Kalakurnik

Рувики-späi
Kalakurnik
Рыбник.jpg
Rahvahaline sömine
Russian cuisine[d]
Sömtavarad
Päsömtavarad Kala[d]
Andand
Sömižen tip Päsömine[d]

Sigä minai om kaik ühtenzoittud: i sobiden vajehtamine, i kalakurnikan palaine s'omgaspäi, mittušt minei andoiba pomorad, i viž prosforad Golgofskijas skitaspäi, i konjakan butulk, i tühjad patronad, püdimed, bl'osnad…

М. М. Prišvin. Sarnaližehe kolobaižehe. 1908[1]

Kalakurnik (ven.: Ры́бник) — tradicionaline venälaine pirg kalanke muiktas tahtaspäi, om lujas popul'arine Pohjoiž-Venämal da Sibiriš[2]. Kalakurnik om tradicionaline karjalaižiden da vepsläižiden pirg[3]. V. V. Pohl'obkin rindati karjalašt kalakurnikad suomalaižiden da estonialaižiden kalapirgoidenke, miččiden nimi oli kalakukko[4].

Üleižed tedod

Pašttihe saubatud da avaitud kalakurnikad[5], niil oli koumečogaine form[6][2], a niide erigoičiz om siš, miše päline tehtas kogonaižes puhtastadud kalaspäi, no se ei ole čaptud penihe paloihe[5], libo om pandud kalan surembad palaižed[6].

Kalakurnikad jaz'-kalanke, lahnanke da madehenke södihe jogapäiväižes elos. Pirgad penen kalanke nimitadihe mejevnikoikš, mal'avnikoikš da molevatikoikš. Avaitud kalakurnikad Änižröunas nimitadihe žarencoikš.

Praznikaližil kalakurnikol oliba erazvuiččed nimed, ned erigoitihe kalan mödhe (vjunnik, jazkovnik) da niil oliba mugažo erazvuiččed ritualižed funkcijad sajil da suril praznikoil voden aigan[5].

Kalakurnik oli kaiken aigan muštstolal, sid' oli sido ortodoksižen kalan simvolanke[7]. Kalakurnikad pohjoižes ottihe kerdale dorogaha[5].

Paštamine

Kalakurnikan tegemine zavodihe sišpäi, miše pandihe kogonaižen kalan alembaižele tahthale, mitte tehtihe rugižjauhospäi libo nižujauhospäi[8], sid' ülähäks pandihe kala, sid' lukad da kartohkad hoikil palaižil[2], sauptihe ülähänpäi tahthal[5], da pašttihe.

Miše el'geta, konz kalakurnik om vaumiž, kebnäs kosktihe pirgad: ku kala erigoičese tahthaspäi, sid' kalakurnik om vaumiž[8]. Sauptud kalakurnik södihe muga: heittihe "katust", ottihe kala da södihe se, pašttud leib södihe eriži[6].

V. I. Dal'an tedoiden mödhe kalakurnikaha, miččes oli kogonaine kala, ližatihe mugažo kapustad[9]. Nügüdläižiden receptoiden mödhe kalakurnikad tehtas kalalihaspäi, ližatas kartohkpudrod da žard'ud lukad[10][11].

Vepsläižil

Vepsläižed ende paštihe kalakurnikad sajan da muštstolan täht. Nece tradicii eläb nügüd'-ki vepsläižiš küliš. Kalakurnik pašttas vereses kalaspäi: haugespäi, lahnaspäi, sigaspäi, avhenespäi. Kalakurnikan täht ajadas levedad tahthast rugižjauhospäi da pandas südäimehe kalad. Tahthan röunoid kingitadas, ülähänpäi tehtas reigaižen da pandas kalakurnikan päčhe.

Ku kala om sur', kalakurnik om pit'k da kehker. Ku kala om keskmäraine libo pen', siloi kaik kalad pandas südäimehe da sauptas. Haugespäi tehtas koumečogaižid kalakurnikoid da hauged žardäs lukanke, sauptas röunad. Ende vepsläižed pašttihe kalakurnikad vaiše rugižjauhospäi, nügüd' paksus tehtas nižujauhospäi[3].

Homaičendad

  1. ↑ Пришвин М. М. За волшебным колобком. Глава II. По обещанию. Соловецкий монастырь // Собрание сочинений в восьми томах / Вступит. статья В. Д. Пришвиной; Коммент. А. Л. Киселёва. — М.: Художественная литература, 1982. — Т. 1. — С. 247. — 830 с. — 150 000 экз.
  2. ↑ 1 2 3 Н. И. Ковалёв, 1979.
  3. ↑ 1 2 Кушать подано: готовим суп, мясо, пироги и овсяный кисель по традиционным вологодским рецептам (29 heinkud 2022). Дата обращения: 16 tal'vkud 2025.
  4. ↑ В. В. Похлёбкин, 1983.
  5. ↑ 1 2 3 4 5 К. В. Осипова, 2021.
  6. ↑ 1 2 3 Е. М. Величко, 1992.
  7. ↑ А. В. Гура, 2009.
  8. ↑ 1 2 Л. А. Черёмухина, 2013.
  9. ↑ Рыба. — Толковый словарь живого великорусского языка : в 4 т. / авт.-сост. В. И. Даль. — 2-е изд.. — СПб., 1880—1882 гг..
  10. ↑ В. М. Ковалёв, 1989.
  11. ↑ Н. И. Ковалёв, 1995.

Literatur

  • Величко Е. М. и др. Пироги — украшение русского стола // Русская народная кухня / Е. М. Величко, Н. И. Ковалёв, В. В. Усов. — М.: Агропромиздат, 1992. — С. 211—212. — 303 с. — 100 000 экз. — ISBN 5-10-0000-31-7.
  • Пирог / Гура А. В. // Славянские древности: Этнолингвистический словарь : в 5 т. / под общ. ред. Н. И. Толстого; Институт славяноведения РАН. — М. : Межд. отношения, 2009. — Т. 4: П (Переправа через воду) — С (Сито). — С. 50. — ISBN 5-7133-0703-4, 978-5-7133-1312-8.
  • Ковалёв В. М., Могильный Н. П. Рыбник // Рецепты русской кухни. — М.: Мир, 1989. — С. 190. — 304 с.
  • Ковалёв Н. И., Карцева Н. Я. «Вот такие пироги…» // Наука и жизнь] : журнал. — 1979. — Вып. 12. — С. 136—141. — ISSN 0028-1263.
  • Ковалёв Н. И. Рыбник // Блюда русского стола. История и названия. — СПб.: Лениздат, 1995. — С. 89. — 317 с. — 10 000 экз. — ISBN 5-289-01718-6.
  • Осипова К. В. Этнолингвистические словари и перспективы этнолингвистической лексикографии // Филологический класс : журнал. — Екатеринбург, 2021. — ISSN 2071-2405.
  • Похлёбкин В. В. Карельская кухня // Национальные кухни наших народов (Основные кулинарные направления, их история и особенности. Рецептура). — М.: Лёгкая и пищевая промышленность, 1983. — С. 277. — 304 с.
  • Черёмухина Л. А. Рыбник // Северная кухня: [сборник]. — 3-е изд., испр. — Архангельск: АВФ-книга, 2013. — С. 161. — 208 с. — 1500 экз. — ISBN 978-5-905810-29-9.
Om sadud "https://vep.ruwiki.ru/w/index.php?title=Kalakurnik&oldid=452189"