluzkujol Lužniki-sportkompleksas. Muštpachišt om tehtud vaskespäi da granitaspäi. Sen tegi vestajiden jouk Venäman rahvahaližen pirdajan Salavat Ščerbakovan ohjandusel. Vestatuz ozutab sportmehid, kudambad tegeba «mel'nic»-vägestuzmahton, hö vedäba voibištelendan orbital vösttud polusferal. Orbital voib nägištada devizan: «Sambo om vägestusen tedo» (ven.: «Самбо — наука побеждать»). Praznikavaidusel oliba Venäman voin-istorižen sebran pämez' Vladimir Medinskii, Venäman sambofederacijan nevondišton pämez' Rašid Nurgalijev, Venäman sportan ministr Oleg Maticin, Moskvan pämez' Sergei Sob'anin. Tradicijan mödhe necel päiväl pidetihe erazvuiččed sportan azjtegod[4].
22. uhokud vodel 2022 Lužniki-sportkompleksan Tetabuden käveluzkujol oli avaitud stella Sambon augonpanijoiden muštoks. Stella om pandud Sambo-muštpachišton lähen.
19. tal'vkud vodel 2022 Venäman Prezidentan käskol praznik tegihe Venämaižeks.
Vodel 2023 sambo praznuiči 85 vot. Kül'mkun 15. päiväspäi 17. päivähasai vodel 2023 voibištelendad mäniba 100 Venäman lidnas. Praznuičendan päazjan tegihe «Aig vägestada» forum, miččel vahvištoitihe Venäman sambon flag, sambistan vahvad sanad da kodeks. 16. kül'mkud oli tehtud počtmark 85-voččeks sambon jubilejaks. Mark läksi Venämal počtkävutamižehe Sportladud-serijas. Paiči ezmäižen gašenijan markad, voib ostta blok, miččes om ühesa markad. Počtmarkan ližaks paindihe ezmäižen päivän kirjeiženkored da tehtihe eriližen gašenijan štempelid Moskvan da Piterin täht, da völ kartmaksimum (ozatelendkartaine necen počtmarkanke oiktal polel). Völ 16. kül'mkud vodel 2023 ezmäine Venäman Varumatomuden Nevondišton sekretarin varapämez', Venäman sambofederacijan nevondišton pämez' Rašid Nurgalijev pauklahjoiči Venäman sambofederacijan prezidentale Sergei Jelisejevale znam'a Rahvahidenkeskeižes sambon da boksan keskuses Lužniki-sportkompleksas[5].
Vodel 2024 Venäman sambon päiväks om tehtud Sambo kaikiden täht-festival' (ven.: «Самбо для всех»). Festival' mäni openduzorganizacijoiš kül'mkun 11. päiväspäi 17. päivähasai vodel 2024. Festivalin programmas oliba ei vaiše sambon voibištelendad, no i sportestafetad, GTO-normoiden ozutand, praktikharjoitulusiden openduzčasud. Sportpraznikaha ühtniba openduzorganizacijad, Venäman ven.: «Zа самбо»-projektan ühtnikad, ven.: «Самбо в ВУЗы» da «Самбо в Профы»-alaprojektoiden palas. Sportazjtegoho ühtniba:
- Openduzorganizacijoiden 7-18-voččed openikad;
- «tedomahtoižen opendusen openikad» — kategorii 15-18-voččed ühtnikad;
- kategorii «Korktan školan üläopenikad» — üläopendusen da tedomahtoižen opendusen 18-25-voččed openikad;
- kstegorii «tundijad»: administracijan radnikod, likundurokoiden opendajad, ližaopendusen opendajad da openduzorganizacijoiden harjoitajad da sudjad eriigähäžed[6].
Tradicijan mödhe Venäman sambon päiv — 2024-turnir oli Moskvas. Sihe ühtniba Venäman 15 regionoiden 12-14-voččed vajehtuzigäižed[7].
19. kül'mkud vodel 2024 [[Soči}}-lidnas Venäman sambon päiväks oli mänetadud kanzaline ven.: «Самбониада»-sportpraznik. Azjtegoho, miččen päsabutuz om socialine adaptacii da röunatadud voumusidenke lapsiden likundan tervehtumine, ühtniba Adaptivižen Sambo-keskusen lapsed da sočin sambofederacijan sportmehed. Tradicijan mödhe jogahine ühtnik tegihe vägestajaks da oli pauklahjoitud medalil da kitändbumagal[8].
Azjtegod
Necen praznikpäivän aigan tradician mödhe pidetas sambon sportvoibištelendad. Praznikavaidusel nored sportškoliden openikad anttas vahvan sanan ičein armhan sportrodun täht.
Melentartuižed toziazjad
Oficialine arvostuz — Ezmäine ičekaičusen sekcii oruzjata avaižihe vodel 1923 Moskvas, no oficialižeks sportladuks sambo tegihe vaiše 15 vot päliči vodel 1938.
Ezmäine praznuičend — Ezmäižen kerdan Venäman sambon päiv praznuičetihe, konz necile sportladule täudui 70 vot — vodel 2008. 19. redukud Moskvas oli «Sambo jubilei Rusttal avoirdal»-koncert-sportpraznk.
Sambon status Venämal — Vodel 2003 Valdkundaline sportan komitet lugi sambo Venäman hüväks da tärktaks rahvahaližeks sportladuks.
Sambon tegijoiden muštpacaz — Vodel 2018 80-voččel sambo jubilejal Tetabuden käveluzkujol Lužnikoiš oli necen sportladun augonpanijoiden muštpacazalusen panend. Oficiališti mustpachišton ezitiba 18. tal'vkud vodel 2020.
Sambo — nece om olimpiadan sportlad — Vodel 2021 Rahvahidenkeskeine olimpikkomitet vahvištoiti sambo olimpiadsportladuks. No Olimpiadan programmaha sambo kuni ei ole pandud.
Miččes igäs voib ühtneda neche sportladuhu? — Sambon sportškolihe tobjimalaz ottas 10-voččid lapsid. Erased sekcijad ottas i norembid lapsid. No rates heidenke harjoitajad ottas ühthižlikundan harjoitusid da vaiše erasid sambo-elementoid sikš, ku vahvištoittud openduzprogrammad peniden lapsiden täht ei ole[9].
Homaičendad
- ↑ Указ президента Российской Федерации "О Дне самбо" №924. www.publication.pravo.gov.ru. Дата обращения: 19 tal'vkud 2022.
- ↑ Путин ввел в России День самбо. www.sportrbc.ru. Дата обращения: 19 tal'vkud 2022.
- ↑ Всероссийская федерация самбо. www.sambo.ru.
- ↑ В Москве открыли мемориал основоположникам самбо. www.iz.ru. Дата обращения: 18 kül'mkud 2020.
- ↑ "Время побеждать". Русскому национальному единоборству самбо - 85 лет. www.tass.ru. Дата обращения: 16 kül'mkud 2023.
- ↑ Всероссийский фестиваль «САМБО ДЛЯ ВСЕХ», посвященный Всероссийскому дню самбо. www.sportobr.ru.
- ↑ Финал турнира "Всероссийский день самбо – 2024" состоялся в Москве. www.m24.ru. Дата обращения: 20 kül'mkud 2024.
- ↑ В городе Сочи прошла праздничная семейно-спортивная «Самбониада», приуроченная к празднованию Всероссийского дня самбо! www.sambo.ru. Дата обращения: 19 kül'mkud 2024.
- ↑ Всероссийский день самбо в 2024 году: история и традиции праздника. www.kp.ru.
Tarkendused
- Venäman sambofederacii Oficialine sait.
|
Правообладателем данного материала является АНО «Интернет-энциклопедия «РУВИКИ». Использование данного материала на других сайтах возможно только с согласия АНО «Интернет-энциклопедия «РУВИКИ». |