Ol'ga Mironova
| Ol'ga Jevgenjevna Mironova | |
| ven.: Ольга Евгеньевна Миронова | |
| nimi: |
neiččen familii Fotejeva |
|---|---|
| Sündundpäiv |
28. semendkud 1963 (61 vot) |
| Sündundsija: | |
| Rahvahuz' | |
| Professijad: |
opendai |
| Tat |
Jevgenii Pavlovič Fotejev |
| Mam |
Jevgenia Ivanovna Fotejeva |
Ol'ga Jevgenjevna Mironova (28. semendku 1963 Kaleig, Änižröun, Karjalan Valdkund, Venäma — vepsän kelen tundii, Karjalan valdkundaližen pedagogižen institutan pästnik (1985), vepsän da anglijan kelen opendai Kalagelaižes školas[1] (1985—2021), vepsän kelen kursoiden vedäi «Värtin»-etnokeskuses (vodelpäi 2021).
Laps'aig
Ol'ga Mironova om rodnus vepsläižes Kaleig-posadas, mi seižub sadas kilometras Petroskoi-lidnaspäi Karjalas. Kaleiges mäni hänen laps'aig. Hän lopi kahesa klassad Kalagelaižes školas, vanhembiš klassoiš openzihe Šoutjärven školas. Hän kaiken openzihe lujas hüvin. Lujas hüvin pagižeb maman kelel, sikš ku kodiš kaiken aigan pagištihe vepsäks. Hänen mamaze Jevgenia Ivanovna Fotejeva äi vot radoi lapsiden kacujan päivkodiš, edel pensijad — počtal, nügüd’ om külän aktivine eläi. Hänen tat Jevgenii Pavlovič radoi šoferan krazal ORD-as drobilkal. Laps’aigaspäi vanhembad openziba pen't tütärt navedimha rata, abutamha toižile, olda vastusenpidäjan, hüvänsüdäimeližen da holekahan ristitun.
Norišt
Jäl'ghe školad Ol'ga läksi opendamhas Karjalan valdkundaližehe pedagogižehe institutha, päzui verhiden keliden erištole. Hän openzi francian da anglian kelid. Konz vodel 1985 lopi institutan, händast oigetihe kodimale Kalagen školha radmaha anglian kelen opendajan.
Konz 1980-vozil zavodihe vepsän kelen da kul’turan udessündutamine, oli tehtud Vepsän kul'tursebr, školiš zavottihe opeta lapsile vepsän kel’t. Vodel 1991 vepsän kel’ tuli Kalagen školha. Ol'ga Mironova, kut parahim vepsän kelen tundii, zavodi tehta vepsän kelen openduzprogramman[2], didaktižed materialad, openduzkirjad da vedäda vepsän kelen urokoid lapsil kaks’ kerdad nedališ. Nece hänespäi zavodihe vepsän kelen opendamine Kalagen školas.
Rad školas
Zavodida opeta lapsid vepsän kel'he školas oli jüged. Pidi tehta kaiken ičeleze. Siloi ei olend ni openduzkirjoid, ni programmoid. Abuti vaiše se, miš Ol'ga hüvin tezi verhan kelen metodikad. Sil aigal oli kebnemb opeta lapsid kodikel’he, sikš ku hö kuliba kodiš, kut pagižeba heiden babad, dedad da prababad vepsäks. Vepsäks pagištihe irdal, laukoiš. Erased lapsed pagižiba eskai kodiš vanhembidenke.
Sikš ku nece oli vaiše vepsän kelen udessündutamižen augotiž, ka pidi valita, miččel pohjal opeta lapsid, Ol'ga Mironova zavodi opeta latinical. Sid' openduzkirjad kebnenzoitiba vepsän kelen opendamišt. Lapsed openzihe urokoil lugemaha, kirjutamha da pagižmaha kodikelel. Hö paniba muštho äi runoid da starinoid, paksus kirjutiba diktantoid. Vanhad külän eläjad mugažo tuliba abuhu, starinoičiba äjan enččes elos, vepsläižiš tradicijoiš da veroiš.
«Konz zavottihe tehta openduzkirjoid, tegihe väheižen kebnemba, no ii sanu otta kaiked kirjaspäi opendusen täht. Kirjoiš oli vähä grammatikad, minä iče tegin kartaižid tegendoidenke. Lehtesehe kirjutim sanoid, lapsed opetihe niid kodiš. Sil aigal lapsil oli taht opeta kodikel’t, nece oli mugoine-žo urok, kut i kaik toižed. Mö lapsideke kävelim kodid möto, küzelim vanhembil: mitte elo oli ende, midä teht’he, kus mi oli, kerazim tahonnimid (kut nimitet’he soid, järvid, nituid, ojaižid). A däl’ges Šuutarves oli konferencii, i sigä lapsed teht’he dokladoid, midä hö tedištet’he vanhembišpei. Lapsile nece oli melentartušt. Hö surel tahtol ühtniba kaikihe vepsän kelen kanzkonkursoihe, festivalihe, konferencijoihe. Ühtniba kut lapsed, muga aigvoččed-ki. Siloi oli kebn lüuta kanzan, mitte voiži ühtneda konkursaha. A nügüni om vähä lapsid, kudambad tahtoiba opeta kel’t da ühtneda konkursoihe[3].».
26-voččes rados školas Ol’ga Jevgenjevna vaumiči äi pästnikoid, kudambad ozutiba hüvid vepsän da anglian keliden tedoid, konz päzuiba opendamhas universitetha. Hän om todesine kodikelen kaičii, lujas navedib ičeze kodiröunad. Ol’ga Jevgenjevna mahtoi sündutada openikoiš armastust ičeze ezitatoiden kodikel’he da kul’turaha. Hänen urokad da opendusen irdpoližed töd oliba lujas melentartuižed lapsile. Kaikuččen voden, konz openduzvoz’ lopihe, hän tegi lapsidenke Vepsläižid besedoid. Nece hüvä tradicii eli školas äi vot. Openduzvoden lopus hän vaumiči lapsidenke programman da kucui besedoile mamoid, baboid. Lapsed lugiba runoid, sanuiba muštatesid da ozutiba sarnoid. Kaikutte baboi tuleskeli ičeze paštatesenke, miše jäl'ghe ezitust kaik ühtes joda čajud pirgoidenke.
Sur’ znamoičend vepsän kelen da vepsän rahvahan tradicijoiden kaičendas om muzejal. Joga voden Ol'ga Mironova lapsidenke ajeli Šoutjärven muzejaha, kus lapsiden täht tehtihe openduzčasuid, vedetihe ozutelusid, tundištoittihe vepsän kul’turanke. Kaikuččen kezan lapsiden täht radoi etnokul’turine lager’ školas, kus lapsed openziba vepsän kel’t, ühtniba mastar’-klassoihe, sportvändoihe.
Konz školha tuliba nored vepsän kelen opendajad, Ol’ga Jevgenjevna abutaškanzi heile: vaumiči lapsid vepsän kelen olimpiadoihe, praznikoihe, festivalihe, konferencijoihe[4], miččed om sidotud vepsän rahvahan istorijanke da kul’turanke[5]. Enččed openikad lujas navediba da arvostaba händast, nügüd’-ki paksus soitaba da tuleba adivoihe.
Vepsän kelen kursad
Vodel 2021 Ol’ga Mironova läksi pensijale, läksi školaspäi da zavodi opeta vepsän kel’t aigvoččile ičeze kodiküläs «Värtin»-etnokeskuses. Vanhembad külän eläjad hüviš meliš opendasoiš lugemaha, kirjutamha da pagižmaha vepsäks. Hö opendaba grammatikad, äjan kändaba, otaba materialoid «Kodima»-lehtesespäi da lapsiden «Kipinä»-kulehtesespäi. Erašti ratas käzil, enamba kudodad.
Ol’ga Jevgenjevna om opendai sures kirjamespäi, todesine vepsän kelen tundii, parahim nevonik da abunik vepsläižele norištole. Hän kandab armastust kodikel’he voziš päliči, tegeb suren panendan vepsän rahvahan hüvüdeks. Hänen melel, hänen nevondoil kelen elo om tehnus pidembaks, se tuli kuti tagaze kodimale. Ved’ nügüd’ aigvočče-ki tahtoiba lugeda, tedištada kel’t enamba, johtutada unohtadud vanhoid töid i sanoid. Senke ühtes sirdäse kel’-ki. Se ei voi olda elota. Konz nimidä ed tege käzil, ka ed teda, miš pagišta kodikelel-ki. Nece om znamasišt.
Pauklahjad da arvnimed
- Karjalan parlamentan kitändkirjeine (2005).
- Karjalan Municipaližen opendusen kitändkirjeine (1997, 2004).
- Karjalan Rahvahaližen politikan komitetan kitändkirjeine (2001,2005).
- Venäman Openduz- da tedoministerstvan kitändkirjeine (2013).
Bibliografii
- О. Е. Миронова, М. А. Миронова. Рюрик Петрович. Жизнь и деятельность. Вепсский край: история и ее творцы: материалы второй (30 октября 2014 г.) и третьей (29 сентября 2016 г.) межрегиональных краеведческих конференций «Лонинские чтения», с. Шелтозеро / научные редакторы: Е. И. Клементьев, З. И. Строгальщикова. — Петрозаводск : Verso, 2021. — 192 с. — В надзаголовочных данных: Министерство национальной и региональной политики Республики Карелия [и др.]. ISBN 978-5-91997-410-9.
- Sanu, luge, kirjuta! : учебное пособие на вепсском языке / составители: Миронова М. А., Миронова О. Е. ; художник: Хиль Д. А. — Петрозаводск : Periodika, 2024. — 108 с. : ил. — Возрастные ограничения: 6+. — ISBN 978-5-88170-453-7.
Homaičendad
- ↑ Этнокультурное образование. Учиетль вепсского и английского языка О.Е. Миронова.
- ↑ Программа по этнокультурному образованию на 2007 2010 гг. Дата обращения: 1 sügüz'kud 2007.
- ↑ Координационный совет по осуществлению государственной поддержки изучения карельского, вепсского и финского языков в образовательных учреждениях Республики Карелия. Дата обращения: 27 semendkud 2014.
- ↑ Республиканская конференция «Роль системы образования в сохранении нематериального культурного наследия коренных народов Республики Карелия». Дата обращения: 30 kül'mkud 2018.
- ↑ III краеведческая конференция «Лонинские чтения». Дата обращения: 29 sügüz'kud 2018.
Literatur
- О. Е. Миронова, М. А. Миронова. Рюрик Петрович. Жизнь и деятельность. Вепсский край: история и ее творцы: материалы второй (30 октября 2014 г.) и третьей (29 сентября 2016 г.) межрегиональных краеведческих конференций «Лонинские чтения», с. Шелтозеро / научные редакторы: Е. И. Клементьев, З. И. Строгальщикова. — Петрозаводск : Verso, 2021. — 192 с. — В надзаголовочных данных: Министерство национальной и региональной политики Республики Карелия [и др.]. ISBN 978-5-91997-410-9.
Tarkendused
|
Nece kirjutuz om vaiše ezitegez. Tö voit abutada meile, ku kohendat sidä da ližadat sihe. |