Möndradnikan päiv
| Möndradnikan päiv | |
|---|---|
 Sömtavaroiden möi | |
| Tip | Professionaline |
| Om tehtud | 17. semendkud vodel 2013 |
| Praznuitas | kaikuččen voden |
| Päiv | heinkun nel'l'anz' sobat |
| Om sidotud | mönderišt |
Möndradnikan päiv (ven.: День работника торговли) — praznik, kaikuččen voden praznuičeba mönderišton radnikad heinkun nelländel sobatal.
Praznikan päidei arvostada möndradnikoid, sanuda heile spasibsanoid heiden professionaližes rados, ozutada mitte om tärged mönderišt valdkundan ekonomikan täht.
Praznikan istorii
Möndradnikan päiv oli tehtud ezmäižen kerdan vodel 1966 Sovetskijan Sojuzan Ülembaižen prezidiuman käskön mödhe[1]. Siloi se praznuitihe heinkun jäl'gmäižel pühäpäiväl[2].
1. kül'mkud vodel 1988 oli vašvištadud uz' käsk, miččen mödhe Möndradnikan päiv ühtenzoitihe Eländ-kommunaližen elomišton, rahvahan elon holitusen radnikoiden päivänke[3]. Muga sündui Möndradnikan, eländ-kommunaližen elomišton, rahvahan elon holitusen radnikoiden päiv. Se pättihe praznuita keväz'kun kaikuččel pühäpäiväl kaikuččen voden[4].
Vodel 2013 Möndradnikan, eländ-kommunaližen elomišton, rahvahan elon holitusen radnikoiden päiv jagetihe kahthe praznikaha. Praznikan lopdata om tehtud Venäman prezidentan käskön mödhe — nece heinkun nel'l'anz' sobat[5]. Eländ-kommunaližen elomišton da rahvahan elon holitusen radnikoiden täht kaitihe enzne data — keväz'kun koumanz' pühäpäiv[6].
Tradicijad
Möndradnikan päiväl ozateldas kaikid, ked om mönderižtos — möjid, kassiroid, biznesmehid, menedžeroid, tovarovedoid, konsultoid da toižid azjantedajid. Tradicijan mödhe necil päiväl spasiboittas möndradnikoid heiden rados. Rahvaz vastase sebranikoidenke, heimolaižidenke, ked radaba mönderištos. Läheližed zvoniba telefonadme libo videosidon abul da ozateleba[7].
Möndradnikan päivän praiznuičemižen tradicijoiš oma praznikaližed azjtegod, praznikstolad, konz keradasoiš möndradnikad, heiden heimolaižed, sebranikad da läheližed ristitud.
Parahimile radnikoile anttas arvkirjeižid, kitändkirjeižid, lahjoid, rahapremijoid. Pidetas korporativad[8].
Praznik praznuitas toižiš-ki Ripmatomiden Valdkundoiden ühtištusen valdkundoiš[9].
Istoriližed toziazjad
- Keskeižil voz'sadoil mödihe enamba mužikad, no nügüd' enambišt mönderištos oma akad.
- Amuižen Rusin pämöndten nimi oli «var'agoišpäi grekoikš»[10]. Slavilaižed möiba nahkad, met, a ostiba kangast, st'okl'ad da kal'hed kived.
- XVII-voz'sadan augotižehesai Rusked avoinirdan nimi Moskvas oli Torgom — nece oli tutab möndsija[11].
- Tal'vkus vodel 1893 Rusttal avoinirdal oli avaitud ülähäižed möndrived (nügüd' GUM) — suremb kaikid möndsija Jevropas, toižil sanoil kattud möndird[12].
Homaičendad
- ↑ 22. heinkud — Möndradnikan päiv Venämal: konz praznuitas da ken praznuičeb. «Uzištod» (21 heinkud 2023). Дата обращения: 25 kezakud 2024.
- ↑ Möndradnikan päiv. Valdkundaližen statistikan federaline služb. Дата обращения: 25 kezakud 2024.
- ↑ Möndradnikan päiv Venämal. TASS (22 heinkud 2023). Дата обращения: 25 kezakud 2024.
- ↑ Sovetskijan Sojuzan Ülembaižen prezidiuman käsk 01.11.1988 Pandud vajehtusiš Sovetskijan Sojuzan zakonoiden tegemižehe praznikaližiš da muštpäiviš. Portal "Сейчас.ру". Дата обращения: 25 kezakud 2024.
- ↑ Venäman prezidentan käsk 7. semendkud vodel 2013 N 459 "Möndradnikan päiväs". Tedo-oiktusenportal "ГАРАНТ.РУ" (20 semendkud 2013). Дата обращения: 25 kezakud 2024.
- ↑ Eländ-kommunaližen elomišton da rahvahan elon holitusen radnikoiden praznikan polhe. Venäman radon da socialižen kaičemižen ministerstv (27 keväz'kud 2020). Дата обращения: 25 kezakud 2024.
- ↑ 22. heinkud — Möndradnikan päiv. Tedokeskuz "Вольская жизнь" (22 heinkud 2023). Дата обращения: 25 kezakud 2024.
- ↑ Департамент экономического развития Курганской области. Департамент информационных технологий и цифрового развития Курганской области. Дата обращения: 25 kezakud 2024.
- ↑ День работников торговли. ГУ "Республиканская научно-техническая библиотека". Дата обращения: 25 kezakud 2024.
- ↑ Tatjana Grigorjeva. Ken tegi te "var'agoišpäi grekoikš"? Portal «Культура.РФ». Дата обращения: 25 kezakud 2024.
- ↑ Rusked avoinird. istorii. История Москвы. Дата обращения: 25 kezakud 2024.
- ↑ GUM-laukan istorii. ГУМ. Дата обращения: 25 kezakud 2024.