Gran'onan stokanan päiv
| Gran'onan stokanan päiv | |
|---|---|
 | |
| Oficialižesti | ei ole oficialine |
| Om tehtud | vodel 2011 |
| Praznuitas | Venäma |
| Päiv | 11. sügüz’kud |
| Praznuičend | kaikuččen voden |
| Om sidotud | dizaineran Vera Muhinan sündundpäivänke |
Gran'onan stokanan päiv (ven.: День гранёного стакана) om oficialimatoi praznik, mitte praznuitas Venämal 11. sügüz'kud. Praznik om omištadud sovetskijan aigan da sen jäl'ges ühtele simvolale - 'gran'onstokanale, mitte kävutihe kaikjal erazvuiččiš elon erištoiš, jogapüivüižes elos da sömän tegimištos.
Paznikan istorii
Gran'onan stokanan päiv oli ezmäižen kerdan taritud vodel 2011 "St'oklan muzei" radnikoiden pakičusen mödhe Tverin agjan Ülä Voločok-lidnas, kus st'oklan tegemižen tradicijal om pit'k istorii. 11. sügüz'kud oli valitud muite: nece päiv ühtenzoitase tetaban sovetskijan dizaineran Vera Muhinan sündundpäivanke, kudamb ühten versijan mödhe ühtni gran'onan stokanan dizainan tegemižehe.
Gran'onan stokanan istorii
Gran'on stokan tegihe sovetskijan aigan da jäl'ges sovetskijad elod tarbhaižeks atributaks. Ezmäine mugoine stokan oli pästtud Sovetskijas Sojuzas vodel 1943. Se oli tehtud st'oklan zavodal Gus-Hristal'nii-lidnas. Vahv kohtaižidenke röunoidenke stokan pigai tegihe populärižeks i se kävutihe erazvuiččiš erištoiš - jogapäiväižes elos da sömän tegemižes, vagon-restoranoiš[1][2].
Gran'onan stokanan dizainan tegii om Vera Muhina, tetab sovetskii vestai, kudamb mugažo om tetab "Radnik da kolhoznic"-muštpachan tegii. No todištusid hänen tegemižen polhe ei ole, i nece versii jäb vaiše populärižehe fol'kloraha[3].
Znamoičend da tradicijad
Gran'on stokan tegihe kogonaižen aigan simvolaks da kul'turan jäl'gendusen objektaks. Se ühtenzoitase sovetskijan elonveronke, üläopenikan elonke, mugažo valdkundan ekonomikan lendatusenke da laskendanke. SSSRas gran'onan stokan kävutihe sömtegimižen märičendan täht, paksus oli oluden möndsijoiš, gaziruidud veden avtomatoiš i ühthižiš sömsijoiš.
Gran'onan stokanan päiväl tehtas erazvuiččid azjtegoid, miččed om oigetud mušton kaičendaha neciš azjas. Muzejoiš da kul'turkeskusiš tehtas ozutelusid da lekcijoid, miččed om omištadud gran'onale stokanale da st'okltegimišton istorijale Venämal. Necil päiväl äjad mugažo johtutaba sovetskijan elon tradicijoid da eričusid, miččed om sidotud necen astjan kävutamiženke[4].
Nügüd'aigaine elo
Nügüd'aigan gran'on stokan jäb tarbhaižeks predmetaks elos kacmata nügüd'aigaižiden astjoiden erazvuiččele mujule. Sen simvolik, znamoičend da kävutoitand kingitada homaitust kut vanhembal sugupol'vel, muga norembil-ki. Venämal i sen irdpolel voib vastata ristituid, kudambad keradaba gran'onstokanoid da toižid sovetskijan aigan astjaoid, navediba Sovetskijan Sojuzan istorijad da kul'turad.
Gran'onan stokanan päiv nece ei ole vaiše enččen aigan arvostamine, se om mušt siš, kut kebnäd da jogapäiväižed azjad voiba tehtas erazvuiččiden aigoiden da kul'turtradcijoiden simvolikoikš[5].
Homaičendad
- ↑ День гранёного стакана! Стелосоюз. Дата обращения: 9 kül'mkud 2025.
- ↑ Елена Аристархова. В Гусь-Хрустальном появился музей граненого стакана. Российская газета. Дата обращения: 9 kül'mkud 2025.
- ↑ День гранённого стакана. РестораторШеф (21 tal'vkud 2022). Дата обращения: 9 kül'mkud 2025.
- ↑ Соловьёва Екатерина. Кто и зачем на самом деле придумал граненый стакан? История.РФ Главный исторический портал страны. Дата обращения: 9 kül'mkud 2025.
- ↑ Светлана Биткина. Экспедиция "СОЮЗа" побывала на родине граненого стакана (16 semendkud 2016). Дата обращения: 9 kül'mkud 2025.
Literatur
- И. А. Пугачёв. Стаканы // Товарный словарь. — М.: Государственное издательство торговой литературы, 1960. — Т. VIII. — С. 383—385.
- Чернова, И. М. Советский быт: прошлое и настоящее. — Москва: Олма Медиа Групп, 2010.
- Лаврова, Н. В. История советского дизайна. — Москва: Арт-Родник, 2012.