Freid Anna

Рувики-späi
Freid Anna
saks.: Anna Freud
Anna Freid tatanke vl 1913
Anna Freid tatanke vl 1913
Sündundpäiv 3. tal'vkud 1895(1895-12-03)[1][2][…]
Sündundsija:
Kolendpäiv: 9. redukud 1982(1982-10-09)[1][2][…] (86 лет)
Kolendsija:
Valdkund
Professijad: psühhoanalüütik, non-fiction writer
Tat Freid Zigmund[5]
Mam Martha Bernays[d][5]
Pauklahjad da premijad
Sait annafreud.org
Логотип РУВИКИ.Медиа Mediafailad RUWIKI-tedoiš

Anna Freid (saks.: Anna Freud; sünd. 3. tal'vku 1885, Ven, Avstrii da Mad'jaranma — kol. 9. reduku 1982, London, Sur' Britanii) — Avstrijan augotižlibundan britanijalaine psiholog i psihoanalitik, Zigmund Freidan noremb tütär[6][7]. Ühtmudel Melani Kläinanke lugedas lapsiden psihoanalizan alusenpanijan[8].

Biografii

Anna oli noremban i kudenden lapsen Zigmund Freidan i hänen Marta-akan kanzas. Hän valiči augotižškolan opendajan professijan ičeze päazjaks. Jäl'ges Ezmäišt mail'man voinad Anna jäti openduzradon i pühäti ičtaze tatale, rates hänen sekratarin da holitajan, i psihoanalizale. Pigai hän tuli Venan psihoanalitikoiden sebraha i ezini sigä ezmäizidenke edespaginoidenke. Vodel 1938, Avstrijan anšlüsan jäl'ghe, Freidoiden kanz oli pandud arestal alle, i Anna tatanke pigai taci Venan kerdhaks i tuli elämaha Londonha. Sures Britanijas hän jatkui tedoita psihoanalizad i šingotada ičeze tatan idejad, eriližešti laps'aigan psihologijan sferas. Vl 1947 Anna Freid pani Hemstedan klinikan alusen Londonha, kudamb oli kaikiš suremban lapsiden psijoanalitižen tervehtand- i openduzkeskusen sen aigan. Vl 1952 hän avaiži Londonas lapsiden terapevtkursad i klinikan, kudambad oliba ezmäižen aluzkundan lapsiden tervehtandan psihoanalizan metodal täht. Elon jäl'gmäižil vozil tedomez' radoi Jelin universitetas i jatkui šingotada ičeze idejad lapsiden psihologijan sferas. Anna koli Londonas voden 1982 redukun 9. päiväl. Hän iče nikonz ei olend mehel i hänel ei olend ičeze lapsid.

Tedonägendad

Lindes ičeze tatan tedonägendoiden jäl'gnikan, Anna Freid šingoti ezikät psihoanaližid el'gendusid Minä:n polhe, i faktižešti pani uden neofreidistižen čuradusen psihologijas — ego-psihilogijan — alusen[9]. Hänen tedoližeks päedessatuseks tobjimalaz lugedas ristitun kaičijoiden mehanizmoiden teorijan tedoidust — mehanizmoiden[10], kudambiden abul Minä laptastab Se:n valatoitust. Mugažo Anna lujas edeni agressijan openduses, no üks'-se kaikiš suremban tondan psihologijaha oli lapsiden psihologijan (nece hänen edessatuz om ühthine Melani Kläinanke) i lapsiden psihoanalizan sädand. Hän tedoiži metodad, kut rata lapsidenke, sidä kesken Anna tedoiži udes psihoanalitižen teorijan vändsijadusid kazvatajile i lapsile heiden ičekeskentehmižes abun täht. Lapsed oliba Anna Freidan tedon da elon pämel'hetärtusen, erašti hän eskai sanui: «En meleta, miše olen hüvän objektan biografijan täht. Nacein, kaiked minun elod voib ümbrikirjutada ühtel sanundal — minä radoin lapsidenke!». Elon lopus tedomez', kudamb jo oli olnu Arvostuzprofessoran mail'man äjiden kaikiš surembiš universitetoišpäi, tartui melel toižhe agjaha, ühtenzoittud lapsidenke, — kanzoiktuz, hän radoi siš Jelin universitetas i pästi kaks' töd ühtmudel kollegidenke (kacu «Valitud tedotöd»-jagust)[11].

Valitud tedotöd

  1. Ezisanad psihoanalizale opendajiden täht (1926, Einführung in die Psychoanalyse für Pädagogen)
  2. Ego i kaičendan mehanizmad (1936, Das Ich und die Abwehrmechanismen)
  3. Lapsiden psihoanalitine tervehtamine (1946, The Psychoanalytic Treatment of Children)
  4. Normaline i patologine laps'aigas: šingotesen arvoind (1965, Normality and Pathology in Childhood: Assessment of Development)
  5. Lapsen pämel'hetartusiden toižen polen taga (1973), ühtmudel Dž. Gol'šteinanke i A. Solnitanke.
  6. Lapsen pämel'hetartusiden edes (1979), ühtmudel Dž. Gol'šteinanke i A. Solnitanke.

Homaičendad

  1. ↑ 1 2 Anna Freud // Encyclopædia Britannica (англ.)
  2. ↑ 1 2 Anna Freud // Brockhaus Enzyklopädie (нем.) / Hrsg.: Bibliographisches Institut & F. A. Brockhaus, Wissen Media Verlag
  3. ↑ 1 2 Anna Freud, Dr. (англ.) — University of Vienna.
  4. ↑ 1 2 Gadzinski A. KALLIOPE Austria (нем.): Frauen in Gesellschaft, Kultur und Wissenschaft — Wien: Bundesministerium für Europa, Integration und Äußeres, 2015. — S. 204. — ISBN 978-3-9503655-5-9
  5. ↑ 1 2 Kindred Britain
  6. ↑ Anna Freidan polhe / Krugosvet.ru. (ven.)
  7. ↑ Anna Freidan polhe / Psy-files.ru. (ven.)
  8. ↑ Peter Gay, Freud: A Life for Our Times. London, 1988. Lp. 469.  (angl.)
  9. ↑ O. L. Zangwill, 'Freud, Anna' in Gregory ed.. Lp. 268.  (angl.)
  10. ↑ Freud, A. (1937). The Ego and the Mechanisms of Defense. London: Hogarth Press and Institute of Psycho-Analysis. (Revised edition: 1966 (US), 1968 (UK))  (angl.)
  11. ↑ Yupbooks / Yalepress.yale.edu.  (angl.)

Irdkosketused

Om sadud "https://vep.ruwiki.ru/w/index.php?title=Freid_Anna&oldid=472454"