Viktor Jeršov
| Viktor Petrovič Jeršov | |
|---|---|
| ven.: Виктор Петрович Ершов | |
| Sündundpäiv | 27. elokud 1937 |
| Sündundsija: | Azmjärv-külä, Piterin agj |
| Kolendpäiv: | 13. elokud 2021 (83 vot) |
| Kolendsija: | Vidl-külä, Piterin agj |
| Rahvahuz' | Sovetskii Sojuz→Venäma |
| Professijad: | runoilii, opendai, Vidlan školan pämez' |
Viktor Jeršov (ven.: Виктор Петрович Ершов; oli sündunu 28. elokud vodel 1937 Azmjärv-külähä, Piterin agj, Sovetskii Sojuz — koli 13. elokud vodel 2021 Vidlas, Piterin agj, Venäma) - om vepsän runoilii, vepsän kelen tundii, opendai, Vidlan školan pämez', A.I. Gercenan nimel universitetan pästnik, fizikan opendai školas.
Elostarin
Viktor Petrovič om sündunu 27. elokud vodel 1937 penehe külähä, miččen nimi om Azmjärv. Viktor lopi nel’l’ klassad Azmjärves da läksi opendushe Järvhe. Jäl’ges školad hän ajoi opendushe Lodeinijaha Pöudho pedagogižehe radmahttehnikumaha, lopi sen da zavodi rata Lodeinijan Pöudon školas №2.
Päzui opendamhas A.I. Gercenan nimel universitetaha fizikan i matematikan fakul’tetale. Sai korktad opendust da ajoi radole Vidlaha[1]. Vodel 1959 zavodi rata Vidlan školas fizikan opendajan. Rates Vidlan školas nai venän kelen da literaturan opendajal Nadežda Nikilajevna. Heiden kanzas om sündunu kaks' hüväd tütärt.Äjan väged da hengen lämäd andoiba vahhembad ičeze lapsile da openikoile, kazvatiba hüvid ristituid.
Vozil 1989-1997 oli Vidlan školan pämehen[2]. Viktor Petrovič oli ezmäižen ristitun, kudamb toi Vidlan školaha vepsän kul’turad. Ühtes opendajanke Gennadii Dmitrijevič Maksimovanke Viktor Petrovič avaiži Vidlan školas ezmäižen klassan, miččes lapsed zavodiba opeta urokoil kodikel’t. Vodel 1989 рän kucui školha radole Vera Vasiljevna Lodiginad, miše vedäda školas vepsän kelen fakul’tativad.
Vodel 2002 Viktor Petrovič oli ezmäižen mail'man vepsän kirjutajiden suiman ühtnikan, mitte om männu Kuhmo-lidnas, Suomes.
Runod
Kaiken igän Viktor Petrovič kirjuti runoid venän da vepsän kelel. Hän om kirjutanu laps’aigas, ičeze mas, mecas, živatoiš da linduiš – hänen runoiš voib nägištada kaikid elon polid. Om niiš ilod, armastust, kibud i hol’t ičeze penes rahvahas, kaikuččes ristitus, kaikuččes tactud küläs i sures lidnas. Nece hüvin nägub runos «Kättennou pajo»:
Kazvad, söteine, sureks,
Vaiše kerada mel't:
Ala kadota jurid,
Ala unohta kel't.
Hänen runod om paindud äjiš kirjoiš, miččid lugeba lapsed školas. Niid voib löuta erazvuiččiš kogomusiš i lugeda kulehtesiš.
Bibliografii
- Jeršov V., Kodirandaine: [сборник стихов] / Viktor Jeršov; l.33-38; - Petroskoi: «Karjala», 1996. - 126 с. - ISBN 5-7545-0708-9.
- Jeršov V., Tege hüväd, Kukoi da reboi: [Kukojeva, N. A. Vepsän kel': 4. klass: openduzkirj] / Viktor Jeršov; – Петрозаводск: Фонд творческой инициативы, 2014, Lehtpol' 85-86.
- Jeršov V., Jäniš-kelastai: [[Петрова, Н. А. Родной (вепсский) язык. 9 класс: учебное издание для общеобразоват. организаций: базовый уровень/ под ред. Н. Г. Зайцевой. - М.: Этносфера, 2022. - 80 с.: ил. — ISBN 978-5-93125-183-7, Lehtpol' 57.
Literatur
- Mišin A., Strogalščikova Z., Вепсская литература в меняющемся мире/ [Вепсы и их культурное наследие: сборник материалов межрегиональной краеведческой конференции "Лонинские чтения"] - Петрозаводск, 2010, КарНЦ РАН, с.38-79
- Polivanova G., Viktor Petrovič Jeršov/ Родной (вепсский) язык. 9 класс: учебное издание для общеобразоват. организаций: базовый уровень/ под ред. Н. Г. Зайцевой. - М.: Этносфера, 2022. - 80 с.: ил. — ISBN 978-5-93125-183-7, Lehtpol' 55-56.
- Зайцева Н. Г. Вепсская литература 1990-х годов // История литературы Карелии. Т. 3. Петрозаводск, 2000. С. 420-432.
- Мишин А. Вепсская литература глазами профессионального писателя// INF N 7. Петрозаводск, 2006.
- Проблемы истории и культуры вепской народности. Петрозаводск, 1989.
Homaičendad
Tarkendused
| Nece kirjutuz om vaiše ezitegez. Tö voit abutada meile, ku kohendat sidä da ližadat sihe. |